މިފެންނަ ކަންކަމަކީ ހަރުކަށި، ދީނީ ފިކުރެއް ނޫން ކަމަށާއި އެއީ "ޖަންގަލީ"ގެ އުސޫލު ކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއީލު އަޙްމަދު ނަސީމް ވިދާޅުވެއްޖެއެވެ.
ހަނގުރާމަވެރި ޖަމާޢަތުގެ މީހުން ކަމަށް ބެލެވޭ ބަޔަކު ށ. މާއުނގޫދޫއަށް އެރުމާއި 13 އަހަރުގެ ކުއްޖަކު ޤަވާއިދާ ޚިލާފަށް ކައިވެނި ކޮށްގެން އުޅޭ މައްސަލަ އާއި ގުޅިގެން މަޖިލީހަށް ހުށަހެޅުނު ކުއްލި މައްސަލައަށް ބަހުސްކުރައްވަމުން މީކާއީލު ވިދާޅުވީ މިއަދު ފެނިގެން މިދަނީ އިލްމީ ގޮތުން ޚިޔާލެއް ފާޅުކޮށްލާއިރަށް ލޭ ހުއްދަ ކުރާތަން ކަމަށެވެ. މީކާއިލް ވިދާޅުވީ ދިވެހި ރާއްޖޭގައި ޤާއިމުވެފައި އޮތް އިސްލާމީ ހަޟާރާތް ނައްތާލާ މިތާގައި ޖާހިލު އުސޫލު ޤާއިމު ކުރުމަށްޓަކައި ބަޔަކު މީހުން ރާވައިގެން އިންތިޒާމުކޮށްގެން ކުރާ ކަމެއް ކަމަށެވެ. އަދި އެފަދަ ކަންކަމަކަށް ޖާގައެއް ނުދެވޭނެ ކަމަށް މީކާއިލް ވިދާޅުވިއެވެ.
" އަޅުގަނޑު އެއްވެސް ގޮތަކަށް ގަބޫލެއް ނުކުރަން މީކީއެއް ހަރުކަށި ދީނީ ފިކުރެއް ކަމަކަށް. މިކަމުގައި ދީނީ އެއްވެސް ކަމެއް ނެތް، އަދި ހަރުކަށި އެއްވެސް ކަމެއް ނެތް. އިއްޒަތްތެރި ރައީސް، ކޮން ހަރުކަށްޓެއްތޯ؟ މީހުން މެރުން، މިއީ ހަރުކަށިވެގެން މީހުން ކުރާ ކަންތައްތައްތޯ؟ ތިޖޫރީ ވަގަށް ނެގުން، މިއީ ހަރުކަށިވެގެން ދީނީ ގޮތުން މީހަކު ކުރާނެ ކަމެއްތޯ؟ މިއަކު ނެތް ހަރުކަށި ކަމެއް. މިއަކު ނެތް ދީނީ ކަމެއް. މިއީ ޖަންގަލީގެ އުސޫލު. މިއީ ޖާހިލިއްޔަތުގެ އުސޫލު.ގަލޮޅު ދެކުނު ދާއިރާގެ މެމްބަރު މީކާއީލު އަޙްމަދު ނަސީމް
މެމްބަރު މީކާއިލް މިހެން ވިދާޅުވެފައިވާއިރު ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވިދާޅުވީ ސައުތު އީސްޓް އޭޝިއާއަށް އައިސިސް އަތްގަދަކުރުމަށް މަސައްކަތްކުރަނީ ސީރިއާގައި އައިސިސް ފަތަހަ ކުރެވުމުން ކަމަށެވެ. އިވާ ވިދާޅުވީ މި ޤައުމު މިއޮތީ ހަނގުރާމައިގެ ތުންފަތުގައި ކަމަށެވެ. އީވާ ވިދާޅުވީ މި ދިވެހި ޤައުމު އޮތީ ހަގުރާމައިގެ ތުންފަތް މަތީގައި ކަން ރައްޔިތުންނަށް އޮޅިގެނެއް ނުވާނެ ކަމަށެވެ. އީވާ ވަނީ ވަގުތުން ވަގުތަށް އެ ފަދަ ކަންތައްތައް ކުރަމުންދާ ފަރާތްތަކަށް ހަރުކަށި ފިޔަވަޅުއެޅުމަށް ގޮވާލާފައެވެ.
ރައްޔިތުން މަޖިލީހުން އަޅުގަނޑުމެން މިއޮތީ ބޭނުންހާ ގާނޫނެއް ފާސްކޮށްފައި، ސަރުކާރުން މިހާރު މި މީހުން އެބަ ހައްޔަރު ކުރެވެން އެބަޖެހޭ. އެ 13 އަހަރުގެ ކުއްޖާއަށް ޖިންސީ ގޯނާ ކުރަމުން ގެންދިޔަ މީހުންނާއި އަދި އެކުއްޖާ، ފިރިހެނެއްގެ ޖާރިޔާއެއްގެ ގޮތުގައި ދޫކޮށްލި އޭނާގެ މައިންބަފައިންވީ ކިހިނެއްތޯ އާއި، އެއީ އެމީހުން ދޫކޮށްލައިގެން ހިނގިކަމެއްތޯ އާއި، އިއްޒަތްތެރި ރައީސް މި ދޯނީގައި ބައިއަތު ނުހިފީއޭ މިބުނަނީ އަނެއްކާ ކޮންކަހަލަ ކަމެއްގަތޯއާއި، އިއްޒަތްތެރި ރައީސް މިއީ ހަމަ އެއް ބަޔަކު އިންތިޒާމް ވެގެން ހިންގާ ކަންކަން ކަން އަޅުގަނޑުމެން ލޯ ހުޅުވައިގެން ތިބެ ދެނެހުރެގެން ސަރުކާރުން މިހާރުން މިހާރަށްވެސް މި އެންމެނަށް އެބަ ހަރުކަށި ފިޔަވަޅު އަޅަން ޖެހޭ.ގަލޮޅު އުތުރު ދާއިރާގެ މެމްބަރު އީވާ އަބްދުﷲ
ކުއްލި މައްސަލައަށް ބަހުސް ކުރައްވަމުން ސަރުކާރު ހިންގާ މައިޕާޓީ، އެމްޑީޕީގެ ޕާލަމެންޓަރީ ގްރޫޕް ލީޑަރު އަދި މެދު ހެންވޭރު ދާއިރާގެ މެމްބަރު އަލީ އާޒިމް ވިދާޅުވީ ދިވެހިން ހަނގުރާމައަށް ފޮނުވުމާއި ކުއްލި މައްސަލައިގައި އަލި އަޅުވާލާފައިވާ ކަންކަމުގެ ވާހަކަ ދައްކަނީ ދީނީ ވިސްނުމެއްގައި ނޫން ކަމަށެވެ.
