ޕްރޮމޯޝަނަކާއެކު މެކްސްކޮމްއިން ވާވޭގެ ނޯވާ 5ޓީ ފޯނު ވިއްކަން ފަށައިފި

ވާވޭ ނޯވާ 5ޓީ ސީރީޒްގެ ސްމާޓް ފޯން، ވާވޭގެ ރާއްޖޭގެ ސޯލް ޑިސްޓްރިބިއުޓަރ މެކްސްކޮމް ޓެކްނޮލޮޖީއިން ބާޒާރަށް ނެރެފި އެވެ.

އަތަށް ފަސޭހަ، ޖީބަށް ލުއި މިފޯން ވިއްކަން ފެށީ އަންގާރަ ދުވަހުގެރޭ ފަރީދީ މަގުގައި ހުންނަ މަކްސްކޮމް ޓެކްނޮލޮޖީސްގެ ފިހާރައިގައި ބޭއްވި މީޑިއާ އިވެންޓްގަ އެވެ.

މިފޯނާއި ބެހޭގޮތުން އެކުންފުނީގެ ސީނިއަރ މެނޭޖަރު މުހުތާރު މުހައްމަދު ވިދާޅުވީ މި ފޯން ބާޒާރަށް ނެރުނީ ހާއްސަ ޕްރޮމޯޝަނަކާއެކު ކަމަށާއި، މިޕްރޮމޯޝަންގައި ފޯން 7299 ރުފިޔާއަށް ވިއްކާއިރު، ވާވޭ ބޭންޑް ހަތަރެއްގެ ގަޑިއެއް ހިލޭ ލިބޭނެ ކަމަށެވެ. އަދި މިޕްރޮމޯޝަން ޑިސެންބަރު މަހުގެ ނިޔަލަށް ކުރިއަށްދާނެ ކަމަށް އޭނާ ވިދާޅުވިއެވެ.

މުހުތާޒު ވިދާޅުވީ މިފޯނަކީ ދެޖިންސްގެ މީހުންނާއި ވެސް ގުޅޭނެ ކަމަށާއި، ކަޅު ދަނބު، ނޫ، އަދި ފެހި ކުލަ ލިބޭނެ ކަމަށެވެ.

ވާވޭގެ ފަހުގެ އެހެން ފޯންތަކެކޭ އެއްގޮތަށް ނޯވާ 5ޓީ ސީރީޒްގެ ފޯނުތަކުގެ ވެސް ކެމެރާ ވަރަށް ވަރުގަދަ އެވެ. ސައިޒުގައި 5.5 އިންޗީގެ މި ފޯނުގައި 8 ޖީބީ ރޭމް ހިމެނޭއިރު، ސްޓޯރޭޖްގައި 128 ޖީބީ އާއި 256 ޖީބީ ވެސް ހިމެނެ އެވެ. މިފޯނުގެ ބެޓަރި ގިނަ ވަގުތު ހިފެހެއްޓުމާއި އަވަހަށް ޗާޖުވެސްވެއެވެ.

މެކްސްކޮމް އަކީ ވާވޭ ބްރޭންޑްގެ އިތުރުން ޑެލް ބްރޭންޑްގެ ރާއްޖޭގެ ސޯލް ޑިސްޓްރިބިއުޓަރެވެ. މި ކުންފުނި ހިންގާތާ މިއީ 15 ވަނަ އަހަރެވެ.