ފަނޑިޔާރުންނަށް ނިސްބަތްކޮށް ބޭއަދަބީކޮށް ވާހަކަނުދައްކާ ކަމަށާއި، އިންޒާރުދީފައިނުވާ ކަމަށް ޕީއެންސީގެ ރައީސް އަބްދުއްރަހީމް ވިދާޅުވެއްޖެއެވެ.

ހޮނިހިރު ދުވަހު ޕީޕީއެމް/ޕީއެންސީން ބޭއްވި ނޫސްވެރިންގެ ބައްދަލުވުމުގައި ރާއްޖެއެމްވީ ކުރެއްވި ސުވާލަކަށް އަބްދުއްރަހީމް ވިދާޅުވީ ޝަރުއީ ކޯޓުތަކަށް އިހުތިރާމް ކުރާ ކަމަށާއި، އެކޯޓުތަކުން ނިންމާ ނިންމުންތަކަށް ފާޑު ނުކިޔާ ކަމަށެވެ.

ނަމަވެސް ކުރީގެ ރައީސް އަބްދުﷲ ޔާމީންގެ އަބްދުއްގައްޔޫމްގެ މައްޗަށް އިއްވި ހުކުމަކީ އުސޫލުން ބޭރުން އިއްވި ހުކުމެއް ކަމަށާއި، އެއީ ސިޔާސީ ހުކުމެއް ކަމަށް އަބްދުއްރަހީމް ވިދާޅުވިއެވެ. އަދި ވިދާޅުވީ އުސޫލުތަކާ ހިލާފަށް ކަންކަން ކުރާނަމަ ބަސްބުނެވޭނެ ކަމަށާއި، ނަމަވެސް ފަނޑިޔާރުންނަށް ފާޑު ކިޔާ، އިންޒާރު ނުދޭ ކަމަށެވެ.

އެމްޑީޕީއަށް ފާޑު ކިޔުއްވާ އަބްދުއްރަހީމް ވިދާޅުވީ، މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބަލާ ކޮމިޝަންގެ ރައީސް ހުސްނުއް ސުއޫދު، ރައްޔިތުންގެ މަޖިލީހުގެ ނައިބުރައީސް އަދި ގަލޮޅު އުތުރު ދާއިރާގެ މެމްބަރު އީވާ އަބްދުﷲ އަދި މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީގެ އިތުރުން އެމްޑީޕީގެ ގިނަ މެމްބަރުން ކޯޓުތަކުގެ ހުރުމަތްކަނޑާފައިވާ ކަމަށާއި، ފަނޑިޔާރުންނަށް ބަދުބަސް ބުނެފައިވާ ކަމަށެވެ.

އަބްދުއްރަހީމް އެމްޑީޕީއަށް މިފަދަ ތުހުމަތު ކުރެއްވިއިރު، އަބްދުއްރަހީމް ވިދާޅުވެފައިވަނީ ރައީސް ޔާމީންގެ މައްސަލަ ބެއްލެވި ފަސް ފަނޑިޔާރުންނަށް ނިސްބަތް ކުރައްވާ ހުތުރު ބަހެއް ބޭނުންކުރެއްވުމަށްފަހު ފަސް ފަނޑިޔާރުން ޖަލަށްލާނެކަމުގެ އިންޒާރުދީފައެވެ.

މައުލޫމާތު ލިބޭ ގޮތުގައި މިމައްސަލަ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ފުލުހުންނަށް ހުށަހެޅުމާ ގުޅިގެން ހޮނިހިރު ދުވަހުގެ ރޭ 8:00 އަށް ފުލުހަށް ހާޒިރުވުމަށް ވަނީ ޗިޓު ފޮނުވާފައެވެ.