ރައުދާ އާތިފް މަރުވި މައްސަލައިގެ ރިޕޯޓް ރައީސް އޮފީހަށް ފޮނުވައިފި

ބަންގްލަދޭޝްގައި މެޑިސިން ކިޔަވަމުންދިޔަ ދިވެހި މޮޑެލް ރައުދާ އާތިފްގެ މަރުގެ މައްސަލަ ބަލާ ނިންމާ އެ މައްސަލައިގެ ރިޕޯޓް ރައީސުލްޖުމްހޫރިއްޔާގެ އޮފީހަށް ފޮނުވާފައިވާކަަމަށް އެ މައްސަލަ ބަލަމުންދިޔަ މަރު ކޮމިޝަނުން ބުނެފި އެވެ.

އެ ކޮމިޝަނުން އެހެން ބުނެފައިވަނީ މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބެލުމަށް ރައީސުލްޖުމްހޫރިއްޔާ އުފައްދަވާފައިވާ ކޮމިޝަނުން ކޮށްފައިވާ ޓްވީޓެއްގަ އެވެ. ރައުދާ ދަންޖެހިފައި ހުއްޓާ ފެނިފައިވަނީ 2017 ވަނަ އަހަރުގެ މާރޗް މަހުގެ 29 ވަނަ ދުވަހު އޭނާ ދިރިއުޅެމުން ދިޔަ ކޮޓަރިންނެވެ.

ރައުދާ އަމިއްލަ އަށް މަރުވީ ނޫންކަމަށާއި ބަޔަކު އޭނާ މަރާލީ ކަމަށް ރައުދާގެ ބައްޕަ އަންނަނީ ބުނަމުންވެ. ރައުދާގެ ބައްޕަ މުހައްމަދު އާތިފް މިކަމުގައި ސުވާލު އުފެއްދުމާއެކު އެ މައްސަލަ އަލުން ވަނީ ތަހުގީގު ކުރަން ފަށާފަ އެވެ. މިހާތަނަށް ފަސް ފަހަރެއްގެ މަތިން، ބަންގްލަދޭޝްގެ ފުލުހުން ރައުދާގެ މަރު ތަހުގީގުކޮށްފައިވެއެވެ. އަދި މަރު ކޮމިޝަނަށް އެމައްސަލަ ހުށަހަޅާފައިވަނީވެސް އޭނާގެ ބައްޕަ އެވެ.

މިދިޔަ ސެޕްޓެމްބަރ މަހު ރައީސުލްޖުމްހޫރިއްޔާ ނޫސްވެރިންނާ ބައްދަލުކުރައްވާ ވާހަކަފުޅު ދައްކަވަމުން ވިދާޅުވެފައިވަނީ ރައުދާ އާތިފް ގެ މަރުގެ މައްސަލައިގެ ރިޕޯޓް ވަރަށް އަވަހަށް ހާމަކުރައްވާނެ ކަމުގަ އެވެ.