އިންސާނީ ވަގުފާރި ހުއްޓުވުމުގެ ކަންކަން ވިލަރެސްކުރާ ކޮމިޓީގެ ފުރަތަމަ ބައްދަލުވުން ބާއްވައިފި
1 ޑިސެމްބަރު 2019 | އާދީއްތަ 18:38މީހުން ޓްރެފިކް ކުރުން ހުއްޓުވުމާ ބެހޭ ޤާނޫނު ފާސްކުރީ 2013 ގައި
މީހުން ޓްރެފިކް ކުރުން ހުއްޓުވުމުގެ ކަންކަން ވިލަރެސްކުރާ ކޮމިޓީގެ ފުރަތަމަ ބައްދަލުވުން
އިންސާނީ ވަގުފާރި (ހިއުމަން ޓްރެފިކިންގ) ހުއްޓުވުމުގެ ކަންކަން ވިލަރެސްކުރާ ކޮމިޓީ އަލުން އެކުލަވާލައި، ކޮމިޓީގެ ފުރަތަމަ ބައްދަލުވުން ބާއްވައިފިއެވެ.
މީހުން ޓްރެފިކް ކުރުން ހުއްޓުވުމާ ބެހޭގޮތުން 2013 ވަނަ އަހަރު ފާސްކުރި ޤާނޫނުގެ ދަށުން އެކަންކަން ވިލަރެސްކުރާ ކޮމިޓީ އަލުން އެކުލަވާލާފައިވާއިރު، އާދިއްތަ ދުވަހު ވަނީ ކޮމިޓީގެ ފުރަތަަމަ ބައްދަލުވުން ބާއްވާފައެވެ. މި ކޮމިޓީގައި 14 ބޭފުޅުން ހިމެނިވަޑައިގަންނަވާއިރު، ކޮމިޓީގެ ރައީސްގެ ގޮތުގައި ރައީސުލްޖުމްހޫރިއްޔާ ކަނޑައަޅުއްވާފައިވަނީ މިނިސްޓަރ އޮފް ޑިފެންސް މާރިޔާ އަޙްމަދު ދީދީ އެވެ.
އެކަމާ ގުޅޭގޮތުން ޑިފެންސް މިނިސްޓްރީން ބުނީ، މި ކޮމިޓީއަކީ މީހުން ޓްރެފިކްކުރުން ހުއްޓުވުމާ ބެހޭ ޤާނޫނުގެ 60 ވަނަ މާއްދާގެ (ހ) ގައި ބަޔާންކޮށްފައިވާ ފަދައިން، ޤާނޫނުގެ ދަށުން ހިންގަންޖެހޭ ކަންކަން އެގޮތުގައި ހިނގަމުންދޭތޯ ބެލުމަށާއި، ޤާނޫނުގެ ދަށުން ދައުލަތުގެ އެކިއެކި އިދާރާތަކުން އަޅަމުންދާ ފިޔަވަޅުތައް ޤާނޫނުގައި ބަޔާންވެގެންވާ ގޮތުގެ މަތިން އަޅަމުންދޭތޯ ބެލުމުގެ ޒިންމާ ޙަވާލުކުރެވިފައިވާ ކޮމިޓީއެއް ކަމަށެވެ.
ހިއުމަންޓްރެފިކިންގ ހުއްޓުވުމަށް ސިފައިންނާއި ފުލުހުން ގުޅިގެން ގިނަ މަސައްކަތްތަކެއް ކުރަމުންދާއިރު، އެފަދަ މައްސަލަތައް ހުށައެޅުމަށް ޚާއްސަ ވެބްޕޯރޓަލްއެއްފުލުހުންވެސް ވަނީ ތަޢާރަފުކޮށްފައެވެ. އެގޮތުން ހިއުމަން ޓްރެފިކިންގް ގެ ޝިކާރައަކަށްވާ މީހުންގެ 70 އިންސައްތައަކީ އަންހެނުން ކަމަށާއި، މިއީ ދުނިޔޭގައި 2 ވަނަ އަށް އެންމެ ބޮޑު އެއް ޖިނާއީ ޖަރީމާ ކަމަށް މި ޕޯރޓަލްގައި ބުނެފައިވެއެވެ.
