ޕްރީ އޯޑަރ އެމްވީ ހިންގި މީހާ 4 އަހަރަށް ގޭބަންދު ކުރަން ހުކުމް ކޮށްފި
އޭނާ ވަނީ ކުށަށް އިއުތިރާފުވެ، ފައިސާ ދެއްކޭނެ ގޮތެއް ހޯދުމަށްޓަކައި ލުއި އަދަބެއް ދިނުމަށް އެދިފައި
ކްރިމިނަލް ކޯޓު
ޕްރީ އޯޑަރ އެމްވީގެ ނަމުގައި ފޭސްބުކް ޕޭޖެއް ހުޅުވައި، އެ ޕޭޖު މެދުވެރިކޮށް، އިލެކްޓްރޯނިކް ސާމާނު ގެނެސްދޭނެ ކަމަށް ބުނެ ގިނަ ބައެއްގެ އަތުން ފައިސާނަގައި އޮޅުވާލި މީހަކު ހަތަރު އަހަރަށް ގޭ ބަންދު ކުރުމަށް ކްރިމިނަލް ކޯޓުން ހުކުމް ކޮށްފި އެވެ.
ކްރިމިނަލް ކޯޓުން އެހުކުމް ކޮށްފައި ވަނީ ވ. ކްލޭޓަން، މޫސާ ނަހްޒާން ނަސީމްގެ މައްޗަށެވެ. އޭނާ ހަތަރު އަހަރަށް ގޭބަންދަށް ހުކުމް ކޮށްފައިވަނީ، ޕްރީ އޯޑަރ އެމްވީގެ ނަމުގައި 2017 ވަނަ އަހަރު ހިންގި ފޭސްބުކް ޕޭޖަކުން އިލެކްޓްރޯނިކްސް ސާމާނު ގެނެސްދޭނެ ކަމަށް ބުނެ 75 މީހެއްގެ އަތުން ޖުމްލަ 500،000 އަށް ވުރެ ގިނަ ރުފިޔާ ނެގުމަށް ފަހު އެ ތަކެތި ގެނެސް ނުދިން މައްސަލާގައި، އޭނާގެ މައްޗަށް ދައުވާކުރި މަކަރާއި ހީލަތް ހެދުމުގެ ދައުވާއާ ގުޅިގެންނެވެ.
އެދައުވާ އިއްވުމުން ނަހްޒާން ވަނީ އެދައުވާ ސާފުވާ ކަމަށާއި އަދި ކުށަށް އިއުތިރާފުވާ ކަމަށް ޝަރީއަތުގައި ބުނެފަ އެވެ. އަދި އެފައިސާ ނެގި ފަރާތްތަކަށް އަނބުރާ ދެއްކޭނީ، އޭނާ ޖަލަށްލުމުގެ ބަދަލުގައި އެދައުވާގެ އެންމެ ކުޑަ އަދަބެއް ދިނުމުން ކަމަށް ވެސް އޭނާ ބުނެފައި ވެއެވެ.
ޝަރީއަތުން ނިންމީ، ކުށަށް އޭނާ އިއުތިރާފުވެފައިވާތީއާއި އެކަން އޭނާ ކުރީ އެއްވެސް ފަރާތެއްގެ ނުފޫޒެއް ނެތި އޭނާގެ އަމިއްލަ އިޚުތިޔާރުގައި ކަމަށް ޝަރީއަތުގައި އޭނާ ބުނެފައިވާތީ، ނަހްޒާންގެ މައްޗަށް ކުށް ސާބިތުވާ ކަމަށް ނިންމާ ކަމަށެވެ. އަދި ކުށުގެ އަދަބެއްގެ ގޮތުން އޭނާ ހަތަރު އަހަރާއި ނުވަ މަހާއި 18 ދުވަހަށް ގޭބަންދު ކުރުމަށް ހުކުމް ކުރާކަމަށް ކްރިމިނަލް ކޯޓުން ނަހްޒާންގެ މައްޗަށް ކޮށްފައިވާ ހުކުމުގައި ބުނެފައި ވެއެވެ.
މައްސަލައިގައި ނަހްޒާން އާއި ޕްރޮސެކިއުޓާ ޖެނެރަލް އާދެމެދު ވަނީ އިއުތިރާފުގެ އެއްބަސްވުމެއް ހަދާފަ އެވެ. ނަމަވެސް ނަހްޒާން ވަނީ އެމައްސަލައިގެ އިބްތިދާއީ އަޑުހުމުގައި އެ އެއްބަސްވުމާއެއްގޮތަށް، އޭނާ ފައިސާ ނެގި ފަރާތްތަކަށް ފައިސާ ނުދެވޭނެކަމަށް ބުނެ، އެ އެއްބަސްވުން އުވާލަން ބޭނުންވާ ކަމަށް ބުނެފަ އެވެ. އެހެންކަމުން ޝަރީއަތުން ނިންމާފައިވަނީ އެ އެއްބަސްވުން ބަލައި ނުގަތުމަށެވެ.
މި ކުށަށް ކަނޑައެޅިފައިވާ އަދަބުގެ އަސާސީ މިންގަނޑަކީ ތިން އަހަރާއި ދެ މަހާއި 12 ދުވަހުގެ މުއްދަތަކަށް ޖަލަށް ލުމެވެ.
އިބްތިދާއީ އަޑުއެހުމުގައި ނަހްޒާން ދައުވާއަށް އިއުތިރާފުވެ، ޝަރީއަތުގައި އިއުތިރާފް ދަމަހައްޓާފައި ވާތީ އޭނާގެ މައްޗަށް ކަނޑައަޅަންޖެހޭ އަދަބު، އަދަބު ކަނޑައެޅުމުގެ އަސާސީ މިންގަނޑަށް ވުރެ އެއް ދަރަޖަ ދަށްވާނެކަން އެނގެން އޮންނާތީ، އޭނާގެ މައްޗަށް ކަނޑައެޅޭނެ އަދަބަކީ ދެ އަހަރާއި ހަތަރު މަހާއި 24 ދުވަހަށް ޖަލަށް ލުމެވެ. ނަމަވެސް އޭނާ ގޭބަންދުކުރަން ހުކުމްކޮށްފައި ވަނީ އެއީ އެންމެ މަސްލަހަތު ހުރި ގޮތްކަމަށް ޝަރީއަތަށް ފެންނާތީ ކަމަށް ހުކުމްގައި ބުނެފައި ވެއެވެ.
މީގެ އިތުރުން އޭނާ އަށް ފައިސާ ދެއްކި ފަރާތްތަކަށް އެ ފައިސާ ހޯދަން ސިވިލް ކޯޓުގައި ދައުވާ ކުރުމުގެ ހައްގު އޮންނާނެ ކަމަށް ވެސް އެ ހުކުމުގައިވެ އެވެ.
