ލަންކާގައި ހަމަޖެހުން ޤާއިމްވެފައި އޮތުމަކީ ރާއްޖެއަށް ރަނގަޅެއް: މިނިސްޓަރ ޝާހިދު
ވެރިކަން ބަދަލުވުމުގެ މަރުހަލާ ރާއްޖެ އާއި ލަންކާގައި އަމާން އޮމާންކޮށް ކުރިއަށް ދާތީ އުފާ ކުރައްވާކަމަށް ވިދާޅުވި
ފޮރިން މިނިސްޓަރ އަބްދުﷲ ޝާހިދު
އަވަށްޓެރި ސްރީލަންކާގައި ހަމަޖެހުމާއި ފާގަތިކަން ގާއިމްވެފައި އޮތުމަކީ ރާއްޖެ އަށް ފައިދާ ކުރާނެ ކަމެއް ކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެ އެވެ.
ޝާހިދު މިހެން ވިދާޅުވީ ލަންކާގައި ބޭއްވި ރިޔާސީ އިންތިޚާބު ކާމިޔާބު ކުރެއްވި ގޯތަބަޔާ ރާޖަޕަކްސައަށް މަރުހަބާ ދަންނަވާ ކުރެއްވި ޓްވީޓެއްގައެވެ. އަދި ވެރިކަން ބަދަލުވުމުގެ މަރުހަލާ ރާއްޖެ އާއި ލަންކާގައި އަމާން އޮމާންކޮށް ކުރިއަށް ދާތީ އުފާ ކުރައްވާ ކަމަށްވެސް މިނިސްޓަރ ވިދާޅުވިއެވެ.
މީގެ އިތުރުން ލަންކާގައި އަލަށް އުފެދިގެން އަންނަ އާ ސަރުކާރާއި އެކު މަސައްކަތްކޮށް، ދެ ގައުމުގެ ގުޅުން އިތުރު ހަރުފަތަކަށް ގެންދެވުމަށް އުއްމީދު ކުރައްވާ ކަމަށްވެސް ޝާހިދު ވިދާޅުވިއެވެ.
ލަންކާގެ ރައީސް ކަމަށް އިންތިޚާބުވެ ވަޑައިގަތް ގޯތަބަޔާ ރާޖަޕްކްސައާ މިދިޔަ މެއި މަހު މިނިސްޓަރ ލަންކާއަށް ކުރެއްވި ދަތުރުފުޅުގައި ވަނީ ބައްދަލުކުރައްވާފައެވެ.
