ފަލަސްތީނުގެ ރައްޔިތުންނާ ދެކޮޅަށް އިސްރާއީލުން ދިން ހަމަލާތައް ދިވެހި ސަރުކާރުން ކުށްވެރިކޮށްފި

ފަލަސްޠީނުގެ ރައްޔިތުންނާ ދެކޮޅަށް އިސްރާއީލުން ދާދި ފަހުން ދިން ޙަމަލާތަކުގައި އެޤައުމުގެ ކުށެއް ނެތް އެތަކެއް މުސްލިމުން މަރުވެ، ޒަޚަމްވުމާއި ގުޅިގެން، ދިވެހި ސަރުކާރުން އެކަން ހަރުކަށި އިބާރާތުން ކުށްވެރިކޮށްފިއެވެ.

މިކަން ކުށްވެރިކޮށް ދިވެހި ސަރުކާރުގެ ފަރާތުން، ޢާންމު ކުރި ބަޔާނުގައި ބުނެފައިވަނީ އިސްރާއީލުން ހިސާރުކޮށްފައިވާ ފަލަޞްޠީނުގެ ޣައްޒާގެ ޞަރަޙައްދުތަކަށް އިސްރާއީލު ސިފައިން ދާދިފަހުން ދިން ޙަމަލާތަކުގައި ފަލަޞްޠީނުގެ ކުށެއްނެތް ޢާންމުން މަރުވަމުންދާ ކަމަށެވެ. އަދި މިޙަމަލާތަކުގައި މަރުވި މީހުންގެ ޢާލާތަކަށް ދިވެހި ސަރުކާރާއި ރައްޔިތުންގެ ނަމުގައި ތަޢުޒިޔާ ކިޔާކަމަށް ބަޔާނުގައިވެ އެވެ.

ދިވެހި ސަރުކާރުން ބަޔާނުގައި އިތުރަށް ބުނެފައިވަނީ މި ޞަރަޙައްދުގައި ހިނގަމުންދާ ހަމަނުޖެހުންތައް ޙައްލުކުރުމަށް ބައިނަލްއަޤުވާމީ ފަރާތްތަކުން ވަކިން ޚާއްޞަކޮށް މިޞްރުން އިސްނަގައިގެން ކުރިޔަށްގެންދާ މަސައްކަތްތަކަށް މަރުޙަބާ ކިޔާފައިވެއެވެ. އަދި ޙާލަތާ ނުބައްދަލު ބާރުގެ ބޭނުންކޮށްގެން އެ ޞަރަޙައްދުގައި ދިރިއުޅެމުންދާ ރައްޔިތުން ވަކިން ޚާއްޞަކޮށް އަންހެނުންނާއި ކުޑަކުދިންނަށް ދެމުންގެންދާ ޙަމަލާތަކާމެދު ކަންބޮޑުވާކަމަށް ބަޔާނުގައި ބުނެފައިވެއެވެ. އަދި ފަލަސްތީނުގެ ބިންތަކުގައި އިސްރާއީލުން އަޅަމުންދާ ގެތަކަކީ ބައިނަލްއަޤުވާމީ ޤާނޫނުތަކާއި އދގެ ސަލާމަތީ މަޖިލީހާއި ޢާންމު މަޖިލީހުގެ ޤަރާރުތަކާ ޚިލާފަށް އަޅަމުންދާ ގެތަކެއްކަމުގައެވެ.

ރާއްޖެއިން އަބަދުވެސް ތާއީދު ކުރަނީ ފަލަޞްޠީނާއި އިސްރާއީލު ދެދައުލަތެއްގެ ގޮތުގައި އޮތުމަށް ކަމަށާއި، އަދި 1967 ވަނަ އަހަރު ޞަރަޙައްދީ އިން ވަކިކުރެވުނު ގޮތައް އިރުމަތީ ޤުދުސަކީ ފަލަޞްޠީނުގެ ވެރިރަށުގެ ގޮތުގައި އޮވެ، ފަލަޞްޠީނަކީ މިނިވަން މުސްތަޤިއްލު ދައުލަތެއްގެ ގޮތުގައި އޮތުމަށް ރާއްޖެއިން އަބަދުވެސް އެދޭކަމަށް ބަޔާނުގައި ވެއެވެ.

އަދި ފަލަޞްޠީނު ރައްޔިތުން ތަޙައްމަލު ކުރަމުންދާ ކަންކަމުން އަރައިގަތުމަށް އަބަދުވެސް ފަލަޞްޠީނު ސަރުކާރާއި ރައްޔިތުންނަށް އެއްބާރުލުން ދިނުމުގައި ދިވެހި ސަރުކާރާއި ރައްޔިތުން ދެމިތިބޭނޭ ކަމުގެ ޔަޤީންކަން ބަޔާނުގައި ދީފައިވެއެވެ.