ބްރޯޑް ކޮމް އަށް ޝިފްލާ އާއެކު އެމްޑީޕީގެ އެކްޓިވިސްޓް ގައިސް

މޯލްޑިވްސް ބްރޯޑްކާސްޓިންގ ކޮމިޝަން (ބްރޯޑްކޮމް) އިން ހުސްވެފައިވާ ދެ މަގާމަށް އައްޔަނުކުރުމަށް ރައީސުލްޖުމްހޫރިއްޔާ ފޮނުއްވާފައިވާ ނަންފުޅުތައް ދިރާސާކުރުމަށްފަހު ތަޅުމަށްފޮނުވާ ލިސްޓުގެ ކުރީގައި ޝިފްލާ އާއެކު އެމްޑީޕީގެ އެކްޓިވިސްޓު އަހުމަދު ގައިސް ހިމެނިއްޖެ އެވެ.

ބްރޯޑްކޮމް އައްޔަނުކުރުމަށް ރައީސް އިސްކަންދެއްވާ ތަރުތީބުން ރައްޔިތުންގެ މަޖިލީހަށް ފޮނުއްވާފައިވާ 36 ނަންފުޅުގެ ލިސްޓުގެ ކުރީގައި އޮތީ ގ.މަސްއޮޑިގެ ޝިފްލާ އިބްރާހީމް އާއި ގ.ޑޭޒީފެހި މުހައްމަދު ހިލްމީއެވެ. މިނަންތައް ދިރާސާކުރި މިނިވަން މުއައްސަސާތަކާބެހޭ ކޮމިޓީގެ ރިޕޯޓްގައި ބްރޯޑްކޮމް އިން ހުސްވެފައިވާ ދެ މަގާމަށް އައްޔަނުކުރުމަށް ކޮމިޓީގެ ތިންބައިކުޅަ ދެބައިގެ އަޣްލަބިއްޔަތުން ފާސްކޮށްފައިވާ ލިސްޓުގެ ކުރީގައި އުޅެނީ ގ. މަސްއޮޑިގެ ޝިފްލާ އިބްރާހީމް އާއި ގދ.ތިނަދޫ/ސަނީޑޭލް އަހުމަދު ޤައިސް އެވެ.

ސަންގުޓީވީގެ ޕްރެޒެންޓަރެއްގެ ގޮތުގައި މިހާރު ހަރަކާތްތެރި ވަމުންދާ ޝިފްލާ އަކީ މީގެކުރިން ޓީވީއެމް އިން ނޫސްވެރިއެއްގެ ގޮތުގައާއި ޕްރެޒެންޓަރެއްގެ ގޮތުގައިވެސް ފެނިގެންގޮސްފައިވާ ފަރާތެކެވެ. ގައިސްއަކީ ތިނަދޫގައި އެމްޑީޕީގެ ހަރަކާތްތަކުގައި އިސްކޮށް އުޅުއްވި އަދި އެ ޕާޓީގެ ޓިކެޓްގައި ގދ. އަތޮޅު ކައުންސިލަށް ވެސް އިންތިހާބުވެފައިވާ ފަރާތެކެވެ.

ކޮމިޓީގެ އަޣުލަބިއްޔަތުން ފާސްވެފައިވާ ފަރާތްތައް:

1- ޝިފްލާ އިބްރާހިމް- ގ. މަސްއޮޑިގެ

2- އަހުމަދު ގައިސް- ސަނީޑޭލް/ގދ. ތިނަދޫ

3- އަލީ ޔޫސުފް- ބާރަނާ/ޅ. ހިންނަވަރު

4- އަހުމަދު ފައިރޫޒް- މއ. ރަސްއައިން

5- ސައުދާ ސަލީމް- ރަބީއުމަންޒިލް/ހއ. ހޯރަފުށި

6- އަބްދުއްލަތީފް އަހުމަދު- ދަފްތަރު ނަމްބަރު ރސ 2345

7- އިބްރާހިމް އަޝްރަފް- ވ. މަށިވެލި

8- މޫސާ ރިލްވާން- މ. ހާވިލާ

9- މުއުމިނާ އާދަމް- ގ. ހާފްސީ

10- ފާތިނާ ގާސިމް- ދަފްތަރު ނަމްބަރު 4055

11- އިސްމާއިލް ސާޖިދު- މއ. ވިލާރޮނދި

12- މުހައްމަދު ސަނޫން- ނައިޓްވިލާ/ބ. ފެހެންދޫ

ކޮމިޓީން ފޮނުވާނަންތަކަށް މަޖިލީހުގެ ތަޅުމުގައި ވޯޓަށް އަހާނީ އެލިސްޓުގެ ތަރުތީބުންނެވެ. އޭގެތެރެއިން ފުރަތަމަ ދެ ނަމަށް ވޯޓަށް އަހާ އެ ދެ ނަން ތަޅުމުން ފާސްވެއްޖެނަމަ ދެން ހުރި ނަންތަކަކަށް ވޯޓަކަށް ނާހާނެއެވެ.

ކޮމިޓީ ރިޕޯޓްގައިވާ ގޮތުން ރައީސް ފޮނުއްވާފައިވާ ނަންފުޅުތަކުގެ ތެރެއިން ގ.ލައިޝާ އިބްރާހީމް ޝަރީފް، އޭނާގެ ނަންފުޅު އަނބުރާ ގެންދަވާފައިވާކަމަށް ރައީސް އޮފީހުން ރައްޔިތުންގެ މަޖިލީހުގެ އިދާރާއަށް ލިޔުމުން އަންގާފައިވެއެވެ. މީގެއިތުރުން އިންޓަރވިއުއަށް ކޮމިޓީން ދައުވަތު އެރުވުމުން އިންޓަރވިއުއަށް ހާޒިރުވެވަޑައިނުގަންނަވާ 9 ފަރާތެއް ރިޕޯޓްގައި ފާހަގަކޮށްފައިވެ އެވެ. އަދި ތަކުރާރުކޮށް ގުޅަން މަސައްކަތްކޮށްގެންވެސް ނުގުޅުނު 4 ނަމެއްވެސް ކޮމިޓީ ރިޕޯޓްގައި ފާހަގަކޮށްފައިވެ އެވެ.

ބްރޯޑްކޮމް އަށް ދެ މެމްބަރަކު މިއައްޔަނުކުރަނީ އެކޮމިޝަނުން އިސްތިއުފާދެއްވި އެކޮމިޝަންގެ ކުރީގެ ނައިބު ރައީސް އިސްމާއީލް ސޮފްވާން އާއި އެކޮމިޝަންގެ މެމްބަރު ހަސަން ނަބާހުގެ ބަދަލުގައެވެ. މި ދެމަގާމަށް ކުރިމަތިލުމަށް ހުޅުވާލުމުން މީޑިޔާގެ ދާއިރާގައި ގިނަ އަހަރުތަކެއް ވަންދެން މަސައްކަތްކޮށްފައިވާ ގިނަ ފަރާތްތަކަކުން ވަނީ އެކަމަށް ކުރިމަތިލާފަ އެވެ.