ތައުލީމާއި ތަމްރީނުތަކުގައި ބައިވެރިވުމުގެ ފުރުސަތު ފަނޑިޔާރުންނަށް ފުޅާދާއިރާއެއްގައި ހުޅުވާލަނީ!
އެހެން ފަނޑިޔާރުންނެކޭ އެއްފަދައިން މެޖިސްޓްރޭޓުންނަށްވެސް ފޯން އެލަވަން ދިނުމަށް ނިންމާފައިވޭ
ޖޭއެސްސީގެ ބައެއް މެމްބަރުން-
ތައުލީމާއި ތަމްރީން ޕްރޮގްރާމްތަކުގައި ބައިވެރިވެވޭނެ ފުރުސަތު ފަނޑިޔާރުންނަށް ވީހާވެސް ފުޅާކޮށް، ހުޅުވާލުމަށްޓަކައި ހަރުދަނާ ސިޔާސަތުތަކެއް އެކުލަވާލުމުގެ މަސައްކަތް ފަށައިފި އެވެ.
ޖުޑީޝަލް ސަރވިސް ކޮމިޝަން (ޖޭއެސްސީ)ގެ ތާރީޚުގައި ފުރަތަމަ ފަހަރަށް އަތޮޅުތެރޭގައި ބޭއްވުނު އެކޮމިޝަނުގެ ބައްދަލުވުން އާދިއްތަ ދުވަހު ލ. ފޮނަދޫ ގައި ބާއްވާފައިވާއިރު، އެ ބައްދަލުވުމުގައި ދެކަމެއް ނިންމާފައި ވެއެވެ.
އެގޮތުން، ތައުލީމާއި ތަމްރީނު ޕްރޮގުރާމުތަކުގައި ބައިވެރިވެވޭނެ ފުރުސަތު ފަނޑިޔާރުންނަށް ވީހާވެސް ފުޅާކޮށް ހުޅުވާލުމަށްޓަކައި ހަރުދަނާ ސިޔާސަތެއް އެކުލަވާލައި އާންމުކުރުމަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)ގައި ދެންނެވުމަށް ނިންމާފައި ވެއެވެ. އެގޮތުން ސިޔާސަތު އެކުލަވާލުމުގައި، ދައުލަތުގެ ޚަރަދުގައި އަދި ފަނޑިޔާރުންގެ އަމިއްލަ ޚަރަދުގައި މިފަދަ ޕްރޮގުރާމުތަކުގައި ބައިވެރިވެވޭނެ ގޮތާއި، މާލީ ގޮތުން ލުއި އަދި ފަހި ސްކީމްތަކެއް ތައާރަފުކުރުމާއި، ތައުލީމާއި ތަމްރީނުތަކުގައި ބައިވެރިވުމަށް ބާރުއެޅޭގޮތަށް އެ ސިޔާސަތު ބައްޓަންކުރުމުގެ މުހިއްމުކަމުގެ މައްޗަށް ވެސް ޖޭއެސްސީގެ އެބައްދަލުވުމުގައި މެމްބަރުން ޝުއޫރު ފާޅުކުރައްވާފައި ވެއެވެ.
ޖޭއެސްސީގެ މި ބައްދަލުވުމުގައި ދެވަނަ ކަމަކަށް ނިންމާފައިވަނީ، އެހެން ފަނޑިޔާރުންނެކޭ އެއްފަދައިން މެޖިސްޓްރޭޓުންނަށް ވެސް ފޯނު އެލަވަންސް ދޭންޖެހޭ ކަމަށް ކޮމިޝަނަށް ގަބޫލުކުރެވޭތީ، މެޖިސްޓްރޭޓުންނަށް ދޭ ފޯނު އެލަވަންސްގެ ގޮތުގައި މަހަކު 500ރ ހަމަޖައްސާ ދިނުމަށް ރައްޔިތުންގެ މަޖިލީހުގައި ދެންނެވުމަށެވެ.
ޖޭއެސްސީގެ މެމްބަރުން މިހާރު ލ. އަތޮޅަށް ކުރައްވާ އެދަތުރަކީ، ދާދިފަހުން ރައްޔިތުންގެ މަޖިލީހުން ފާސްކޮށް، ރައީސުލްޖުމްހޫރިއްޔާ ތަސްދީގު ކުރައްވާފައިވާ ކުޑަކުދިންގެ ހައްގުތައް ރައްކާތެރި ކުމުރުމާއި ކުޑަކުދިންގެ އަދުލުގެ ނިޒާމާބެހޭ، އެ ދެ ޤާނޫނަށް ފަނޑިޔާރުންނާއި ކަމާބެހޭ އިދާރާތަކުގެ ބޭފުޅުން އަހުލުވެރި ކުރުވުމަށް ސެމިނަރއެއް ބޭއްވުމަށް ކުރައްވާ ދަތުރުފުޅެކެވެ.
މިހާރު ހިނގަމުންދާ 19 ވަނަ ރައްޔިތުންގެ މަޖިލީހާއި ސަރުކާރުން ދަނީ ޖުޑީޝަރީ އިސްލާހު ކުރުމަށްޓަކައި ގިނަ މަސައްކަތްތަކެއް ކުރަމުންނެވެ. އެގޮތުން ޖޭއެސްސީގެ ގާނޫނަށް ބޮޑެތި ބަދަލުތަކެއް ގެނެސް، ކުރިން ސުޕްރީމް ކޯޓަށް ނަގާފައިވާ އެކޮމިޝަންގެ ބާރުތައް ވަނީ ފަހުން އިސްލާހު ގެނައި ޖޭއެސްސީގެ ޤާނޫނުގައި ހިމަނާފަ އެވެ.
