ސިޔާސީ ޕާޓީއަކަށް ގިނަ މީހުން ސޮއިކުރި ނަމަވެސް އެމްއާރްއެމް ނުސިހޭނެ: އަލީމް
29 ނޮވެމްބަރު 2019 | ހުކުރު 13:42ޖޭޕީ ސިޔާސީ ގޮތުން ކުރިއަށްދާން މަސައްކަތް ކުރާނެ
އެމްއާރްއެމްގެ ޖަލްސާއެއްގެ ތެރެއިން
ރާއްޖޭގެ ސިޔާސީ ޕާޓީއަކަށް ކިތަންމެ ގިނަ މީހުން ސޮއިކުރި ނަމަވެސް މޯލްޑިވްސް ރިފޯރމް މޫވްމަންޓް (އެމްއާރްއެމް) ނުސިހޭނެ ކަމަށް އެޕާޓީގެ ސެކްރެޓްރީ ޖެރަނަލް އަބްދުލް ޢަލީމް ވިދާޅުވެއްޖެއެވެ.
ކުރީގެ ރައީސް ޔާމީން އަބްދުލްގައްޔޫމްއަށް ތާއީދުކުރި ގިނަ ސިޔާސީ ފަރާތްތައް ޖުމްހޫރީ ޕާޓީއަށް ސޮއިކުރަމުންދާތީވެ ފާޑު ވިދާޅުވެ ރާއްޖެޓީވީގެ ފަލަސުރުހީ ޕްރޮގްރާމްގައި އަލީމް ވިދާޅުވީ ޖޭޕީއަކީ ސިޔާސީ ޕާޓީއެއް ކަމަށާއި، ސިޔާސީ ގޮތުން ކުރިއަށްދާން ގިނަ މަސައްކަތް ކުރާނެކަން ގަބޫލުކުރާ ކަމަށެވެ.
އަލީމް ވިދާޅުވީ ސިޔާސީ ގޮތުން ބާރުވެރިކުރުމަށް ކުރާ މަސައްކަތުން ޖޭޕީން ފުރުސަތުދީ އެޕާޓީއަށް ސޮއިކުރުމަކީ މައްސަލައެއް ނޫން ކަމަށާއި، ނަމަވެސް ޖޭޕީއަކީ ސަރުކާރުގެ ކޯލިޝަންގެ ޕާޓްނަރެއް ކަމަށްވާއިރު، ސަރުކާރުގެ ކަންކަންކަމަށް އެފަދަ ފަރާތްތަކަށް ޖޭޕީ މެދުވެރިކޮށް އަތް ބޭނުމަށް މަސައްކަތް ކުރުމަކީ ބަލައިގަނެވޭނެ ކަމެއް ނޫން ކަމަށެވެ. އަދި އެފުރުސަތު އެމީހުންނަށް ޖޭޕީން ދޭނެ ކަމަށް ގަބޫލުނުރާ ކަމަށް އަލީމް ވިދާޅުވިއެވެ.
މީގެ އިތުރުން އަލީމް ވިދާޅުވީ ޖޭޕީ ނުވަތަ އެހެން ޕާޓީއެއް ބޮޑުވެގެންދާތީ އެމްއާރްއެމްއިން ކަންބޮޑުނުވާ ކަމަށާއި، އެމްއާރްއެމްއާ ގުޅޭ ރައްޔިތުންނަކީ ފައިސާ ނުވަތަ އެއްވެސް މަޖުބޫރުކަމެއްނެތި ޕާޓީއާ ގުޅިފައި ތިބި މީހުން ކަމަށާއި، އެމީހުންނަކީ ކުރީގެ ރައީސް މައުމޫން އަބްދުލްގައްޔޫމްގެ ސިޔާސަތު ގަބޫލުކުރާ މީހުން ކަމަށެވެ.
އެމްއާރްއެމްއިން އަންހެނުން ބާރުވެރިކުރުވުމަށް ގިނަ މަސައްކަތްތައް ކުރާކަން ފާހަގަކުރައްވައި އެޕާޓީގެ ނައިބް ރައީސް އައިމިނަތު ނާދިރާ ވިދާޅުވީ އެމްއާރްއެމްއަކީ އަންހެނުންނަށް ޚާއްސަކޮށް ފިރިހެނުންނާ އެއްހަމައެއްގަ މަސައްކަތްކުރެވޭނެ ގޮތަށް އަސާސީ ގަވާއިދު ލިޔެފައި އޮތް ފުރަތަމަ ޕާޓީ ކަމަށެވެ.
އެގޮތުން އެމްއާރްއެމްގެ ކައުންސިލްގައި 20 މެމްބަރުން ތިއްބަވާވާއިރު، އަންހެނުންނަށް 10 ގޮނޑި ޙާއްސަކޮށްފައިވާ ކަމަށާއި، ޕާޓީގެ އެހެން ގޮފިތަކުގައި ވެސް އަންހެނުންނަށް 50 އިންސައްތަ ދިނުމަށް ކަނޑައަޅާފައިވާ ކަމަށް ނާދިރާ ވިދާޅުވިއެވެ.
އަދި އެހެން ސިޔާސީ ޕާޓީތަކުން ވެސް އަންހެނުން ބާރުވެރިކޮށް އަންހެނުންނަށް ސިޔާސީ މައިދީނުން ފުރުސަތު ދިނުމަށް ވާހަކަ ދެކެވުނު ނަމަވެސް އަމަލީ ސިފައެއް ފެނިފައިނުވާ ކަން ނާދިރާ ފާހަގަކުރެއްވިއެވެ.
