ބެޑްމިންޓަން އަތޮޅު ލީގުގެ ޓީމް އިވެންޓްގެ ޗެމްޕިއަންކަން ހޮޅުދޫއަށް

12 ވަނަ ބެޑްމިންޓަން އަތޮޅު ލީގުގެ ޓީމު އިވެންޓްގެ ޗެމްޕިއަންކަން ނ. ހޮޅުދޫ ބެޑްމިންޓަން ޑިވެލޮޕްމަންޓް ކޮމިޓީ އިން ހޯދައިފިއެވެ.

ޓީމު އިވެންޓްގެ ޗެމްޕިއަންކަން ހޮޅުދޫއިން ހޯދީ އަންގާރަ ދުވަހު ހަވީރު ކުޅުނު ފައިނަލް މެޗުގައި އައްޑޫ ސިޓީ ވެލްތް އެންޑް ރެކްރިއޭޝަން ކްލަބާއި ވާދަކޮށް 16-9 ޕޮއިންޓް އިން މެޗު ކާމިޔާބުކޮށްގެންނެވެ.

ފައިނަލްގައި ފުރަތަމަ ސިންގަލްސް އަދި ފުރަތަމަ ޑަބަލްސް މެޗު ކާމިޔާބުކުރީ ހޮޅުދޫއިންނެވެ.ފުރަތަމަ ސިންގަލްސްގައި ހޮޅުދޫގެ މުހައްމަދު ރަވީން ވަނީ 24-22 އިން އައްޑޫ ސިޓީގެ އިބްރާހިމް ނަޝީދު ބަލިކޮށްފައެވެ. އަދި ފުރަތަމަ ޑަބަލްސްގައި ހޮޅުދޫގެ ރަވީން އާއި އިބްރާހިމް ސިރާޖުގެ ޕެއާ ބަނީ އައްޑޫ ސިޓީގެ ނަޝީދާއި އަހުމަދު ފަވާޒްގެ ޕެއާ އަތުން 2-1 ސެޓުން މޮޅުވެފައެވެ. މި މެޗުގެ ސެޓުތައް ދިޔައީ 21-12، 21-13 އަދި 21-19 އިންނެވެ.

ނަމަވެސް އައްޑޫ ސިޓީން ވަނީ ދެވަނަ ޑަބަލްސް މެޗާއި ސިންގަލްސް މެޗު ކާމިޔާބުކޮށްފައެވެ. އެހެންކަމުން މުބާރާތުގެ ޗެމްޕިއަންކަން ތިންވަނަ ޑަބަލްސް މެޗުން މޮޅުވާ ޓީމަކަށް ލިބެން އޮތްއިރު ހޮޅުދޫގެ އަޒުހާން އިޒުހާމާއި މުހައްމަދު އާމިރުގެ ޕެއާ ވަނީ އައްޑޫ ސިޓީގެ ފައްވާޒާއި އަހުމަދު ދީދީގެ ޕެއާ ސީދާ ދެ ސެޓުން ބަލިކޮށް މުބާރާތުގެ ޗެމްޕިއަންކަން ހޮޅުދޫ އަށް ހޯދައިދީފައެވެ. މި މެޗުގެ ސެޓުތައް ދިޔައީ 21-16 އަދި 21-19 އިންނެވެ.

މިއަހަރުގެ ޓީމު އިވެންޓްގެ ޗެމްޕިއަންކަން ހޮޅުދޫއިން ހޯދިއިރު އެޓީމު ވަނީ 2015 ވަނަ އަހަރުގެ މުބާރާތް ވެސް ކާމިޔާބުކޮށްފައެވެ.