ސެމްސަންގެ އެންމެ ފަހުގެ ފޯނު، ގެލެކްސީ އެސް22، ގެލެކްސީ އެސް22 ޕްލަސް އަދި ގެލެކްސީ އެސް 22 އަލްޓްރާގެ ޕްރީއޯޑާއަށް ވަރަށް ބޮޑު ތަރުހީބެއް ލިބެމުން އަންނަ ކަމަށް، ސެމްސަންގެ ރާއްޖޭގެ އޮތޮރައިޒްޑް ޑިސްޓްރިބިއުޓަr އަދި އޮތޮރައިޒްޑް ސާވިސް ސެންޓަރު، މެކްސްކޮމް ޓެކްނޮލޮޖީސް އިން ބުނެފިއެވެ.

އެ ކުންފުނީގެ މެނޭޖަ މާކެޓިން އެންޑް ސޭލްސް މުހައްމަދު އާތިފް ވިދާޅުވީ ޕްރީއޯޑަރު ނަގަން ފެށި ފަހުން ވޭތުވެދިޔަ މަދު ދުވަސްކޮޅުގެ ތެރޭގައި ހީކުރި ވަރަށް ވުރެ ބޮޑު ތަރުހީބެއް ލިބިފައިވާ ކަމަށެވެ.

ވަރަށް ގިނަ މީހުން.ފޯނު ގަތުމަށް ޕްރީއޯޑަރ ކޮށްފައި އެބަ ތިބިކަމަށާ އަދި މެކްސްކޮމްގެ ބައެއް އެޖެންޓުންނާއި، ފޯން ވިއްކާ ބައެެއް ފަރާތްތަކުން ވެސް ގިނަ އަދަދެއްގެ އޯޑަރު ދީފައި އެބަހުރި ކަމަށް އޭނާ ވިދާޅުވި އެވެ.

ޕްރީއޯޑަރ ފީއެއްގެ ގޮތުގައި 1000ރ. ދައްކަން ޖެހެއެވެ. ޕްރީއޯޑަރ ކުރާ މީހުންނަށް އެއް އަހަރު ދުވަހުގެ އޮފިޝަލް ވޮރަންޓީ އާއި ސްމާޓް ކަވަރެއްގެ އިތުރުން ގެލެކްސީ 2 ބަޑް ލިބޭނެ ކަމަށް މެކްސްކޮމްއިން ބުނެއެވެ.

އެސް22 ސީރީޒްގެ ފޯނުތައް ވިއްކާ އަގުތަކަކީ،

· ގެލެކްސީ އެސް22 256ޖީބީ (ފެންޓަމް ބްލެކް) - 19،500ރއަށް

· ގެލެކްސީ އެސް22 ޕްލަސް 256ޖީބީ (ބްލެކް، ގްރީން، ޕިންކް ގޯލްޑް) - 23،450ރއަށް

· ގެލެކްސީ އެސް22 އަލްޓްރާ 256ޖީބީ (ބްލެކް، ވައިޓް، ގްރީން، ބާގަންޑީ) - 28،900ރއަށް

· ގެލެކްސީ އެސް22 އަލްޓްރާ 512ޖީބީ (ބްލެކް، ވައިޓް، ގްރީން، ބާގަންޑީ) - 32،500ރ އަށެވެ.

މި ފޯނުތައް ބީއެމްއެލް އިސްލާމިކް، ބީއެމްއެލް އީޒީ ޕޭ، އެމްއެފްއެލްސީ، އަދި އިސްލާމިކް ބޭންކްގެ އިތުރުން އެހެނިހެން އިންސްޓޯލްމަންޓް ސްކީމްތައް މެދުވެރިކޮށް ވެސް ނެގޭނެއެވެ.

ޕްރީއޯޑާ ކުރި ފަރާތްތަކަށް އަދި އާންމުކޮށް ވެސް މި މަހުގެ މެދުތެރެއިން ފެށިގެން ފޯން ލިބޭނެ ކަމަށް މެކްސްކޮމްއިން މައުލޫމާތު ދީފައިވެއެވެ.