އަންނަ މަހުން ފެށިގެން އިންޒާރާ ނުލާ ދުންފަތުގެ ބާވަތައް ވިއްކާނަމަ ފިޔަވަޅުއަޅާނެ!
ލޭބަލް ޖެހުމުގެ މަގުސަދަކީ އާންމުން ދުންފަތާ ދުރުކުރުވަން
ދުންފަތުގެެ ބާވަތްތަކުގައި ބޭނުންކުރުމަށް ހަމަޖެހިފައިވާ ލޭބަލް
އަންނަ ޑިސެމްބަރު މަހުގެ އެއްވަނަ ދުވަހުން ފެށިގެން ފޮޓޯ ޖެހި ސިއްހަތުގެ އިންޒާރާ ނުލާ ދުންފަތުގެ އެއްވެސް ބާވަތެއް ވިއްކާނަމަ ފިޔަވަޅުއަޅާނެ ކަމަށް ހެލްތް މިނިސްޓްރީން ބުނެފިއެވެ.
ހެލްތް މިނިސްޓްރީން ބުނީ 01 ޑިސެންބަރު ފަހުން ފޮޓޯޖެހި ސިއްހަތުގެ އިންޒާރު ހިމެނިފައިނުވާ ދުންފަތުގެ އެއްވެސް ބާވަތެއް ރާއްޖޭގައި ވިއްކުމަކީ ގާނޫނީ ގޮތުން މަނާކަމެއް ކަމަށެވެ.
ދުންފަތުގެ ބާވަތްތައް ޕެކެޓްކޮށް، ލޭބަލް ޖެހުމާ ބެހޭ ގަވައިދުގެ މަގްސަދަކީ ކުޑަކުދިންނާއި، އަދި ޒުވާނުން ދުންފަތުގެ އިސްތިއުމާލްކުރަން ފެށުމުން ދުރުހެލިކުރުމެވެ. އަދި ހުރިހާ އުމުރެއްގެ މީހުންނަށް ދުންފަތުގެ ނުރައްކަލާ ބެހޭ ގޮތުން ހޭލުންތެރިކަން އިތުރުކުރަން އަދި ދުންފަތުގެ ބާވަތްތަކުގެ އިސްތިހާރުކުރުން ކުޑަކުރުމެވެ.
ގަވާއިދުގައިވާ ގޮތުން، އެ ގަވައިދުގައިވާ ކަމަކާއި ހިލާފުވެއްޖެ ނަމަ އެ ކުށް ކުރުމަށް ބޭނުން ކުރި މުދަލެއްގެ އަގާއި، އޭގެ ޓެކުހާއި، އެހެނިހެން ފީތަކުގެ ޖުމްލަ އަދަދުގެ 10 ގުނަ އިން ޖޫރިމަނާ ކުރެވޭނެ އެވެ. އަދި ދެ ވަނަ ފަހަރަށް ގަވާއިދާ ހިލާފުވެއްޖެ ނަމަ، އިތުރަށް 5000ރ.، ތިން ވަނަ ފަހަރަށް، 10،000ރ. އަދި ހަތަރު ވަނަ ފަހަރަށް 20،000ރ. އިން ޖޫރިމަނާ ކުރެވޭނެ ކަމަށް ގަވާއިދުގައި ބުނެފައި ވެއެވެ.
ގަވާއިދުގައި ވަނީ ޖޫރިމަނާގެ އިތުރުން ދުންފަތް މުއާމަލާތް ކުރުމަށް ދޫކޮށްފައިވާ ހުއްދަ ވަގުތީ ގޮތުން ހިފެހެއްޓުމާއި ހުއްދަ ބާތިލް ކުރުމާއި ހުއްދައިގައި ހިމެނޭ ވަކިވަކި ކަންކަން ހިފެހެއްޓުމަށް ހުރަހެއް ނެތް ކަމަށެވެ.
މިގަވާއިދާ ހިލާފަށް ދުންފަތުގެ ބާވަތެއް ވިއްކަމުންދާކަމުގެ މައުލޫމާތު ލިބިފައިވާނަމަ އެތަކެތި ތިމާވެއްޓަށް ގެއްލުން ނުވާފަދަ ގޮތަކަށް ނައްތާލުމުގެ ބާރު ހެލްތް މިނިސްޓްރީއަށް ލިބެއެވެ.
