ގާސިމް ވިދާޅުވަނީ އެމްޑީޕީއަށް ބަޖެޓް ކަމު ނުދިޔަކަމަށް!
6 ނޮވެމްބަރު 2019 | ބުދަ 06:43ގާސިމް ގެންދަވަނީ އެމްޑީޕީގެ ރައީސް މުހައްމަދު ނަޝީދުއަށް ނިސްބަތްކޮށް، ސީދާ ގޮތުންނާއި ނުސީދާކޮށް ބަހުގެ ހަމަލާތައް ދެމުން
ޖުމްހޫރީ ޕާޓީގެ ލީޑަރު ގާސިމް އިބްރާހީމް
ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހުގެ ސަރުކާރުން އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށަހަޅާފައިވާ ދައުލަތުގެ ބަޖެޓް އެމްޑީޕީއަށް ކަމުނުދިޔަ ކަމަށް މަޝްހޫރު ވިޔަފާރިވެރިޔާ، މަހުޖަނު ގާސިމް އިބްރާހީމް ވިދާޅުވެއްޖެ އެވެ.
ޖުމްހޫރީ ޕާޓީއަށް މެމްބަރުން އިތުރުކުރުމަށް ހިންގާ ހަރަކާތުގެ ތެރެއިން އެޕާޓީއަށް މެމްބަރުން ސޮއި ކުރުމަށް އަންގާރަ ދުވަހުގެ ރޭ ބޭއްވި ޖަލްސާގައި ވާހަކަ ދައްކަވަމުން ގާސިމް ވިދާޅުވީ، ރައީސް ސޯލިހުގެ ސަރުކާރުން 20 ބިލިއަން ރުފިޔާގެ ބަޖެޓެއް ހުށަހެޅުއްވުމުން އެމްޑީޕީއަށް ކަމު ނުދިޔަ ކަމަށެވެ. އަދި 37 ބިލިއަން ރުފިޔާގެ ބަޖެޓެއް ހުށަހެޅުއްވުމުންވެސް ކަމު ނުދިޔަ ކަމަށެވެ.
މީގެއިތުރުން ގާސިމް ވަނީ ރައީސް އިބްރާހީމް މުހައްމަދު ސޯލިހު އެމަގާމުން ވަކިކުރަން ރައްޔިތުންގެ މަޖިލީހުގެ ތެރެއިންނާއި އެމްޑީޕީގެ އެތެރެއިން އަދި ބޭރުންވެސް މަސައްކަތް ކުރަމުންދާ ކަމަށެވެ.
އެމްޑީޕީއަށް ބަޖެޓް ކަމުނުދާ ވާހަކަ ގާސިމް ވިދާޅުވިއިރު، މަޖިލީހުގައި ސާފު މެޖޯރިރިޓީ އޮތީ އެމްޑީޕީގެ އަތުގަ އެވެ. ގާސިމަށް ލިބިފައިވަނީ މަޖިލީހުގެ 87 މެމްބަރުން ހިމެނޭ މަޖިލީހުން އެންމެ ފަސް ގޮނޑިއެވެ. އަދި އެމްޑީޕީއަށް ބަޖެޓް ކަމުނުދާނަމަ، އެބަޖެޓަކީ މަޖިލީހުގެ މެޖޯރިޓީ އޮތްގޮތުން ފާސްކުރާނެ ބަޖެޓެއް ވެސް ނޫނެވެ.
ނަމަވެސް ގާސިމްގެ އެވާހަކަތަކާއި ހިލާފަށް ދައުލަތުގެ ބަޖެޓާ ގުޅިގެން އެމްޑީޕީގެ މެމްބަރުންގެ މާބޮޑު ކަންބޮޑުވުމެއް ނެތްކަން ހާމަވެއެވެ. އަދި އެބަޖެޓް ދިރާސާ ކުރުމުގެ މަސައްކަތުގައި އިސްކޮށް އުޅުއްވަނީ ވެސް އެމްޑީޕީގެ މެމްބަރުންނެވެ. ބަޖެޓް ދިރާސާކޮށް، ބަޖެޓް ފާސްކުރާނީ ރައްޔިތުންގެ މަޖިލީހުން ނެވެ.
ރައީސް އިބްރާހީމް މުހައްމަދު ސޯލިހާއި އެމްޑީޕީއާ އަދި ހާއްސަކޮށް އެމްޑީޕީގެ ރައީސް، ރައީސް މުހައްމަދު ނަޝީދުއާ ދޭތެރެޖެހޭ ފަދަ ގޮތްތަކަށް، މިހާރަކަށް އައިސް ގާސިމް ގެންދަވަނީ ވާހަކަ ދައްކަވަމުންނެވެ.
ގާސިމް ވަނީ ސަރުކާރުގެ ތެރޭގައި ހުންނަވައި، 2023 ވަނަ އަހަރުގެ ރިޔާސީ އިންތިހާބަށް ތައްޔާރު ވުމުގެ ގޮތުން މަސައްކަތް ވެސް ފަށާފަ އެވެ. އަދި ގާސިމް ގެންދަވަނީ އެމްޑީޕީގެ ރައީސް މުހައްމަދު ނަޝީދުއަށް ނިސްބަތްކޮށް، ސީދާ ގޮތުންނާއި ނުސީދާކޮށް ބަހުގެ ހަމަލާތައް ދެމުން ނެވެ.
