ކޮމިޓީތަކުން ޑްރާފްޓް ކުރަމުންދާ 6 ބިލެއްގެ މަސައްކަތް މުޅިންހެން ވަނީ ނިމިފައި
25 ނޮވެމްބަރު 2019 | ހޯމަ 08:49ރައީސް ނަޝީދު ވިދާޅުވީ މިދައުރުގައި އަމާޒުހިފީ 10 ބިލެއްގެ މަސައްކަތް ކުރުމަށް ކަމަށް
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ރައްޔިތުންގެ މަޖިލީހުގެ ކޮމިޓީތަކުން މިހާރު ޑްރާފްޓް ކުރަމުންދާ ބިލުތަކުގެ ތެރެއިން 6 ބިލެއްގެ މަސައްކަތް މިހާރު މުޅިންހެން ނިމިފައިވާކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.
ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާގައި ރައީސް ނަޝީދު ވިދާޅުވީ މިދައުރުގައި އަމާޒު ހިފީ 10 ބިލެއްގެ މަސައްކަތް ކުރުމަށް ކަމަށެވެ. މީގެތެރެއިން 6 ބިލެއްގެ މަސައްކަތް ދައުރު ނިމެން އަންނައިރު މުޅިންހެން ނިމިފައިވާކަމަށް ރައީސް ނަޝީދު ވިދާޅުވި އެވެ.
މަޖިލީހުން ސީދާ ބިލުތައް ޑްރާފްޓް ކުރުމުގެ މަސައްކަތް ފަށާފައިވަނީ މިދައުރުގެ ޖަލްސާތައް ފެށުމާއެކު އެވެ. އެއާއެކު ސަރުކާރާއި ރައްޔިތުންގެ މަޖިލީހުގެ ރައީސް އާ ދެމެދު ބަހުގެ ހަމަލާތަކެއް ބަދަލުކުރެވިގެން ދިޔަތަން ވަނީ ފެނިގެންގޮސްފަ އެވެ. އެގޮތުން ބަންޑާރަ ނައިބާއި، ދައުލަތުގެ ބައެއް ވަޒީރުން ވެސް ވަނީ އެކަމާ ކަންބޮޑުވުން ފާޅުކުރައްވާފަ އެވެ. މީގެކުރިން މިމަސައްކަތަކީ ބަންޑާރަ ނައިބުގެ އޮފީހުން ކުރަމުން އައި މަސައްކަތެކެވެ.
އެކަމަށް ރައްދުދެއްވާ ރައްޔިތުންގެ މަޖިލީހުގެ ޖަލްސާގައި މީގެކުރިން ރައީސް ނަޝީދު ވިދާޅުވީ ޤާނޫނުތައް ހެދުމަށް ކުރަން ޖެހޭ އެންމެހާ މަސައްކަތެއް މަޖިލީހުގެ ތެރެއިން ކުރުމުގައި އެއްވެސް ހުރަހެއް ނެތްކަމަށެވެ. އެއީ ޤނޫނު އަސާސީއިން މަޖިލީހަށް ލިބިދީފައިވާ ބާރެއްކަމަށް ރައީސް ނަޝީދު ވަނީ ވިދާޅުވެފަ އެވެ.
ރައީސް ނަޝީދު ހޯމަ ދުވަހު ބޭއްވި ޖަލްސާގައި ވާހަކަ ދައްކަވަމުން ވިދާޅުވީ ބިލުތައް ޑްރާފްޓުކުރުމަށްފަހު އެބިލުތައް ސަރުކާރުގެ ފަރާތުން ހުށަހަޅާ ބިލެއްގެ ގޮތުގައި ހުށަހެޅުމުގެ ފުރުސަތުވެސް ލިބިގެންދާނެ ކަމަށެވެ.
