ގާސިމްގެ އެޑްވައިޒަރުގެ މަގާމުން ކާނަލް ނާޒިމް އިސްތިއުފާ ދެއްވައިފި

ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ އެޑްވައިޒަރުގެ މަގާމުން ކުރީގެ ޑިފެންސް މިނިސްޓަރ އަދި ރައްޔިތުންގެ މަޖިލީހުގެ ދަނގެތި ދާއިރާގެ މެމްބަރު މުހައްމަދު ނާޒިމް އިސްތިއުފާދެއްވައިފިއެވެ.

މައުލޫމާތު ލިބިފައިވާ ގޮތުގައި ގާސިމްގެ އެޑްވައިޒަރުގެ މަގާމުން ކާނަލް ނާޒިމް އިސްތިއުފާ ދެއްވީ، ޖުމްހޫރީ ޕާޓީގެ މިސްރާބު ހުރި ގޮތާއި މެދު ހިތްހަމަޖެހިވަޑައިނުގެންނެވެ. އޮންލައިން ނޫސް "މިހާރު" އަށް ނާޒިމް ވިދާޅުވީ، ގާސިމްގެ އެޑްވައިޒަރުގެ މަގާމުން އިސްތިއުފާ ދެއްވީ، މަސައްކަތްތައް ހުރިގޮތުން ޕާޓީގެ މަސައްކަތްތަކުގައި އުޅެން ދަތިތަކެއް ހުރުމުން ކަމަށެވެ.

އެޑްވައިޒަރުގެ މަގާމުން ނާޒިމް އިސްތިއުފާ ދެއްވިއިރު، ޕާޓީގެ ހަރަކާތްތަކާ ފެޔަށް ޖެހިވަޑައިގެން ހުންނަވާތާ ވަނީ ދުވަސްތަކެއް ވެފައެވެ. އެގޮތުން މި ފަހުން ޖުމްހޫރީ ޕާޓީއަށް މެމްބަރުން އިތުރުކުރުމަށް ބޭއްވި ގިނަ ހަރަކާތްތަކުގައި ނާޒިމް ބައިވެރިވެވަޑައިގެންފައެއް ނުވެއެވެ.

ޖުމްހޫރީ ޕާޓީގެ ލީޑަރު ގާސިމްގެ އެޑްވައިޒަރުގެ މަގާމަށް ނާޒިމް އައްޔަނުކުރެވުނީ 12 ނޮވެމްބަރު 2018 ގައެވެ. އެއީ އެމަނިކުފާނު އެ ޕާޓީއަށް ސޮއިކުރެއްވި ދުވަހެވެ. ނާޒިމްގެ އިތުރުން ދެން އެ ޕާޓީގައި ގާސިމްގެ އެޑްވައިޒަރުންގެ ގޮތުގައި ހަރަކާތެރިވަނީ ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދާއި އެމްޑަބްލިޔުއެސްސީގެ މެނޭޖިން ޑިރެކްޓަރު އާދަމް އާޒިމާއި ކުރީގެ ޕޮލިސް ކޮމިޝަނަރު އަދި ތިމަރަފުށީ ދާއިރާގެ މެމްބަރު އަބްދުﷲ ރިޔާޒުއެވެ.

ޖުމްހޫރީ ޕާޓީގެ އިސް ސަފުގައި މިހާރު ގިނައިން ހަރަކާތްތެރިވަނީ، ކުރީގެ ރައީސް ޔާމިންއާ އެކު ޕީޕީއެމްގައި ހަރަކާތްތެރިވި ފަރާތްތަކެވެ. އޭގެ ތެރޭގައި ރައީސް ޔާމީންގެ ވެރިކަން ދިފާއުކުރެއްވުމުގައި ހަރަކާތްތެރިވި ގިނަ މެމްބަރުންނާއި އެކްޓިވިސްޓުން ޖުމްހޫރީ ޕާޓީއަށް ސޮއިކުރައްވާފައިވާ ކަން ފާހަގަކުރެވެއެވެ.