މިއީ ދިވެހި ގައުމަށް ލިބުނު ބޮޑު ފަހުރެއް: ހައްވާ ރާޝިދާ

ބަންގްލަދޭޝްގައި ކުރިޔަށްދިޔަ އަންހެނުންގެ ސެންޓްރަލް ޒޯން ވޮލީ މުބާރާތުން ރިހި މެޑައްޔެއް ލިބިގެންދިޔުން އެއީ ދިވެހި ގައުމަށް ލިބުނު ބޮޑު ފަޚުރެއް ކަމަށް ގައުމީ އަންހެން ވޮލީ ޓީމުގެ ކެޕްޓަން ހައްވާ ރާޝިދާ ބުނެފިއެވެ.

ކެޕްޓަން ހައްވާ ރާޝިދާ ބުނީ މިއީ ރާއްޖޭގެ ވޮލީ އަށް ލިބުނު ބޮޑު ކާމިޔާބީއެއް ކަމަށާއި، މިއީ ކުޅުންތެރިން ކުރި ބުރަ މަސައްކަތުގެ ނަތީޖާ ކަމަށެވެ. މިއީ މީގެ ފަސް އަހަރު ކުރިން ފެށިގެން ކަނޑައެޅި ޓާރގެޓެއް ކަމަށާއި އުންމީދު ކުރި ގޮތާއި އެއްގޮތަށް މުބާރާތުން ރިހި މެޑަލް ލިބުމުން އެއީ ލިބުނު ކުރިއެރުމެއް ކަމަށް ވެސް ހައްވާ ރާޝިދާ ބުންޏެވެ.

މިއީ ކާމިޔާބު ހޯދުމަށް ކުޅުންތެރިންވި ގުރުބާނީ ތަކުގެ ނަތީޖާގެ ގޮތުގައި އޭނާ ފާހާގަކުރިއެވެ. މިޔަށްވުރެ ރަނގަޅަށް ތައްޔާރުވެވުނު ނަމަ ނޭޕާލަކީ ވެސް ބަލި ކުރެވޭނެ ވަރުގެ ޓީމެއް ކަމަށް ކެޕްޓަން ހައްވާ ރާޝިދާ ބުންޏެވެ.

މުބާރާތުގެ ފައިނަލުގައި ނޭޕާލް އަތުން ރާއްޖެ ބަލިވިއިރު، ލީގު ބުރުގައިވެސް ރާއްޖެ ބަލިވީ ހަމައެކަނި ނޭޕާލް އަތުންނެވެ. ރާއްޖެ މޮޅުވީ އަފްޣާނިސްތާނާއި، ބަންގްލަދޭޝް އަދި ކިރިގިސްތާނާ ދެކޮޅަށް ކުޅުނު މެޗުތަކުންނެވެ.

ފަސް ޓީމު ވާދަކުރި މި މުބާރާތުގައި ރާއްޖޭގެ އިތުރުން ވާދަކުރީ ބަންގްލަދޭޝް، ނޭޕާލް، ކިރިގިސްތާން އަދި އަފްޣާނިސްތާނެވެ.