ކުރިޔަށް އޮތް 3 ދުވަހުވެސް މޫސުން ގޯސްވާނެ: މެޓް އޮފީސް
23 ނޮވެމްބަރު 2019 | ހޮނިހިރު 08:51މޫސުން ގޯސްވެފައިވަނީ ރާއްޖެ ސަރަހައްދުގައި އުފެދިފައި ލޯ ޓްރަފެއްގެ ސަބަބުން
މާލެއަށް ބޯކޮށް ވާރޭވެހުން
ކުރިޔަށް އޮތް 3 ދުވަހުވެސް ރާއްޖޭގެ އެކި ސަރަހައްދުތަކަށް މޫސުން ގޯސްވާނެކަމަށް މޫސުމާއި ބެހޭ ޤައުމީ އިދާރާއިން ބުނެފިއެވެ.
ރާއްޖެއެމްވީއަށް މައުލޫމާތު ދެއްވަމުން މެޓް އޮފީހުން ބުނެފައިވަނީ މިހާރު ކުރަމުން މިދާ ވިއްސާރައަކީ ރާއްޖޭގެ ސަރަހައްދުގައި އުފެދިފައިވާ ލޯ ޓްރަފަކާއި ގުޅިގެން ކުރަމުންދާ ވިއްސާރައެއްކަމަށާއި، ކުރިޔަށް އޮތް 3 ދުވަހުވެސް ރާއްޖޭގެ އެކި ކަންކޮޅުތަކަށް މޫސުން ގޯސްވުން އެކަށިގެންވާކަމަށެވެ. މޫސުމާއި ބެހޭ ގައުމި އިދާރާއިން ބުނެފައިވަނީ އަބަދުވެސް ރާއްޖެ ސަރަހައްދުގައި ކޮންމެވެސް ވަރަކަށް ޓްރަފް އުފެދިފައި ހުންނަކަމަށެވެ.
ބޮޑަށް ވިއްސާރަކުރާނެކަމަށް ލަފާކުރެވެނީ އުތުރާއި މެދުތެރޭގެ އަތޮޅުތަކަށްކަން ފާހަގަކޮށް މޫސުމާއިބެެހޭ އިދާރާއިން ބުނެފައިވަނީ، އެ ސަރަހައްދުތަކަށް ގުގުރުމާއިއެކު ވިއްސާރަކުރާނެކަމަށާއި ބައެއް ރަށްތަކަށް ބޯކޮށް ވާރޭވެހުން އެކަށީގެންވާކަމަށެވެ. އަދި ދެކުނުގެ އަތޮޅުތަކަށް ކެރީގެ އަސަރުފޯރާނެކަމަށެވެ.
އިރުއުތުރާއި އިރުން، ދެކުނުގެ އަތޮޅުތަކަށް ގަޑިއަކު 5 މޭލާއި 15މޭލާ ދެމެދުގެ ބާރުމިނުގައި، އެހެން ހިސާބުތަކަށް ގަޑިއަކު 8 މޭލާއި 18މޭލާ ދެމެދުގެ ބާރު މިނުގައި ވައި ޖެހޭނެކަމަށް މޫސުމާއި ބެހޭ އިދާރާއިން ބުނެއެވެ.އަދި ވިލާގަނޑުގައި އުތުރުގެ އަތޮޅުތަކަށް ގަޑިއަކު 40 މޭލުގެ ބާރުމިނުގައި ވައިގަދަވުން އެކަށީގެންވާކަމަށްވެސް މެޓު އޮފީހުން ބުނެއެވެ.
ދެކުނުގެ ޞަރަހައްދުގެ ކަނޑު އާދައިގެ ވަރަކަށް މަޑުވިނަމަވެސް، އެހެން ހިސާބުތަކުގައި އާދައިގެވަރަކަށް ގަދަވާނެކަމަށް ލަފާކުރެވޭތީ، ކަނޑު ދަތުރުފަތުރު ކުރާ ފަރާތްތަކުން މޫސުމަށް ހާއްސަ ސަމާލުކަމެއް ދިނުމަށް މެޓް އޮފީހުންވަނީ އިލްތިމާސްކޮށްފައެވެ.
