"ބޮސް" އާއި "މާޔޫސް" ވެސް ބައިސްކޯފަށް އަންނަނީ!

ފާތިމަތު ނަހުލާ ގެ "ބޮސް" އާއި މަހުދީ އަހުމަދު ޕްރޮޑިއުސްކޮށްފައިވާ "މާޔޫސް" މި ހިނގާ ނޮވެމްބަރު މަހު ބައިސްކޯފުން ބަލާލަން ލިބޭނެ ކަމަށް ބައިސްކޯފުން ބުނެފިއެވެ.

މި މަހަކީ ބައިސްކޯފު ވުޖޫދުވިތާ އެއް އަހަރު ފުރޭ މަސް ކަން ފާހަގަކޮށްލެވެއެވެ. އެހެން ކަމުން ބައިސްކޯފުން އަންނަނީ ބެލުންތެރިންނަށް މުޅިން އާ ފިލްމު ތަކަކާއި ޑްރާމާއެއްގެ އިތުރުން އިތުރު ޝޯތަކެއް ވެސް ގެނެސްދެން ތައްޔާރުވަމުންނެވެ.

ބައިސްކޯފުން ނެރެފައިވާ ޓްރެއިލަރ އެއްގައި މި މަހު ބެލުންތެރިންގެ ބޮޑު ތަރުހީބެއް ލިބުނު "ބޮސް" އެ އެޕަށް އަންނާނެ ކަމަށް ބުނާއިރު ރިލީޒްނުވެ އޮތް ދިވެހި ފިލްމު "މާޔޫސް" ވެސް ބެލުންތެރިންނާ ހަމަޔަށް އަންނާނެކަން އިޢުލާންކޮށްފައިވެއެވެ. އަދި އާ ޑްރާމާ ސިލްސިލާ "ހާސާ" ވެސް މި ހިނގާ ނޮވެމްބަރު މަހު ދައްކަން ފަށާނެ ކަން ވެސް އެ ޓްރެއިލާ އިން ހާމަ ވެއެވެ.

ދިވެހި ފިލްމު "ބޮސް" އަކީ 2017 ވަނަ އަހަރު އައިޝަތު ރިޝްމީ ޑައިރެކްޓްކޮށްފައިވާ ފިލްމެކެވެ. މަރިޔަމް އައްޒަ އާއި މުހައްމަދު ޔުނާން ލީޑު ރޯލުން ފެނިގެންދިޔަ އެ ފިލްމަކީ މުއްސަނދި އަންހެއްކުއްޖެއްގެ މުދާގަނޑުގެ މައްޗަށް ގަދަވެގަތުމަށް ބަޔަކު ކުރާ މަސައްކަތް ދައްކުވައިދޭ ފިލްމެކެވެ. ކުޑައިރު މަންމަ ނިޔާވެފައިވާ އެ އަންހެން ކުއްޖާ، ބޮސްގެ ލީޑުން ފެނިގެންދާ މަރިޔަމް އައްޒަ (އިބާ) ހަމައެކަނި ބައްޕަގެ ލޯބި ލިބިގެން ބޮޑުވެ ކުއްލިއަކަށް އެ ބައްޕަ ނިޔާވުމުން ނަފްސާނީ ގޮތުން އޭނާ ކުރިމަތިލާ ހަނގުރާމަ އެ ފިލްމުން ދައްކުވައިދެއެވެ.

ނުވަވަނަ ގައުމީ ފިލްމު އެވޯޑްސް ގައިވެސް "ބޮސް" ހިމަނާފައިވާއިރު އެ ފިލްމަކީ ނަހުލާ އުފެއްދި ފިލްމުތަކުގެ ތެރެއިން ހިޓަކަށް ވެގެން ދިޔަ ފިލްމެއްކަން ފާހަގަކޮށްލެވެއެވެ.

