ގުޅީފަޅު ތައްރައްގީކުރުން: ޖީޕީޑީއާއެކު ވެފައިވާ އެއްބަސްވުން ބާތިލު ކުރުމަކީ ސަރުކާރަށް ޖެހުނު ބޮޑު ބުރައެއް!
23 ނޮވެމްބަރު 2019 | ހޮނިހިރު 14:49ފްލެޓްތަކުގެ މަސައްކަތް އޮތީ ހުއްޓިފައި
ގުޅީފަޅު ތަރައްގީގެ ޕްރޮޖެކްޓްގެ ދަށުން އިމާރާތްކޮށްފައިވާ ފްލެޓްތަކެއް
ކުރީގެ ރައީސް އަބްދުﷲ ޔާމިނުގެ ސަރުކާރުގައި ގުޅީފަޅު ތަރައްޤީ ކުރަމުންއައި ގްލޯބަލް ޕްރޮޖެކްޓް ޑިވެލޮޕްމަންޓް ޕްރައިވެޓް ލިމިޓެޑް (ޖީޕީޑީ) އާއެކު ވެފައިވާ އެއްބަސްވުން ބާޠިލު ކުރުމަކީ މިހާރުގެ ސަރުކާރަށް ޖެހިފައި އޮތް އެންމެ ބޮޑު ބުރަ ކަމަށް ގްރޭޓަރ މާލޭ އިންޑަސްޓްރިއަލް ޒޯން ލިމިޓެޑް (ޖީ.އެމް.އައި.ޒެޑް.އެލް.) ގެ މެނޭޖިންގ ޑިރެކްޓަރ އިބްރާހީމް ރަޝީދު އަބޫބަކުރު (އިބޫ) ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމުގައި އިބޫ ވިދާޅުވީ ގުޅީފަޅުގައި އިމަރާތް ކުރި ފްލެޓްތަކުގެ މަސައްކަތް ހުއްޓިފައި އޮތީ ކުރީގެ ރައީސް ޔާމީނުގެ ވެރިކަމުގައި ޖީޕީޑީއާއެކު ހަދާފައިވާ އެއްބަސްވުން ބާތިލު ކުރި ހިސާބުން ކަމަށާއި، އެ އެއްބަސްވުން ބާތިލުކުރުމުގެ ކުރިން ސިންގަޕޫރުގެ ލޯރ ފާމަކުން ލަފާ ހޯއްދަވާ، އެބާތިލު ނުކުރުމަށް ލަފާދިން ނަމަވެސް އޭރުގެ ސަރުކާރުން ބޭނުންވާ ގޮތަށް ކަންތައްތައް ނިންމާލީ ކަމަށެވެ. އަދި އެއީ އެސަރުކާރުން ކުރި ވަރަށް ދެރަ ކަމެއް ކަމަށާއި، ހުރިހާ ދެރައެއް ލިބިގެންދިޔައީ ރައްޔިތުންނަށްކަން އިބޫ ފާހަގަކުރެއްވިއެވެ.
އިބޫ ވިދާޅުވީ ގުޅީފަޅު ތަރައްޤީ ކުރުމުގެ މަސައްކަތް ކުރިއަށް ގެންދާއިރު، މިސަރުކާރަށް ޖެހިފައި އޮތް އެންމެ ބޮޑު ބުރައަކީ ޖީޕީޑީއާއެކު ހަދާފައިވާ އެއްބަސްވުން ބާތިލު ކުރުން ކަމަށެވެ. އަދި ވިދާޅުވީ އެކުންފުނިން މިއަދު 200 ނުވަތަ 300 މިލިއަން ޑޮލަރުގެ ބަދަލެއް ހޯދުމަށް މަސައްކަތް ކުރަމުން އަންނަ ކަމަށެވެ.
އިބޫ ވިދާޅުވީ ގުޅީފަޅު ތަރައްޤީ ކުރާއިރު، އެރަށް ވެސް ވެގެންދާނީ ތިލަފުށްޓާއެކު ގުޅިފައި އޮންނަ އެއްރަށެއްގެ ގޮތުގައި ކަމަށެވެ.
ގުޅީފަޅަކީ 2010 ވަނަ އަހަރު އިންޑިއާގެ ގްލޯބަލް ޕްރޮޖެކްޓްސް ޑިވެލޮޕްމަންޓް (ޖީޑީޕީ) ކުންފުންޏާއި ހަވާލުކޮށްގެން ހިއްކައިގެން، އެއަށް ފަހު މީހުން ދިރުއުޅުމަށް ތަރައްޤީ ކުރަމުން އައި ރަށެކެވެ. އެހެން ނަމަވެސް އެރަށް ތަރައްޤީ ނުކުރާ ކަމަށް ބުނެ، ރައީސް ޔާމީނުގެ ސަރުކާރުން އެއްބަސްވުން ބާތިލުކުރީ 2016 ވަނަ އަހަރުގެ ފެބްރުއަރީމަހުގެ 06 ވަނަ ދުވަހުއެވެ.
