ފުލުހުންނާއި ރައްޔިތުން ގުޅިގެން މަސައްކަތް ކުރާނެ މާހައުލެއް ގާއިމު ކުރަންޖެހޭ: މިނިސްޓަރ އިމްރާން
14 ނޮވެމްބަރު 2019 | ބުރާސްފަތި 11:24ކުރީގަ ނެތް އެތައް އާދައެއް މިހާރު ވަނީ އަށަގަނެފައި
ހޯރަފުށި ޕޮލިސް ސްޓޭޝަންގެ އާއިމާރާތް ހުޅުއްވައިދެއްވަނީ
ފުލުހުންގެ މުއައްސަސާ ހަރުދަނާކުރުމަށް ފުލުހުންނާއި ރައްޔިތުން ގުޅިގެން މަސައްކަތްކުރާނެ މާޙައުލެއް ޤާއިމުކުރުން މުހިންމުކަމަށާއި، ސަރުކާރުން މަސައްކަތްކުރަނީ އެމަގަށް ކަމަށް ހޯމް މިނިސްޓަރ ޢިމްރާން ޢަބްދުﷲ ވިދާޅުވެއްޖެއެވެ.
ހއ. ހޯރަފުށީގައި ޤާއިމުކުރި ޕޮލިސް ސްޓޭޝަނުގެ އާޢިމާރާތް ހުޅުވަން އެރަށުގައި ބޭއްވި ރަސްމިއްޔާތުގައި ވާހަކަދައްކަވަމުން މިނިސްޓަރ އިމްރާން ވިދާޅުވީ ކުރީގައި އަޅުގަނޑުމެންގެ ތެރޭގައި ނެތް އެތައް އާދަތަކެއް، ނުވަތަ ކުށްތަކެއް މިހާރު އަށަގެންފައިވާކަމަށެވެ. އެކަންކަމާ ކުރިމަތިލާ އެކަންކަމަށް ޙައްލު ގެނައުމުގައި ފުލުހުން ކުރަމުން އަންނަ ތަޖުރިބާތަކުގައި ދައުލަތުން ފުލުހުންގެ މުއައްސަސާ ހަރުދަނާކުރުމަށް ދޭންޖެހޭ އެހީތެރިކަމާ އެއްބާރުލުން އެއްދުވަހުން އަނެއް ދުވަހަށް އިތުރުކުރަންޖެހިފައިވާ ކަމަށް މިނިސްޓަރު ވިދާޅުވިއެވެ.
މިނިސްޓަރު އިމްރާން ވިދާޅުވީ މިއަދުގެ ސަރުކާރުން ކުރަން ޤަސްތުކުރާ ކަމަކީ ފުލުހުންގެ މުއައްސަސާ ހަރުދަނާކުރުމުގައި ފުލުހުންނަށް ދެވޭ ވަސީލަތްތަކާއި، ފުލުހުންނަށް އެއްބާރުލުން ދިނުމާއެކުގައި ފުލުހުންނާ ރައްޔިތުންނާ އެކުގައި މަސައްކަތްކުރުމުގެ މާޙައުލެއް ޤާއިމުކުރުމުގެ މަސައްކަތް ކަމަށެވެ.
މިނިސްޓަރު އިމްރާން ވިދާޅުވީ އިންސާނީ މުޖުތަމަޢަކަށް ބޭނުންވާ އެންމެ މުހިންމު އެއްބަހާއަކީ އެމުޖުތަމަޢެއްގެ ޞުލްޙަވެރިކަމާ އަމާންކަމާ ރައްކާތެރިކަންކަމަށެވެ. ކޮންމެ އިންސާނީ މުޖުތަމައުއެއް ދެމިއޮވެ، އެއިންސާނީ މުޖުތަމަޢެއް ކުރިއަރާ ދިއުމަށް އެމުޖުތަމަޢަކަށް ލިބެންޖެހޭ ތަނަވަސްކަމާ އުފާފާގަތިކަމުގެ އަޞްލަކީ އެމުޖުމަތަޢެއްގައި އޮންނަ އަމާންކަންކަމާއި ރައްކާތެރިކަންކަމަށް މިނިސްޓަރު ވިދާޅުވިއެވެ.
މިނިސްޓަރ އިމްރާން ޢަބްދުﷲ ވިދާޅުވީ މުޖުތަމަޢެއްގެ ސަލާމަތްކަން އޮންނާނީ އެމުޖުތަމަޢުގައި އޮންނަ އަމާންކަމާއި، ރައްކާތެރިކަމުގެ މައްޗަށާއި، އެމުޖުތަމަޢެއްގައި އޮންނަ ތަނަވަސްކަމާއި ފާގަތިކަމުގެ މައްޗަށްކަމަށެވެ.
ހޯރަފުށި ޕޮލިސް ސްޓޭޝަނުގެ އާއިމާރާތް ހުޅުއްވައިދެއްވީ މިނިސްޓަރު އިމްރާނާއި، ކޮމިޝަނަރ އޮފް ޕޮލިސް މުޙައްމަދު ހަމީދެވެ. އިމާރާތް ހުޅުއްވައިދެއްވުމަށްފަހު އިމާރާތުގައި ޤައުމީ ދިދައާއި ފުލުހުންގެ މުއައްސަސާގެ ދިދަ ދެބޭފުޅުން ނަންގަވައިދެއްވިއެވެ. އަދި ޢިމާރާތް ބައްލަވާލެއްވިއެވެ.