ދިވެހި ޒުވާނުންނަށް ނަސޭހަތްލާދެނީ އެހެންބައެއްގެ ދާޚިލީ ހަނގުރާމައަށް ގޮސް، ކުރަން. ކިތައް މީހުންތޯ މަރުވެގެންއެދަނީ. ކިތައް ޒުވާނުންތޯ؟ ކިތައް އާއިލާތޯ ނެތިމިދަނީ؟ އެހެންވީމަ މިވާހަކަތައް މިތާ އެބަ ދައްކަން ޖެހޭ. ދީނީ ވިސްނުމަކު ނޫން މިވާހަކަ ދައްކަނީ.މެދު ހެންވޭރު ދާއިރާގެ މެމްބަރު އަލީ އާޒިމް
މެމްބަރު ވިދާޅުވީ މިއަދު މިވާހަތައް ދައްކަން ޖެހެނީ ޤާނޫނާއި ޤަވާއިދާ ޤާނޫނޫ އަސާސީން ކަނޑައެޅިގެން މަނާކޮށްފައި އޮތް ކަންކަން ރާއްޖޭގައި ހިނގަމުން ދާތީ ކަމަށެވެ. އަދި އެކަންކަން ނުހުއްޓުވައިފި ނަމަ އައިސިސްގެ ވަރު ދައްކާލާނެ ކަމަށެވެ. އަދި ފެނިގެންމިދަނީ އެ ކަންކަން ކަމަށް އާޒިމް ވިދާޅުވިއެވެ. މެމްބަރު ވިދާޅުވީ އެފަދަ އަމަލުތައް ހުއްޓުވުމަށް ބޭނުން ޤަވާއިދެއް ހެދުމަށް ތައްޔާރަށް ހުންނެވި ކަމަށެވެ.
ކުއްލި މައްސަލައިގައި ވަނީ މީހުން މަރާ، އެހެނިހެން ޖަރީމާތައް ހިންގާ ސެލްއެއް ކަމަށް ބެލެވޭ ބަޔަކު ށ. މާއުނގޫދޫއަށް އަރާ، އެރަށް ފަތަހަ ކުރި ކަމުގެ އަމަލުތައް ހިންގާ، އަދި އެރަށުގެ އެތަންމިތަނުގައި އައިސިސްގެ ނިޝާނާއި ލޯގޯ ރަށުގެ އެކި ސަރަހައްދުތަކުގައި ހަރުކޮށް، ރައްޔިތުންނަށް ބިރުވެރިކަން ފަތުރާފައިވާކަމަށެވެ.
ދާދި ފަހުން ލަނޑާ ނެގުމުގެ މަސައްކަތްކުރާ ދޯނީގައި އުޅުނު ރ. މަޑުއްވަރީ މީހަކަށް އަނިޔާކޮށް ކަނޑަށް އެއްލާލި މައްސަލައާއި ގުޅިގެން ފެންމަތިވި، އުމުރުން 13 އަހަރުގެ ކުއްޖަކު ޤަވާއިދާ ޚިލާފަށް ކައިވެނި ކޮށްގެން އުޅޭ މައްސަލައާއި ގުޅިގެން ކުއްލި މައްސަލައިގައި ވަނީ ކުޑަކުދިންނަކީ ސިއްހީ ގޮތުންނާއި ނަފްސާނީ ގޮތުން ބޮޑެތި މީހުންނާއި އެއް މިންވަރަށް ހެދި ބޮޑުވެފައިވާ ބައެއް ނޫން ކަމަށެވެ. އަދި އެ ކުދިންނަކީ އާއިލާގެ ފަރާތުންނާއި ޖަމާޢަތުގެ ފަރާތުންނާއި ދައުލަތުގެ ފަރާތުން ޚާއްސަ އެހީތެރިކަމާއި ޚާއްސަ ރައްކާތެރިކަމެއް ލިބިދޭންޖެހޭ ބައެއް ކަމުގައި ޤާނޫނު އަސާސީގައި ކަނޑައެޅިފައިވީނަމަވެސް ކުޑަކުދިންގެ ނާޖާއިޒު މަންފާ ނަގާ އެކުދިންނާއި ޖިންސީ ގޮތުން ގުޅުން އުފައްދާ ނުރައްކަލުގެ ތެރެއަށް ކުޑަކުދިން ހުށަހެޅުމުގެ އަމަލުތައް ފެތުރިފައިވާ ކަމަށް ވެސް ކުއްލި މައްސަލައިގައި ވެއެވެ.
