ގާޒީ ދިރިއުޅުއްވާ ގޭގެ ދޮރަށް ކޯރާޑީއަކުން ގެއްލުންދިން މައްސަލަ، ތަހުގީގުކޮށް އަޅަންޖެހޭ ފިޔަވަޅުތައް އެޅުމަށް ގޮވާލަން: ފަނޑިޔާރުންގެ ޖަމްއިއްޔާ
ކަމާބޭހޭ އިދާރާތަކުން ފަނޑިޔާރުންގެ ސަލާމަތާއި ރައްކާތެރިކަން ކަށަވަރުކޮށްދެއްވުމަށް ގޮވާލާފައިވޭ
ފަނޑިޔާރުންތަކެއް ހަފްލާއެއްގައި
ކްރިމިނަލް ކޯޓު ހިންގެވުން ދާދިފަހުން ހަވާލުކުރައްވާފައިވާ، އެކޯޓުގެ ގާޒީ އަލީ ރަޝީދު ދިރިއުޅުއްވާ އެޕާޓްމަންޓުގެ ދޮރަށް ބަޔަކު ކޯރާޑީއަކުން ގެއްލުން ދީފައިވާތީ، އެ ޢަމަލު، ދިވެހި ރާއްޖޭގެ ފަނޑިޔާރުންގެ ޖަމްޢިއްޔާއިން ވަރަށް ބޮޑަށް ކުށްވެރިކޮށްފި އެވެ.
ފަނޑިޔާރުންގެ ޖަމްޢިއްޔާއިން ބުދަ ދުވަހު ނެރެފައިވާ ބަޔާނެއްގައި ބުނެފައި ވަނީ، ގާޒީ ޢަލީ ރަޝީދު ދިރިއުޅުއްވާ އެޕާޓްމަންޓުގެ ދޮރަށް ކޯރާޑީއަކުން ގެއްލުންދިން މައްސަލަ ކަމާބެހޭ އިދާރާތަކުން ވީއެންމެއަވަހަކަށް އެ މައްސަލަ ބަލައި ތަހުޤީޤުކޮށް، އެކަމުގައި ބައިވެރިވެފައިވާ ފަރާތްތައް ހޯދާ ޤާނޫނީ ގޮތުން އަޅަންޖެހޭ ފިޔަވަޅުތައް އެޅުމަށް ގޮވާލާ ކަމަށެވެ.
ފަނޑިޔާރުންގެ ޖަމްޢިއްޔާގެ އެބަޔާނުގައި ވަނީ، އަމިއްލަ ފަރުދަކު ވިޔަސް، ދައުލަތުގެ ކަމެއް ހިންގުމާ ޙަވާލުވެހުރި މީހަކު ވިޔަސް، ފަނޑިޔާރުންގެ މަސައްކަތާ ބެހި، ނުފޫޒު ފޯރުވައިގެން ނުވާނެކަމަށް ޤާނޫނުއަސާސީގެ 141 ވަނަ މާއްދާގެ (ނ)ގައި ބަޔާން ކޮށްފައިވާއިރު، ފަނޑިޔާރުންނާމެދު ޢާންމު ވިސްނުން ހުރިގޮތާއި، ފަނޑިޔާރަކު ޢާންމުކޮށް ބަލަމުންދާ މައްސަލަތަކުގެ ސަބަބުން ނުވަތަ ބަލަމުންދާ ވަކި މައްސަލައަކާގުޅޭ ގޮތުން ނުރައްކާތެރިކަމަށް އޭނާ ހުށަހެޅިދާނެ ނިޞްބަތަށާއި، އާންމު މަސްރަހު ޤައުމުގައި އޮތްގޮތުގެ މައްޗަށް ބަލައި ފަނޑިޔާރުންނަށް ސަލާމަތާއި ރައްކާތެރިކަން ފޯރުކޮށްދިނުމުގެ އިންތިޒާމު، ދައުލަތުގެ ސަލާމަތީ ބާރުތަކުން ހަމަޖައްސަން ވާނެ ކަމަށް ދިވެހިރާއްޖޭގެ ފަނޑިޔާރުންގެ ޤާނޫނުގެ 13 ވަނަ މާއްދާގެ (ށ) އާއި (ނ)ގައި ބަޔާންކޮށްފައިވާ ކަމަށެވެ.
