ގެންނަ ބަދަލަކީ އަސާސީ ހައްގުތަކާއި މިނިވަން ކަމުގެ ބާބާއި ޚިލާފްވުން ބަދަލެއްކަމަށް ވިދާޅުވި
ޖުމްހޫރީ ޕާޓީގެ ލީޑަރ ގާސިމް އިބްރާހިމް
ކައުންސިލްތަކުގެ 33 ޕަސެންޓް އަންހެނުންނަށް ޚާއްސަކުރުމަށް ނިންމި ނިންމުމަށް ޖުމްހޫރީ ޕާޓީގެ ލީޑަރ ގާސިމް އިބްރާހިމް ދެކޮޅު ހައްދަވައިފިއެވެ.
އަންގާރު ދުވަހުގެރޭ ޖުމްހޫރީ ޕާޓީއަށް މެންބަރުން އިތުރުކުރުމަށް ހިންގާ ސިލްސިލާ ހަރަކާތުގެ ތެރެއިން މ. ކުނޫޒްގައި ބޭއްވި ޖަލްސާގައި ވާހަކަ ދައްކަވަމުން ގާސިމް ވިދާޅުވީ އަންހެނުން ބޭފުންނަށް ކައުންސިލްތަކުން ވަކި ޕަސެންޓެއް ދިނުމަށް މަޖުބޫރު ކުރުވަން މަޖިލީހުން ކުރާ މަސައްކަތަކީ ކަނޑައެޅިގެން ޤާނޫނު އަސާސީގެ އަސާސީ ހައްގުތަކާއި މިނިވަން ކަމުގެ ބާބާއި ޚިލާފް ކަމެއް ކަމަށެވެ. ޤާސިމް ވިދާޅުވީ ޤާނޫނު އަސާސީއަށް އަންނަ ބަދަލުތަކަކީ ވަކި މީހަކު ނުވަތަ ބަޔަކު ކްރެޑިޓް ނަގަންޖެހޭ ކަމެއްގެ ގޮތުގައި އޮވެގެން ދިއުމަކީ އެއީ އެންމެ ރަނގަޅު ގޮތް ކަމަށް ޤަބޫލު ނުކުރައްވާ ކަމަށެވެ.
ޤާސިމް ވިދާޅުވީ އިންތިޚާބުތަކުގައި ވާދަކުރުމުގެ ހައްގު ކޮންމެ މީހަކަށް އެބައޮތް ކަމަށެވެ. އަދި ވޯޓުން މަތީ ނަޓީޖާއެއް ހޯދައިގެން އާދެވޭ ކަމުގައި ވަނީ ނަމަ އަންހެން ބޭފުޅުންވެސް ނުކުމެވަޑައިގެން މަސައްކަތް ކުރައްވަންވީ ކަމަށް ޤާސިމް ވިދާޅުވި އެވެ.
ކައުންސިލް އެކަނި އެގޮތަށް ބަދަލު ކުރައްވަނީ ކީއްވެތޯ ސުވާލު އުފައްދަވާ ގާސިމް ވިދާޅުވީ ރައްޔިތުންގެ މަޖިލީހާއި ރައީސުލްޖުމްހޫރިއްޔާ ކަންވެސް އެގޮތަށް ބަދަލު ނުކުރައްވަނީ ކީއްވެތޯ ސުވާލު ކުރައްވާފަ އެވެ.
ގާސިމް ވިދާޅުވީ ވޯޓު ހޯދުމުގެ ބޭނުމުގައި އެކަން އޮގަތަށް ބަދަލުކުރެއްވި ނަވެސް ދިވެހި އަންހެން ކަނބަލުން އެހާ ގަމާރު ނޫން ކަމަށެވެ.
ކައުސިލް އިންތިޚާބާއި މަޖިލިސް އިންތިޚާބުގައި 100 ޕަސެންޓް އަންހެން ބޭފޫޅުން ވާދަ ކުރުމުގެ ބާރު މިހާރު އެބައޮތް ކަމަށާއި ނަމަވެސް ވަކި ޖިންސަކަށް ލާމަރުކަޒީ ޤާނޫނަށް ގެންނަ ބަދަލަކީ އަސާސީ ހައްގުތަކާއި މިނިވަން ކަމުގެ ބާބާއި ޚިލާފްވުން ކަމަށެވެ. އަދި ވަކި ބަޔަކަށް މަންފާ ހޯދުމަށް އެ ގެނެވޭ ބަދަލާއި ގުޅިގެން ގެއްލުންތަކެއް ލިބިގެންދާނެ ކަމަށް ގާސިމް ވިދާޅުވިއެވެ.
ޤާސިމް ވިދާޅުވީ ކައުންސިލްތަކުން 33 ޕަސެންޓް އަންހެނުންނަށް ހާއްސަ ކުރުމާއި ގުޅޭގޮތުން ވާހަކަ ދެއްކެވީ ވަކި ބަޔަކަށް ފާޑު ކިޔުމުގެ ނިޔަތުގައި ނޫން ކަމަށާއި އެ ވާހަކަ ދެއްކެވީ ބަޔަކު ސިޔާސީ މަންފާ ހޯދަން މިފަދަ ކަމެއް ކުރާއިރު ރައްޔިތުންނަށް އެކަން ބުނެ ނުދެއްވާ ހުންނެވުމަކީ އަމިއްލަ ނަފްސަށް ގިލްޓީ ވާނެ ކަމަކަށް ވާތީ ކަމަށެވެ. އެ ގެނެވޭ ބަދަލަކީ މިނިވަން ކަމަށް އެޅޭ ވަރަށް ބޮޑު ހުރަހެއް ކަމަށާއި މިނިވަން ކަމުގެ ބޭންޑް އަޅުއްވައިގެން ތިއްބަވާ އެފަދަ މުނާފިގު ކަންތައް ނުކުރެއްވުމަށް ގާސިމް ވަނީ އެދިވަޑައިގެންފައެވެ.
ކައުންސިލަރުންގެ ދައުރު ފަސް އަހަރަށް ކަނޑައެޅުމަށް ރައްޔިތުންގެ މަޖިލީހުން ހަމަޖެއްސުމުން އެކަމުން އެކަމަށް އެކަމަށް ތަޢިދު ކުރައްވާކަން ގާސިމް ހާމަކުރެއްވިއެވެ.
