ސުއިސައިޑް ޕްރިވެންޝަން ސްޓްރެޓެޖީ އެކުލަވާލުމުގެ މަސައްކަތް ފަށައިފި
އެ ބައްދަލުވުމުގައި ކަމާ ގުޅުން ހުރި މުވައްސަސާތަކުން ބައިވެރިވި
ސުއިސައިޑް ޕްރިވެންޝަން ސްޓްރެޓަޖީ އެކުލަވާލަން ބޭއްވީ ބައްދަލުވުމުގެ ތެރެއިން
ސުއިސައިޑް ޕްރިވެންޝަން ސްޓްރެޓެޖީ އެއް އެކުލަވާލުމުގެ މަސައްކަތް މިނިސްޓްރީ އޮފް ހެލްތުން ފަށައިފިއެވެ.
ސްޓެރެޓެޖީ އެކުލަވާލުމަށް އެމިނިސްޓްރީން ކުރަމުންގެންދާ މަސައްކަތުގެ ދަށުން އަންގާރަ ދުވަހުގެ ހެނދުނު ހޮޓެލް ޖެންގައިވަނީ ކަމާއި ގުޅުން ހުރި އިދާރާތަކާއެކު، ވަނީ މަޝްވަރާ ބައްދަލުވުމެއް ފަށާފައެވެ. މިބައްދަލުވުން ކުރިޔަށްގެންދަނީ މިނިސްޓްރީ އޮފް ހެލްތާއި، ޑަބްލިއު އެޗްއޯއާއި، އެޗްޕީއޭގެ ގުޅިގެންނެވެ.
ރާއްޖެ އެމްވީއަށް މައުލޫމާތު ދެއްވަމުން މިނިސްޓްރީ އޮފް ހެލްތުގެ މެންޓަލް ހެލްތު ޔުނިޓްގެ ޑިރެކްޓަރ އައިމިނަތު ޝަހުޒާ ވިދާޅުވީ، ރާއްޖޭގައި އަމިއްލަ އަށް މަރުވާ މީހުންގެ ސީދާ އަދަދެއް ރާއްޖޭގައި އެނގެން ނެތް ކަމަށެވެ. އަމިއްލަ އަށް މަރުވާ މީހުންގެ އިތުރުން އަމިއްލަ ނަފްސަށް ގެއްލުންދޭ މީހުންގެ ވާހަކަ ސޯޝަލް މީޑިއާ ގައި ދައުރުވަމުންދާއިރު ޚަބަރު ފަތުރާ އެކި އެކި ވަޞީލަތްތަކުންވެސް މިފަދަ ޚަބަރުތައް ފަތުރަމުންދާކަން ޝަހުޒާ ފާހަގަކުރެއްވިއެވެ.
އެހެންކަމުން ރާއްޖޭގައި ސުއިސައިޑް ޕްރިވެންޝަން ސްޓްރެޓެޖީ އެއް އޮތުމަކީ މުހިއްމު ކަމެއްގެ ގޮތުގައި ދެކޭތީ ސްޓްރެޓަޖީއެއް މިއަދުގެ ބައްދަލުވުމުގައި އެކުލަވާލާނެ ކަމަށް ޝަހުޒާ ވިދާޅުވިއެވެ.
ޝަހުޒާ ވިދާޅުވީ މެންޓަލް ހެލްތަށް މަސައްކަތްކުރާ އެކި އެކި މުއައްސަސާތަކުގެ އިތުރުން މަދަނީ ޖަމްޢިއްޔާތައް އެއް މޭޒެއްގެ ދޮށުގައި ތިބެ އެއްބަޔަކު އަނެއްބަޔަކަށް މަޝްވަރާކޮށްގެން ސްޓްރެޓެޖީ އެއް އެކުލަވާލެވިއްޖެ ނަމަ އެކަމުން ކުރާ ފައިދާ މުޖުތަމަޢަށް ބޮޑުވެގެންދާނެ ކަމަށެވެ.
އަންގާރަ ދުވަހުގެ ހެނދުނު 9 އަކުން މެނދުރު ފަހު ތިނެއް ޖަހަންދެން ކުރިޔަށް ދެންދިޔުމަށް ހަމަޖެހިފައިވާ އެ ބައްދަލުވުމުގައި މެންޓަލް ހެލްތައް މަސައްކަތްކުރާ އެކި އިދާރާތަކާއި، މޯލްޑިވްސް ޕޮލިސް ސަރވިސް، ޖެންޑަރ މިނިސްޓްރީ، މޯލްޑިވްސް ކަރެކްޝަނަލް ސަރވިސް، ޔޫތު މިނިސްޓްރީ، ހޯމް މިނިސްޓްރީގެ އިތުރުން އެޑިއުކޭޝަން މިނިސްޓްރީ އަދި ނޭޝަނަލް ޑްރަގް އެޖެންސީ ފަދަ ތަންތަނުން ބައިވެރިވާ ކަން ފާހަގަކޮށްލެވެއެވެ.