އެހެންކަމުން ޤާނޫނުތަކުގައި ކަނޑައެޅި ބަޔާންކުރެވިފައިވާ ގޮތުގެމަތިން، ފަނޑިޔާރުންނަށް ސަލާމަތާއި ރައްކާތެރިކަން ފޯރުކޮށްދިނުމުގެ ގޮތުން އިންތިޒާމު ކުރަންޖެހޭ ކަންކަން އެގޮތުގެ މަތިން އިންތިޒާމު ކުރެވިފައިވާކަން ކަމާބެހޭ ފަރާތްތަކުން ކަށަވަރުކޮށް، އެކަންކަމާ ގުޅޭގޮތުން އަޅަންޖެހޭ އެންމެހައި ފިޔަވަޅުތައް އަޅައިދިނުމަށް ވެސް މިފުރުޞަތުގައި ކަމާބެހޭ އެންމެހައި ފަރާތްތަކަށް ދިވެހި ފަނޑިޔާރުންގެ ޖަމްޢިއްޔާއިން އިލްތިމާސް ކުރާ ކަމަށް ވެސް އެބަޔާނުގައި ވެއެވެ.
ގާޒީ އަލީ ރަޝީދު ދިރިއުޅުއްވާ އެޕާޓްމަންޓްގެ ދޮރަށް ކޯރާޑީއަކުން ގެއްލުންދީ، ލިޔުމެއް ލިޔެފައިވާ މައްސަލަ ހޯމަ ދުވަހުގެ ރޭ ފަތިހު 5:30 ހާއިރު ފުލުހުންނަށް ހުށަހަޅާފައިވާ ކަމަށް ފުލުހުން ވަނީ ބުނެފަ އެވެ.
ފުލުހުން ބުނެފައިވަނީ އެ މައްސަލައާ ގުޅިގެން މިހާތަނަށް މީހަކު ހައްޔަރު ކޮށްފައިނުވާކަމަށެވެ. އަދި މިމައްސަލައާ ގުޅިގެން އަޅަންޖެހޭ ފިޔަވަޅުތައް އަޅާ ފުލުހުން މި މައްސަލަ އިތުރަށް ތަހުޤީޤު ކުރަމުންދާކަމަށް ފުލުހުން ބުނެއެވެ.
ކްރިމިނަލް ކޯޓުގެ ހިންގުން އެކޯޓުގެ ގާޒީއާ ހަވާލުކުރީ އިސް ގާޒީ އަހުމަދު ހައިލަމް ސަސްޕެންޑް ކުރުމާއި ގުޅިގެންނެވެ. ހައިލަމް ސަސްޕެންޑްކުރީ ނަޞްރުގެ ދުވަހުގެ ތަހުނިޔާ ވިދާޅުވެ ވައިބަރ ގްރޫޕަކަށް ފޮނުއްވި މެސެޖެއްގައިވާ ކުރެހުމެއްގެ މައްސަލައިގަ އެވެ. ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙާއި ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުޙައްމަދު ނަޝީދުގެ ކަރުގައި ޗޭނު ޖަހައި ގަން ހިންގުވާ މަންޒަރު އެ ކުރެހުމުން ފެނެއެވެ. އެ މެސެޖްގެ ސްކްރީން ޝޮޓް ސޯޝަލް މީޑިޔާގައި ޢާންމުވުމާއެކު ގިނަ ބަޔެއްގެ ފާޑުކިޔުންތައް ހައިލަމަށް ޢަމާޒުވިއެވެ. އޭގެތެރޭގައި ރައްޔިތުންގެ މަޖިލީހުގެ އެމްޑީޕީ މެމްބަރުންވެސް ހިމެނިވަޑައިގަންނަވައެވެ.
