ޕާކިސްތާނު މުބާރާތުން ރާއްޖޭގެ ބެޑްމިންޓަން ކުޅުންތެރިންނަށް ރަން ވަނަ!
ރާއްޖޭގެ ބެޑްމިންޓަން ކުޅުންތެރިން އަންނަނީ އިންޓަރނޭޝަނަލް މުބާރާތް ތަކުން ކާމިޔާބު ހޯދަމުން
ރަން މެޑަލް ހޯދި ރާއްޖޭގެ ނަބާހާ އަދި ނަބީހާ
ޕާކިސްތާނުގައި ކުރިޔަށްދިޔަ ޕާކިސްތާން އިންޓަނޭޝަނަލް ސީރީސް ބެޑްމިންޓަން މުބާރާތުން އަންހެން ޑަބަލް އަދި މިކްސް ޑަބަލްސް ކެޓަގަރީއިން ރާއްޖޭގެ ދެ ޕެއާ ރަން މެޑަލް ހޯދައިފިއެވެ.
އާދީއްތަ ދުވަހު ކުޅުނު ފައިނަލުގައި ރާއްޖޭގެ އަންހެން ޑަބަލްސް ޕެއާ ކަމުގައިވާ ނަބީހާ އަދި ނަބާހާ ޕެއާއިން ޕާކިސްތާނުގެ ޕެއާ އެއް ކަމުގައިވާ ބުޝްރާ ގައްޔޫމާއި މަހޫރު ޝަހުޒާދުގެ ޕެއާ ބަލިކުރީ ސީދާ ދެ ސެޓުންނެވެ.
މެޗުގެ ސެޓުތައް ރާއްޖޭގެ ޕެއާއިން ގެންދިޔައީ 21-17 އަދި 21-13 އިންނެވެ. ނަބާހާ އަދި ނަބީހާގެ ޕެއާ އަކީ ދާދިފަހުން ބޭއްވުނު ގައުމީ ބެޑްމިންޓަން މުބާރާތް ވެސް ކާމިޔާބުކުރި ޕެއާއެވެ.
އާދީއްތަ ދުވަހު ކުޅުނު މިކްސް ޑަބަލްސް ފައިނަލް ވެސް ކާމިޔާބުކޮށްފައިވަނީ ރާއްޖޭގެ ޕެއާ ކަމުގައިވާ ނަބާހާ އަދި ޒަޔާން ޒަކީގެ ޕެއާ އިން އެވެ.
މުބާރާތުގެ އެއްވަނަ ޕެއާގެ ގޮތުގައި ސީޑުކޮށްފައިވާ ނޭޕާލްގެ ދިޕޭޝް އާއި އަމީތާގެ މައްޗަށް ރާއްޖޭގެ ޕެއާއިން ކުރި ހޯދީ ސީދާ ދެ ސެޓުންނެވެ.
މެޗުގެ ސެޓުތައް ރާއްޖޭގެ ޕެއާއިން ގެންދިޔައީ 21-16 އަދި 21-19 އިންނެވެ.
މިއީ ބެޑްމިންޓަން ވޯލްޑް ފެޑެރޭޝަން (ބީޑަބްލިއުއެފް) އިން އެންޑޯސްކޮށްފައިވާ މުބާރާތަކުން ރާއްޖެ އަށް ލިބުނު ފުރަތަމަ ރަން މެޑައްޔެވެ.
މި މުބާރާތުގެ ސިންގަލްސް ބައިން ރާއްޖޭގެ ނީލާ ނަޖީބު ލޯ މެޑަލް ހޯދިއިރު އަންހެން ޑަބަލްސް ބައިން ނީލާ އަދި މައިސާ ގެ ޕެއާއިން ވަނީ ލޯ މެޑަލް ހޯދައިފައެވެ.
