އަފްރާޝިމްގެ މަރުގެ ރިޕޯޓްގެ ހުލާސާ މިއަދުގެ ޖަލްސާގައި
17 ނޮވެމްބަރު 2019 | އާދީއްތަ 02:59މަރު ކޮމިޝަނުން މަޖިލީހަށް ރިޕޯޓް ފޮނުވީ މިދިޔަ ހަފްތާގައި
މަރު ކޮމިޝަންގެ ރިޕޯޓް
އަނިޔާވެރި ގޮތަކަށް މަރާލާފައިވާ ދީނީ އިލްމުވެރިޔާ އަދި ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެމްބަރު ޑރ. އަފްރާޝީމް އަލީގެ މަރުގެ ރިޕޯޓުގެ ހުލާސާ ރައްޔިތުންގެ މަޖިލީހުން އާއްމުކުރާ ގޮތަށް ނިންމައިފިއެވެ.
މަޖިލީހުގެ އިދާރާއިން ކޮށްފައިވާ ޓްވީޓެއްގައި ބުނީ، މަރާލާފައިވާ މީހުންނާއި، ގެއްލުވާލާފައިވާ މީހުންގެ މައްސަލަތައް ތަހުގީގުކުރާ ކޮމިޝަނުން އެކުލަވައިލި ޑރ.އަފްރާޝީމް މަރުގެ މައްސަލައިގެ ރިޕޯޓުގެ ހުލާސާ އެއް އާދިއްތަ ދުވަހުގެ ޖަލްސާގައި އިއްވަން ހަމަޖެހިފައިވާ ކަމަށެވެ. ރިޕޯޓު އިއްވާނީ ރައްޔިތުންގެ މަޖިލީހުގެ ރައީސް، މުހައްމަދު ނަޝީދެވެ.
ޑރ. އަފްރާޝީމް މަރާލާފައިވަނީ، 2012 ވަނަ އަހަރުގެ އޮކްޓޯބަރު މަހުގެ އެއް ވަނަ ދުވަހުގެ ރޭ ދަންވަރުގެ ވަގުތެއްގައި، ސްޓެލްކޯ ސަރަހައްދުގައި ހުންނަ ހ. ފުންވިލު ސިޑި ގޮޅި ސަރަހައްދުގައެވެ. އަފްރާޝީމް މަރާލުމުގެ ދައުވާ ސާބިތުވެފައި ވަނީ ހ. ލޮބީ ހުސައިން ހުމާމްގެ މައްޗަށެވެ. އަދި އެ މައްސަލައިގާ ހައްޔަރުކުރި އެހެން މީހުންގެ މައްޗަށް އެކަމުގެ އެއްވެސް ކަމެއް ސާބިތު ނުވެ އެ މީހުން ވަނީ މިނިވަންވެފައެވެ.