"މާޔޫސް" އަކީ ބެލުންތެރިންގެ ގިނަ އަހަރު ތަކެއް ވަންދެން އިންތިޒާރު ކުރި ފިލްމެކެވެ. ނިއުމާ މުހައްމަދުގެ އިތުރުން ޖުމައްޔިލް ނިމާލް އަދި ކޮޕީ އިއްސެ ލިޑު ރޯލު ކުޅެފައިވާ އެ ފިލްމު ސިނަމާތަކަށް ނައި ސަބަބު ރަނގަޅަށް ސާފުވެފައެއް ނެތެވެ. ނަމަވެސް މިހާރު މިވަނީ ހުރިހާ މަސައްކަތެއް ނިންމައި ބައިސްކޯފުން ފިލްމު ބެލޭނެ އިންތިޒާމު ހަމަޖައްސާފައެވެ.

"މާޔޫސް" އަކީ އަންބަކު އޭނާގެ ފިރިމީހާގެ ދެބެންގެ ދެދަރި ކޮއްކޮ އަކާއެކު ހިންގާ ލޯބީގެ ގުޅުންތަކެއް ދައްކުވައިދޭނެ ފިލްމެކެވެ.

"ހާސާ" އަކީ ފާތިމަތު އާޒިފާ(އަޒޫ) ލީޑު ރޯލުން ފެނިގެންދާނެ ޑްރާމާ ސިލްސިލާ އެކެވެ. އެ ޑްރާމާ ސީރީޒްގެ މާ ގިނަ ވާހަކަތަކެއް މީޑިއާތަކަށް ހާމަކޮށްފައި ނުވި ނަމަވެސް އޭގެން ފިލްމީ ދާއިރާގެ ނަން މަޝްހޫރު ފިލްމީ ތަރިންގެ އިތުރުން މުޅިން އާ ފަންނާނުންގެ އެކްޓިން ވެސް ފެންނާނެ ކަމަށް ހަބަރުތައް ބުނެއެވެ. "ހާސާ" ޑައިރެކްޓްކުރަނީ ފިލްމީ ތަރި މުހައްމަދު މަނިކެވެ.

ބައިސްކޯފަކީ ގިނަ ދިވެހި ފިލްމުގެ އިތުރުން ލަވަ، ޑްރާމާ އަދި ކުޑަ ކުދިންގެ ޕްރޮގްރާމްތަކުގެ އިތުރުން ޝައުގުވެރި ޝޯވ ތަކެއް ގެނެސްދޭ އެޕެއްކަން ފާހަގަކޮށްލެވެއެވެ. ގިނަ ބަޔަކު އެ އެޕް ބޭނުން ކުރަމުން އަންނަ އިރު ބައިސްކޯފަކީ ދިވެހި ފިލްމީ ދުނިޔެއަށް ބޮޑު އިންގިލާބީ ބަދަލެއް ގެނެސްދިން އެޕެކެވެ.

ފިލްމީ އަދި މިއުޒިކީ ފަންނާނުންގެ ވެސް މަސައްކަތްތައް އެ އެޕުން އެންމެ އަވަހަށް އަދި އެންމެ ގާތުން ބަލާލެވެން މިހާރު އޮތް އިރު މިދުވަސްކޮޅުގައި ވެސް އެ އެޕުން ރީތި ޑްރާމާތަކެއް ގެނެސްދޭކަން ފާހަގަކޮށްލެވެއެވެ.

ބައިސްކޯފުން ފުރަތަމަ ސްޓްރީމްކުރަން ފެށި ދިވެހި ފުރަތަމަ ވެބް ސީރީޒް "ހުވާ" އަށް ބެލުންތެރިންގެ ބޮޑު ތަރުހީބެއް ލިބުނު އިރު އެ އެޕުން ސްޓްރީމް ކުރި "އެހެނަސް" ޑްރާމާ އަށް ވެސް ގިނަ ބައެއްގެ ސަޕޯޓާއި ތަރުހީބު ލިބިގެންދިޔަކަން ފާހަގަކޮށްލެވެއެވެ.