މަދަނީ ޖަމިއްޔާތަކުގެ ފުރަތަމަ ކޮންފަރެންސް ގއ. ވިލިނގިލީގައި ފަށައިފި
15 ނޮވެމްބަރު 2019 | ހުކުރު 12:41މި ކޮންފަރެންސްގައި 15 ޖަމިއްޔާއަކުން 29 ބައިވެރިން ބައިވެރިވޭ
މަދަނީ ޖަމިއްޔާތަކުގެ ކޮންފަރެންސް ފެށިގެން ކުރިއަށްދަނީ
މިނިސްޓްރީ އޮފް ޔޫތް ސްޕޯޓްސް އެންޑް ކޮމިއުނިޓީ އެމްޕަވަރމެންޓުން ބާއްވާ މަދަނީ ޖަމިއްޔާތަކުގެ ފުރަތަމަ ކޮންފަރެންސް ގއ. ވިލިނގިލިގައި ފަށައިފިއެވެ.
މި މަހާސިންތާއަކީ ޔޫތް މިނިސްޓްރީގެ މެންޑޭޓް ތެރޭގައި ހިމެނޭ މަދަނީ ޖަމިއްޔާތައް ބާރުވެރިކުރުމުގެ ގޮތުން ކުރިއަށް ގެންދިއުމަށް ހަމަޖެހިފައިވާ ޕްރޮގްރާމެކެވެ. ކޮންމެ އަހަރެއްގައި މީގެ ދެ ކޮންފަރެންސް ބޭއްވުމަށް ހަމަޖެހިފައިވާއިރު ފުރަތަމަ ކޮންފަރެންސް ފަށައިގެން ކުރިއަށް ދަނީ ވިލިނގިލިގައެވެ.
މި ކޮންފަރެންސްގައި ގއ. އަތޮޅު 8 ރަށެއްގެ 15 ޖަމިއްޔާއަކުން 29 ބައިވެރިން ބައިވެރިވެއެވެ. މި ކޮންފަރެންސްގައި ކުރިއަށްގެންދާ ބައިތަކުގެ ތެރޭގައި ޖަމިއްޔާތުގެ މަސައްކަތާއި ލިބިފައި ހުރި ކާމިޔާބީތައް ހިއްސާކުރުމާއި، ޖަމިއްޔާ އުފެއްދުމާއި މަގްސަދު ކަނޑައެޅުން އަދި ސްޓްރެޓީޖިކް ޕްލޭނިންގެ މުހިންމު ކަމާއި އެންމެ ކާމިޔާޞު ގޮތާއި ބެހޭ ގޮތުން މަޝްވަރާ ކުރުން ހިމެނެއެވެ.
މީގެ އިތުރުން ޔޫއެންޑީޕީގެ ފަރާތުން ސްމޯލް ގްރާންޓް ފަންޑްސްގެ މައުލޫމާތު ދިނުމާއި، ޖަމިއްޔާތައް ހިންގުމުގައި ދިމާވާ ގޮންޖެހުންތަކާއި، ހިންގުން އިތުރަށް ހަރުދަނާ ކުރުން ފަހިކުރުމުގެ ގޮތުން ކުރެވޭނެ ކަންތައްތަކާއި ގުޅޭގޮތުން މަޝްވަރާ ކުރުން ހިމެނެއެވެ. އަދި މި ކޮންފަރެންސްގައި ބައިވެރިވާ ޖަމިއްޔާތަކުގެ ހުށަހެޅުންތައްވެސް މި ކޮންފަރެންސަށް ހުށަހެޅުމަށް ވަނީ ހަމަޖެހިފައެވެ.
