އެމްޕީ ލަތީފު އަލުން އަނބުރާ ޕީޕީއެމަށް

ރައްޔިތުންގެ މަޖިލީހުގެ ފަރެސްމާތޮޑާ ދާއިރާގެ މެމްބަރު ހުސައިން މުޙައްމަދު ލަތީފު އިދިކޮޅު ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އާއި ގުޅިވަޑައިގެންފިއެވެ.

މެމްބަރު ހުސައިން މުޙައްމަދު ލަޠީފު ޕީޕީއެމާއި ގުޅިވަޑައިގެންނެވީ ޕޮރޮގްރެސިވް ކޯލިޝަނުން ކާނިވާ ޞަރަޙައްދުގައި ހުކުރުދުވަހުގެރޭ ބޭއްވި ''ހިބަރު ވަދު'' ޖަލްސާގައެވެ. ރައީސް ޔާމީނުގެ އަރިސް ބޭފުޅެއް ކަމަށްވާ ހުސައިން މުޙައްމަދު ލަޠީފަކީ މީގެ ކުރިންވެސް ޕީޕީއެމްގެ މެމްބަރެކެވެ.

ރިޔާސީ އިންތިޚާބުގައި ރައީސް ޔާމީނަށް ފާޑު ވިދާޅުވަމުން ގެންދެވެމަށް ފަހު ހުސައިން މުޙައްމަދު ލަޠީފު ވަނީ ޖޭޕީ އަށް ވެސް ފަހުން ސޮއިކުރައްވާފައެވެ. 19 ވަނަ ރައްޔިތުންގެ މަޖިލީހަށް ހުސައިން އިންތިޚާބުވެވަޑައިގެންނެވީ އަމިއްލަ މެމްބަރެއްގެ ގޮތުގައެވެ.

ހުސައިން މުޙައްމަދުގެ އިތުރުން އަށާރަ ވަނަ ރައްޔިތުންގެ މަޖިލީހުގެ ދާންދޫ ދާއިރާގެ ކުރީގެ މެމްބަރު އަޙްމަދު އައްސަދުވެސް ވަނީ ޕީޕީއެމާއި ގުޅިވަޑައިގެންފައެވެ. އެ ޖަލްސާގައި އިތުރު ބަޔަކުވެސް ވަނީ ޕާޓީއާ ގުޅިފައެވެ.

މީގެ ކުރިން ޕީޕީއެމް ގައި އިސްކޮށް އުޅުއްވި ގިނަ ބަޔަކު ވަނީ އެ ޕާޓީ ދޫކޮށް ކޯލިޝަންގައި ހިމެނޭ ޖުމްހޫރީ ޕާޓީއާ ގުޅިވަޑައިގެންފައެވެ.