ބަސް ޑްރައިވަރުގެ ބަންދަށް 7 ދުވަސް ޖަހައިފި
14 ނޮވެމްބަރު 2019 | ބުރާސްފަތި 04:57ބަސް ދުއްވަން ހުރި ޑްރައިވަރު ފުލުހުން ހުއްޓުވާފައިވަނީ އެކްސިޑެންޓް ހިނގި ސަރަހައްދަށް ވުރެ ދުރުން
އެކްސިޑެންޓް ހިނގި ސަރަހައްދު
ކުޑަކުއްޖަކު ނިޔާވި އެކްސިޑެންޓްގެ މައްސަލައިގައި ހިމެނޭ ބަސް ޑްރައިވަރުގެ ބަންދަށް ކްރިމިނަލް ކޯޓުން ހަތް ދުވަސް ޖަހައިފިއެވެ.
އަންގާރަ ދުވަހުގެރޭ ހިނގި އެކްސިޑެންޓްގައި ނިޔާވެފައިވަނީ، އެކްސިޑެންޓްވީ ސައިކަލުގެ ފަހަތުގައި ހުރި 13 އަހަރުގެ ކުޑަ އަންހެން ކުއްޖެކެވެ. އެ ސައިކަލް ދުއްވާފައި ދިޔައީ އެ ކުއްޖާ މަންމައެވެ. އޭނާއަށް މާ ސީރިއަސް އަނިޔާތަކެއް ނުލިބޭ ކަމަށް އާސަންދަ ހޮސްޕިޓަލުން ވަނީ މައުލޫމާތު ދީފައެވެ.
މި އެކްސިޑެންޓް ހިނގާފައިވަނީ، ހުޅުމާލެ-ހުޅުލެ ހައިވޭއަށް އަރަންދާ މަގުގައެވެ. ފުލުހުން ބުނެފައިވަނީ ބަސް ޑްރައިވަރު ހުއްޓުވާފައިވަނީ އެކްސިޑެންޓް ހިނގި ސަރަހައްދުން ތަންކޮޅެއް ދުރުން ކަމަށާއި، އޭނާއަށް އެކްސިޑެންޓެއް ވީކަމެއް ނޭނގޭ ކަމަށް އޭނާ ބުނެފައިވާ ކަމަށެވެ. އެ ބަހަކީ ހުޅުލެއަށް ފަސިންޖަރުން އުފުލާ އެމްޓީސީސީގެ ބަހެކެވެ.
އެކްސިޑެންޓާއި ގުޅިގެން އެމްޓީސީސީއިން ދީފައިވާ މައުލޫމާތަށް ބަލާއިރު، އެކްސިޑެންޓް ހިނގިކަން އެ ބަހުގައި ހުރި ކޮންޑަކްޓަރަކަށްވެސް އަދި ފަސިންޖަރަކަށްވެސް ނޭނގޭ ކަމަށެވެ. މި ހާދިސާ ހިނގައިދިޔަ ގޮތާއި ގުޅޭ ގޮތުން އެކި ފަރާތްތަކުން އެކި ގޮތަށް މައުލޫމާތު ދީފައިވާއިރު، ފުލުހުން ވަނީ އެ މަންޒަރު ދުށް ފަރާތްތަކުގެ އެހީތެރިކަމަށް އެދިފައެވެ.
މިއީ މިއަހަރުގެ ތެރޭގައި އެމްޓީސީސީގެ ބަހަކުން ޖެހި ހިނގި އެކްސިޑެންޓެއްގައި މީހަކު ނިޔާވީ ދެވަނަ ފަހަރެވެ. އެމްޓީސީގެ ބަހަކުން ޖެހި މިއަހަރުގެ ތެރޭގައި ދެން ނިޔާވެފައިވަނީ ޔުކްރެއިންއަށް ނިސްބަތްވާ ފަތުރުވެރިއެކެވެ.
