ރައުދާގެ މަރުގެ މައްސަލައިގައި ސީރަތު ޕަރްވީންއާ ދެކޮޅަށް ދައުވާކޮށްދިނުމަށް އާއިލާއިން އެދެފި

ބަންގްލަދޭޝްގައި މަރުވި ރައުދާ އާތިފްގެ މަރާއި ގުޅިގެން އޭނާ މަރުވެފައި ހުރި ކަމަށް އެންމެ ފުރަތަމަ ފެނުނުކަމަށް ބުނާ ސީރަތު ޕަރްވީން މުހައްމަދުގެ މައްޗަށް ރައުދާގެ އާއިލާއިން ދައުވާކޮށްދިނުމަށް އެދެފި އެވެ.

މި މައްސަަލަ މިއަދުގެ ވަގުތެއްގައި ބަންގްލަދޭޝްގެ ރާޖްޝާހީގެ ޗީފް މެޓްރޮޕޯލިޓަން މެޖިސްޓްރޭޓް ކޯޓުގައި ފައިލްކޮށްފައި ވަނީ ރައުދާގެ ބައްޕަ ޑރ. މުހައްމަދު އާތިފް އެވެ. މި މައްސަލަ ކޯޓުން ވަނީ މިހާރު ބަލައިގަނެފަ އެވެ.

Advertisement

މި މައްސަލައިގައި ސީރަތުގެ މައްޗަށް ދައުވާކޮށްދިނުމަށް އެދިފައިވަނީ ގަސްތުގައި މީހަކު މެރުމުގެ ދައުވާ ކަމަށާއި އެކަން ކޮށްފައިވަނީ ރައުދާ ކަރުގައި ހިފައިގެން ކަމަށްވެސް އާއިލާއިން ބުނެފައިވެ އެވެ. އެގޮތުން، ރައުދާގެ މަރު ހިނގައިދިޔަ ގޮތް ރާޖްޝާހީގެ ފުލުހުންނާއި ސީރަތު ޕަރްވީން ކިޔައިދިންގޮތާއި އޮޓޮޕްސީއިން ފެންނަން ހުރި ހެކިތައް ދިމާނުވާ ކަމަށާއި އެހެންކަމުން ރައުދާ އަމިއްލައަށް ދަންޖެހިގެން މަރުވިކަމަށް ބެލެވެން ނެތް ކަމަށް ކޯޓަށް ހުށަހެޅި ލިޔުންތަކުގައި ބުނެފައިވެ އެވެ.

ރައުދާ އާތިފް ސީރަތު ޕަރްވީން އާއެކު: ރައުދާގެ މަރުގެ މައްސަލައިގައި ސީރަތުގެ މައްޗަށް ދައުވާކުރުމަށް އާއިލާއިން އެދިފައިވޭ

އަދި، ރައުދާ މަރުވިރޭ، ސީސީޓީވީ ފުޓޭޖް ވީނުވީއެއް ނޭނގި ގެއްލިފައިވާ މައްސަލައާއި ރައުދާ މަރުވުމަށްފަހު، އޭނާގެ އައިފޯން ސީރަތު އަންލޮކްކޮށް، ރައުދާގެ އިންސްޓަަގްރާމް އެކައުންޓަށް އެކްސެސްކޮށް، އޭގެން އޭނާގެ ނަން ޑިލީޓްކޮށްފައިވާ ކަމަށްވެސް އޭގައި ބުނެފައިވެ އެވެ. މީގެ އިތުރުން، ރައުދާ ދަންޖެހިފައިވާކަމަށް ދައްކަންވެގެން ގިނަ މަސައްކަތްތަކެއް ކޮށްފައިވާ ކަމަށްވެސް އޭގައި ބުނެފައިވެ އެވެ.

ދައުވާކޮށްދިނުމަށް އެދިފައިވާ ލިޔުމުގައި ރައުދާގެ މަރާއިމެދު އެންމެ ބޮޑަށް ޝައްކުކުރެވެނީ ސީރަތުގެ މައްޗަަށް ކަމަށާއި އެކަމުގައި ކާފީ ހެކި ހުރިކަމަށެވެ.

ރައުދާ އަމިއްލައަށް ދަންޖެހިގެން މަރުވިކަމަށް ރާޖްޝާހީގެ ފުލުހުން ނިންމި ނަމަވެސް، އޭނާއަކީ އެފަދަ ކަމެއް ކުރާނޭ ކުއްޖެއް ނޫންކަމަަށް އާއިލާއިން ވަނީ ބުނެފަ އެވެ.

ގުޅުންހުރި: ރައުދާގެ މަރު: ބައްޕަގެ އެތައް ސުވާލުތަކެއް!