އައްޑޫ ސިޓީގައި އަޅަމުންދަނީ މިލިޓަރީ ބޭސް އެއް ހިންގުމަށް އަޅާ އިމާރާތެއްތޯ ސާފުކުރުމަށް ހޯމް މިނިސްޓަރު މަޖިލީހަށް ހާޒިރުކުރަނީ

އައްޑޫ ސިޓީގައި ހަދަމުންދާ އިމާރާތަކީ މިލިޓަރީ ބޭސްއެއް ހިންގުމަށް އަޅާ އިމާރާތެއްތޯ ސާފުކުރުމަށް ހޯމް މިނިސްޓަރ އައްޝެއިހު އިމްރާން އަބްދުﷲ އާ ސުވާލުކުރުމަށް އެޖެންޑާކޮށްފިއެވެ.

މާދަމާގެ ޖަލްސާގައި މިސުވާލު އެޖެންޑާކޮށްފައިވާއިރު މިސުވާލު މިނިސްޓަރާ ކުރައްވަނީ ފޭދޫ ދާއިރާގެ މެމްބަރު މުހައްމަދު ނިހާދެވެ.

ނިހާދު ސުވާލުކުރައްވަނީ އައްޑޫ ސިޓީ ހިތަދޫގެ އެންމެ އަގު ބޮޑު ބިމުގެ 1 ކިލޯމީޓަރަށްވުރެ ދިގު ބިމުގައި ހަދަމުންދާ އިމާރާތަކީ އިންޑިޔާގެ މިލިޓަރީ ބޭސްއެއް ހިންގުމަށްޓަކައި އިމާރާތްކުރާ ބިމެއްކަމުގެ ޚަބަރު ފެތުރެމުންދާކަަމަށާއި އެބިމަކީ ކޮންފަރާތަކުން ދޫކޮށްފައިވާ ބިމެއްތޯ އެވެ. އަދި އެތަނުގައި އިމާރާތްކުރުމުގެ މަސައްކަތް ކުރަމުންދަނީ ކޮންފަރާތަކުންތޯ އާއި އެއިމާރާތާ ގުޅޭގޮތުން ވެފައިވާ އެއްބަސްވުމުގެ ތަފްސީލު ސާފުކުރެއްވުމަށްވެސް ނިހާދު ވަނީ ހުށަހަޅުއްވާފަ އެވެ.

މީގެއިތުރުން މާދަމާގެ ޖަލްސާއަށް ވަނީ ރަހުމުކުޑަގޮތަކަށް މަރާލާފައިވާ ދީނީ އިލްމްވެރިޔާ އަދި ރައްޔިތުންގެ މަޖިލީހުގެ އުނގޫފާރު ދައިރާގެ ކުރީގެ މެންބަރު ޑރ. އަފްރާޝީމް އަލީ ގެ މަރުގެ މައްސަލައިގެ ރިޕޯޓު ރައްޔިތުންގެ މަޖިލީހުގެ ސަލާމަތީ ޚިދުމަތްތަކާއި ބެހޭ ކޮމިޓީ (241) ކޮމެޓީން ދިރާސާކޮށް ނިންމި ގޮތުގެ ރިޕޯޓު އެޖެންޑާ ކޮށްފައެވެ.

މީގެ އިތުރުން ކޮމިޓީ ތަކުން ހުށަހަޅާ ކަންތައް ތަކުގެ ތެރޭގައި ހިއުމަން ރައިޓްސް ކޮމިޝަން އޮފް ދަ މޯލްޑިވްސްގެ ބާރު، ދިވެހިރާއްޖޭގެ ސުޕްރީމް ކޯޓުން ނިގުޅައިގެންފައިވާތީ ހުށަހަޅުއްވާ ފައިވާ ޤަރާރާއި ގުޅޭ މައްސަލަ ދިރާސާކުރުމަށްފަހު ޖުޑީޝަރީ ކޮމިޓީން ނިންމިގޮތުގެ ރިޕޯޓް ހުށަހެޅުމަށްވެސް ވަނީ އެޖެންޑާކޮށްފަ އެވެ.