ކުރީގެ ޕީޖީ ބިޝާމް ވަނީ މަޖިލީހުގައި އިތުރުފުޅު ހައްދަވާފަ!
30 ނޮވެމްބަރު 2019 | ހޮނިހިރު 17:46އެކެއް ފެބްރުއަރީ އަމުރު ނެރުމާއި ކުއްލި ނުރައްކަލުގެ ހާލަތު އިއުލާންކުރި ދުވަސްވަރުގައި ކުރީގެ ޕީޖީ ވަނީ ރައީސް އޮފީހަށް ވަޑައިގަންނަވާފަ
ކުރީގެ ޕީޖީ އާއިޝަތު ބިޝާމް: 1 ފެބްރުއަރީ 2018 ގައި ސުޕްރީމް ކޯޓުން ނެރުނު އަމުރާއި ކުއްލި ނުރައްކަލުގެ ހާލަތު އިއުލާން ކުރި ދުވަސްވަރު
އެކެއް ފެބްރިއަރީގެ އަމުރާ ގުޅިގެންނާއި ވަގަށްނެގުމަށްފަހު، މަރާލާފައިވާ، ނޫސްވެރިޔާ އަހުމަދު ރިލްވާން އަބްދުﷲގެ މައްސަލާގައި ކުރީގެ ޕްރޮސެކިއުޓަރ ޖެނެރަލް އާއިޝަތު ބިޝާމް ރައްޔިތުންގެ މަޖިލީހުގެ ކޮމެޓީއެއްގައި އިތުރުފުޅު ހެއްދެވިކަން ހާމަވެއްޖެ އެވެ.
ޕީޖީގެ މަގާމުން އާއިޝަތު ބިޝާމް އިސްތިއުފާ ދެއްވާފައިވަނީ މިދިއަ ބުރާސްފަތި ދުވަހު އެވެ. އިސްތިއުފާ ދެއްވާފައިވަނީ، އޭނާގެ މައްޗަށް ބޮޑެތި ތުހުމަތުތަކެއް ކުރެވި، އޭނާ މަގާމުން ވަކިކުރުމުގެ މަސައްކަތް ރައްޔިތުންގެ މަޖިލީހުގައި ކުރަމުން ދަނިކޮށް، އަދި މަޖިލީހުގެ ޖުޑީޝަރީ ކޮމެޓީއަށް ހާޒިރުވާން އަންގާފައި ވަނިކޮށް، ބުރާސްފަތި ދުވަހުގެ ހެނދުނު އެވެ.
މިހާރު ހިނގަމުންދާ 19 ވަނަ ރައްޔިތުންގެ މަޖިލީހުން ވަނީ ރާއްޖޭގެ ޖުޑީޝަރީ އިސްލާހު ކުރުމަށް މަސައްކަތްތަކެއް ފައްޓަވާފަ އެވެ. އެގޮތުން މަޖިލީހުގައި ޖުޑީޝަރީ ކޮމެޓީގެ ނަމުގައި ދާއިމީ ކޮމެޓީއެއް އެކުލަވާލާފައިވާއިރު، މީގެކުރިން އެކޮމެޓީން ބޭއްވި ބައްދަލުވުމަކަށް ޕީޖީ ބިޝާމް ކޮމެޓީއަށް ހާޒިރު ކުރައްވާފައި ވެއެވެ. އެކޮމެޓީގެ ބައްދަލުވުމަށް ވަޑައިގެން މެމްބަރުން ކުރެއްވި ބައެއް ސުވާލުތަކަށް ބިޝާމް ވަނީ ޖަވާބު ދެއްވާފަ އެވެ. ނަމަވެސް ބިޝާމް ދެއްކެވި ބައެއް ވާހަކަފުޅުތަކުގައި އިތުރުފުޅު ހައްދަވާކަން މިވަނީ ހާމަވެފަ އެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި އެކެއް ފެބްރުއަރީ 2018 ގައި ސުޕްރީމް ކޯޓުން ނެރުނު އަމުރާއި އަދި ކުއްލި ނުރައްކަލުގެ ހާލަތު އިއުލާން ކުރެއްވި ދުވަސްވަރު، އޭރު ވަނީ ރައީސް އޮފީހުން ބިޝާމް ނުކުންނަވާ ފޮޓޯއެއް ސޯޝަލް މީޑިއާގައި އާންމުވެފައި ވެއެވެ.
އެފޮޓޯ އާ ގުޅިގެން މަޖިލީހުގެ ޖުޑީޝަރީ ކޮމެޓީއަށް ބިޝާމް ހާޒިރުކުރެއް އެ ބައްދަލުވުގައި މެމްބަރަކު ކުރެއްވި ސުވާލުގެ ޖަވާބުގައި ބިޝާމް ވިދާޅުވެފައިވަނީ، ރައީސް އޮފީހަށް ވަޑައިގަންނަވަންޖެހޭ ހަމައެކަނި ބޭނުމަކަށް އޮންނަނީ ނޭޝަނަލް ޑްރަގް ކޮންޓްރޯލް ކައުންސިލްގެ ބައްދަލުވުމެއް އޮވެއްޖެ ނަމަ ކަމަށެވެ. ޕީޖީގެ ހައިސިއްޔަތުން ބިޝާމަކީ އެ ކައުންސިލްގެ މެމްބަރެކެވެ. އެކައުންސިލްގެ ބައްދަލުވުމަކަށް ނޫން ގޮތަކަށް ރައީސް އޮފީހަށް ވަޑައިގަންނަވަން ނުޖެހޭ ކަމަށްވެސް ބިޝާމް ވަނީ ވިދާޅުވެފަ އެވެ.
