އަމިއްލަ ޝުއޫރުތައް އެއްކިބާކޮށް، ހަމަހަމަ ކަމާއި އެކީ ރައްޔިތުންނަށް ޚިދުމަތްކޮށްދޭން ޖެހޭ ކަމަށް މިނިސްޓަރ އޮފް ޑިފެންސް މާރިޔާ އަހްމަދު ދީދީ ވިދާޅުވެއްޖެއެވެ.
މިނިސްޓަރ ވިދާޅުވީ ކޮންމެ މީހަކު ކޮންމެ ގޮތަކަށް އަމަލު ކުރި ނަމަވެސް ފުލުހުން އެ މީހުންނާއި ކުރިމަތިލާއިރު، ކުރިމަތިލާން ޖެހޭނީ އިހުތިރާމާއި އެކު ކަމަށެވެ.
މާރިޔާ ވިދާޅުވީ ފުލުހުން ކުރާ މަސައްކަތުގެ ބުރަކަން އިހުސާސު ކުރެވޭ ކަމަށާއި އަބަދުވެސް ގާނޫނު އަސާސީ މަތިން ހަނދާން ކުރަން ޖެހޭ ކަމަށެވެ. އެގޮތުން ފުލުހުން ތިބެން ޖެހޭނީ އާންމު ރައްޔިތުންނަށް ވުރެ ބޮޑަށް ސުލޫކީ ގޮތުން މަތީ ދަރަޖައެއްގައި ކަމަށެވެ. އަދި ފުލުހުންގެ އަމަލުތައް ހުންނަންވާނީ ރައްޔިތުންނަށް ނަމޫނާއެއްގެ ގޮތުގައި ކަމަށް ވެސް ވިދާޅުވިއެވެ.
މިނިސްޓަރ ވިދާޅުވީ ފުލުހުންގެ މަސައްކަތުގައި ކޮންމެ ދުވަހަކު އާ ކަންތައްތަކަކާއި ކުރިމަތި ވާނެ ކަމަށެވެ. ޒަމާން ތަރައްގީވެ ކުރި އަރާ ވަރަކަށް ކުށްތަކުގެ އަދަދުވެސް އިތުރުވާކަން ފާހަގަކޮށް މިނިސްޓަރ ވިދާޅުވީ އެގޮންޖެހުންތައް ނައްތާލުމަށް ރާއްޖޭގެ ސަލާމަތީ ބާރާއި ފުލުހުންނާއި ގުޅިގެން މަސައްކަތްކުރައްވަމުން ގެންދަވާ ކަމަށެވެ.
އެގޮތުން ރާއްޖޭގައި ކުށް މަދުކުރުމަކީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ވައުދުފުޅެއް ކަމަށާއި އެހެން އަހަރުތަކާއި އަޅާބަލާއިރު، މީހުންނާއި ދޭތެރޭ ކުރެވޭ ކުށްތައް، ޚާއްސަކޯށް އަނިޔާވެރިކޮށް މީހުން މެރުން ފަދަ ކުށްތައް މިއަހަރު ނޫސްތަކުގައި ރިޕޯޓު ކުރެވިފައި ނެތުމަކީ ފުލުހުންނަށް ލިބިގެންދިޔަ ވަރަށް ބޮޑު ކުރިއެރުމެއް ކަމަށް މިނިސްޓަރ ވިދާޅުވިއެވެ. އަދި މިނިސްޓަރ ވަނީ ފުލުހުން ކުރާ އަގުހުރި މަސައްކަތަށް މަރުހަބާ ދަންނަވާ ޝުކުރު އަދާ ކުރައްވާފައެވެ.
