ޖެންޑަރ މިނިސްޓްރީއާއި ގުޅުންހުރި މަސައްކަތްތަކަށް އަންނަ އަހަރު އޮތީ އުއްމީދީ ބަޖެޓެއް: ޖެންޑަރ ކޮމިޓީ
12 ނޮވެމްބަރު 2019 | އަންގާރަ 10:04މިނިސްޓްރީއާއި ގުޅުންހުރި ކަންކަމުގައި އަންނަ އަހަރު އެކަށީގެންވާ ބަޖެޓެއް އެބަ އޮތް
މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީގެ މެމްބަރުން | ރައްޔިތުންގެ މަޖިލިސް
މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސްގެ މޭންޑޭޓާއި ގުޅުންހުރި މަސައްކަތްތަކަށް 2020 ވަނަ އަހަރު ކަނޑައަޅާފައިވަނީ ވަރަށް އުންމީދީ ބަޖެޓެއް ކަމަށް ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީން ބުނެފިއެވެ.
އަންގާރަ ދުވަހު އޮތް ކޮމިޓީ ބައްދަލުވުމުގައި މިނިސްޓްރީގެ މަސައްކަތްތަކާއި ގުޅޭގޮތުން އަންނަ އަހަރަށް ކަނޑައަޅާފައިވާ ބަޖެޓާއިމެދު މަޝްވަރާކޮށްފައިވާއިރު، ކޮމިޓީގެ މުޤައްރިރު އަދި ހިންނަވަރު ދާއިރާގެ މެމްބަރު ޖީހާން މަހުމޫދު ވިދާޅުވީ، ޖެންޑަރ މިނިސްޓްރީއާއި ގުޅުންހުރި ކަންކަމުގައި އަންނަ އަހަރު އެކަށީގެންވާ ބަޖެޓެއް އެބަ އޮތް ކަމަށާއި، އެއީ އުންމީދީ ބަޖެޓެއް ކަމަށެވެ.
އެގޮތުން މިނިސްޓްރީގެ ދަށުން ހިންގަމުންގެންދާ ކުޑަކުދިންގެ ހިޔާ، ފިޔަވަތި އަދި ޚާއްސަ އެހީއަށް ބޭނުންވާ މީހުންގެ މަރުކަޒުގެ މަސައްކަތްތަކަށްވެސް ބަޖެޓު ނެތުމުގެ ދަތިކަން ފާއިތުވި އަހަރުތަކުގައި ކުރިމަތިވެފައިވާއިރު، އަންނަ އަހަރު އެ ތަންތަނަށްވެސް އެކަށީގެންވާ ބަޖެޓު ކަނޑައެޅި، ތަނުގެ ދަތިކަން ކުޑަކުރެވިގެންދާނެ ކަމަށް ޖީހާން ވިދާޅުވިއެވެ.
އޭގެ އިތުރުން، އިންސާނީ ކަރާމާތަށް ކުރިމަތިވެފައިވާ އެންމެ ބޮޑު ވަބާކަމުގައިވާ މަސްތުވާތަކެތީގެ މައްސަލަތަކަށް ހައްލު ހޯދުމަށް ހަމައެކަނި ނެޝަނަލް ޑްރަގް އޭޖެންސީއަށް ބަލާލި ނަމަވެސް 66 މިލިއަން ރުފިޔާއިން 95 މިލިއަނަށް ބަޖެޓް އިތުރުކުރެވިފައިވާ ކަމަށް ޖީހާން ވިދާޅުވިއެވެ.
ޖީހާން އިތުރަށް ވިދާޅުވީ، ނުކުޅެދުންތެރިކަން ހުންނަ ފަރާތްތަކަަށްދޭ "ތެރަޕިއުޓިކް" ފަރުވާއަށް ފާއިތުވި ދެ އަހަރުވެސް ވަކި ބަޖެޓެއް ކަނޑައެޅިފައި ނުވާ ކަމަށާއި، ނަމަވެސް އަންނަ އަހަރު އެކަމަށްވެސް 36 މިލިއަން ރުފިޔާ ދައުލަތުން އިންވެސްޓް ކޮށްފައިވާ ކަމަށެވެ. އަދި އެ ފަރުވާ ހިލޭ ދެވޭގޮތަށް ހަމަޖައްސައި، ފަސޭހައިން ފަރުވާ ހޯދޭނެ ގޮތް ހެދުމާއި ގުޅޭގޮތުން އެންސްޕާއާއި އާސަންދައިގެ އޮފިޝަލުންނާއި ބައްދަލުކުރުމަށް ކޮމިޓީގެ މެމްބަރުން ވަނީ މަޝްވަރާ ކުރައްވާފައެވެ.