ނަމަވެސް، ރައްޔިތުންގެ މަޖިލީހުން ވަނީ އެ މުއްދަތުގެ ތެރޭގައި ރައީސް އޮފީހުގައި ނޭޝަނަލް ޑްރަގް ކޮންޓްރޯލް ކައުންސިލްގެ ބައްދަލުވުމެއް ބާއްވާފައިވޭތޯ ބަލާފަ އެވެ. ރައީސް އޮފީހުން ވަނީ އެ ކައުންސިލްގެ ބައްދަލުވުމެއް އެ މުއްދަތުގެ ތެރޭގައި ބާއްވާފައި ނުވާކަން ރައްޔިތުންގެ މަޖިލީހަށް ހާމަ ކޮށްދެއްވާފަ އެވެ.
މީގެއިތުރުން، ޖުޑީޝަރީ ކޮމެޓީގެ އެ ބައްދަލުވުމުގައި، ބަޔަކު މީހުން ވެގެން ވަގަށްނެގި ނޫސްވެރިޔާ ރިލްވާން އަބްދުﷲގެ މައްސަލާގައި ކްރިމިނަލް ކޯޓުން ކުރި ހުކުމް ހައިކޯޓުގައި އިސްތިއުނާފު ނުކުރެއްވީ ކީއްވެތޯ މެމްބަރަކު ކުރެއްވި ސުވާލަކާ ގުޅިގެން ބިޝާމް ވިދާޅުވެފައިވަނީ، ރިލްވާންގެ މައްސަލަ ހައިކޯޓުގައި އިސްތިއުނާފް ކޮށްފައިވާކަމަށެވެ. އަދި އެއީ މައުލޫމާތުގެ އޮޅުމެއް ކަމަށް ވެސް ބިޝާމް ވިދާޅުވެފައި ވެއެވެ.
ނަމަވެސް ޖުޑީޝަރީ ކޮމެޓީން ކްރިމިނަލް ކޯޓުގެ ރެޖިސްޓްރާއަށް ލިޔުމަކުން އެކަން ސާފުކޮށްދިނުމަށް އެދިވަޑައިގެންނެވުމުން އޭގެ ޖަވާބުގައި ކްރިމިނަލް ކޯޓުގެ ރެޖިސްޓްރާ ވިދާޅުވެފައިވަނީ ރިލްވާންގެ މައްސަލަ ހައި ކޯޓުގައި އިސްތިއުނާފް ކުރުމަށްޓަކައި ޕީޖީގެ އޮފީހުން ކްރިމިނަލް ކޯޓަށް ހުށަހަޅާފައިވާކަން ކްރިމިނަލް ކޯޓުގެ ރެކޯޑްތަކުން ނުދައްކާ ކަމަށެވެ.
ޖިނާއީ އަދުލުގެ ނިޒާމުގެ ދަށުން، ޕްރޮސެކިއުޓަރ ޖެނަރަލަކީ ޖިނާއީ ދައުވާތައް ކޯޓުތަކުގައި އުފުލާ ފަރާތެވެ. ތަހުގީގީ އިދާރާތަކުން، ތަހުގީގުކުރުމަށްފަހު، ޕީޖީގެ އޮފީހަށް ފޮނުވާ މައްސަތައް ދިރާސާ ކުރުމަށްފަހު، ދައުވާ ކުރުމާއި ނުކުރުން އޮންނަނީ ޕީޖީގެ އަތްމަތީގަ އެވެ.
ދައުލަތުގެ އެފަދަ މުހިއްމު މަގާމެއްގައި ބިޝާމް ހުންނަވައި، އަދި ކުރީގެ ރައީސް އަބްދުﷲ ޔާމީންގެ މައްޗަށް މަނީ ލޯންޑަރިންގ ދައުވާ ކްރިމިނަލް ކޯޓުގައި އުފުލުމަށްފަހު، ހުކުމް ކުރަން އޮތް ދުވަހު ބިޝާމް އިސްތިއުފާ ދެއްވި ދެއްވުމާއި، އަދި ޕީޖީގެ މަގާމުން އިސްތިއުފާ ދެއްވުމުގެ ކުރިން، ރައީސް ޔާމީންގެ މައްސަލަ ޝަރީއަތުގައި ހިނގަހިނގާ އޮތްވައި، ރައީސް ޔާމީނުގެ ގާނޫނީ ވަކީލުންނާ ބައްދަލުކުރެއްވިކަމުގެ އަޑުތަކެއްވެސް މިވަނީ ފެތުރިފަ އެވެ.
