އުއްތަމަ ފަނޑިޔާރުގެ ސެކިއުރިޓީ އަދި އެހެނިހެން ޢިނާޔަތްތައް މެދުކަނޑައެއް ނުލަން: ޑީޖޭއޭ
14 ނޮވެމްބަރު 2019 | ބުރާސްފަތި 18:09ޢިނާޔަތްތައް މެދުކަނޑައިލައިފައިވާ ކަމަށް ދެކެވެނީ ޙަޤީޤަތާ ޚިލާފު ވާހަކަތަކެއް
އުއްތަމަ ފަނޑިޔާރު ޑރ. އަހުމަދު އަބްދުﷲ ދީދީ
އުއްތަމަ ފަނޑިޔާރު ޑރ. އަޙްމަދު ޢަބްދުﷲ ދީދީގެ ސެކިއުރިޓީ އަދި އެހެނިހެން އިނާޔަތްތައް މެދުކަނޑާނުލާ ކަމަށް ޑިޕާރޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ބުނެފިއެވެ.
ބުރާސްފަތި ދުވަހު ޑީޖޭއޭއިން ކުރި ޓްވީޓެއްގައި ބުނީ، އުއްތަމަ ފަނޑިޔާރަށް ދައުލަތުން ފޯރުކޮށްދެމުންދާ ސެކިއުރިޓީ އަދި ޢިނާޔަތްތައް މެދުކަނޑައިލައިފައިވާ ކަމަށް ދެކެވެމުންދާ ވާހަކަ ތަކަކީ ޙަޤީޤަތާ ޚިލާފު ވާހަކަތަކެއް ކަމަށާއި، އުއްތަމަ ފަނޑިޔާރުގެ ސެކިއުރިޓީ އަދި އެހެނިހެން ޢިނާޔަތްތައް ދައުލަތުން ފޯރުކޮށްދެމުންދާ ކަމަށެވެ.
އުއްތަމަފަނޑިޔާރުގެ ސެކިއުރިޓީ އަދި ޢިނާޔަތްތައް މެދުކަނޑައިލައިފައިވާ ކަމަށް ދެކެވެމުންދާ ވާހަކަތައް ޑީޖޭއޭ އިން ދޮގުކޮށްފައިވާއިރު، އުއްތަމަ ފަނޑިޔާރު ސަސްޕެންޑްކުރި މައްސަލަ މަޖިލީހަށް ހުށައަޅާފައިވަނީ ބުރާސްފަތި ދުވަހުއެވެ. އަދި އެ މައްސަލަ ދިރާސާ ކުރުމަށް ޖުޑިޝަރީ ކޮމިޓީއަށް ހުށައެޅުމުން އެ ކޮމިޓީން ވަނީ މައްސަލައިގެ ރިޕޯޓް ފާސްކޮށްފައެވެ.
މޯލްޑިވްސް ނެޝަނަލް ޑިފެންސް ފޯރސް އިން ވެސް ވަނީ އުއްތަމަ ފަނޑިޔާރަށް ދެމުން އަންނަ ސެކިއުރިޓީގެ ޚިދުމަތް ކަނޑާނުލާކަން ކަށަވަރުކޮށްދީފައެވެ.
އުއްތަމަ ފަނޑިޔާރު ޑރ. އަޙްމަދު ޢަބްދުﷲ ދީދީ، އެމަނިކުފާނު ސަސްޕެންޑް ކުރަން ނިންމި ނިންމުން ބަލައި ނުގަންނަ ކަމަށާއި، އެ ނިންމުމަކީ ރާއްޖޭގެ ދުސްތޫރީ ނިޒާމަށާއި ރައްޔިތުންނަށް ޚިޔާނަތްތެރިވުން ކަމަށް ވިދާޅުވެފައިވެއެވެ.
