އިންޑިއަން އޯޝަން ރިމް އެސޯސިއޭޝަން(އަޔޯރާ)ގެ 19 ވަނަ ކައުންސިލް އޮފް މިނިސްޓަރސް ބައްދަލުވުމުގައި ރާއްޖެއިން ފުރަތަމަ ފަހަރަށް ބައިވެރިވާން ނިންމައިފިއެވެ.

މި މަހުގެ 5 އިން 7 އަށް ޔުނައިޓެޑް އަރަބް އެމިރޭޓްސްގެ ވެރިރަށް އަބޫދާބީގައި ބާއްވާ މި ބައްދަލުވުމުގައި ދިވެހިރާއްޖޭގެ ފަރާތުން ބައިވެރިވެ ވަޑައިގަންނަވަނީ ޚާރިޖީ ވަޒީރު ޢަބްދުﷲ ޝާހިދެވެ. މިބައްދަލުވުމުގައި މިނިސްޓަރ ޝާހިދު ތަޤްރީރު ކުރެއްވުމަށް ހަމަޖެހިފައިވާކަމަށް މިނިސްޓްރީ އޮފް ފޮރިން އެފެއަރޒުން ބުނެއެވެ. ފޮރިން މިނިސްޓްރީން މަޢުލޫމާތުދޭ ގޮތުގައި ރާއްޖެއިން އަޔޯރާގައި ރަސްމީކޮށް ބައިވެރިވުމަށް ހަމަޖެހިފައިވަނީވެސް މި ސަމިޓުގެ ތެރެއިންނެވެ.

މި ބައްދަލުވުމަށް ތައްޔާރުވުމުގެ ގޮތުން އަންގާރަ ދުވަހު އަޔޯރާގެ މެމްބަރު ޤައުމުތަކުގެ އިސް މަސްއޫލުވެރިންގެ ބައްދަލުވުމެއް ބާއްވާފައިވާއިރު، މި ބައްދަލުވުމުގައި ރާއްޖެ ތަމްސީލުކުރެއްވީ ޔޫއޭއީގައި ހުންނަވާ ދިވެހި ސަފީރު ޑރ.ހުސައިން ނިޔާޒެވެ.

އިންޑިއަން އޯޝަން ރިމް އެސޯސިއޭޝަން (އަޔޯރާ) އަކީ އިންޑިއާ ކަނޑާއި ގުޅިފައިވާ ޤައުމުތަކުގެ ޖަމްޢިއްޔާއެވެ. މި ޖަމްޢިއްޔާ އުފެދިފައިވަނީ 1997 ވަނަ އަހަރުގެ މާރޗް މަހުގައެވެ.

މި ޖަމްޢިއްޔާ އުފެއްދުމުގެ ޚިޔާލު އެންމެ ފުރަތަމަ ފާޅުކުރެއްވީ ދެކުނު އެފްރިކާގެ އޭރުގެ ރައީސް ނެލްސަން މަންޑޭލާ 1995 ވަނަ އަހަރު އިންޑިއާއަށް ކުރެއްވި ދަތުރުފުޅެއްގައެވެ. މި ޖަމްޢިއްޔާގެ ނިންމުންތައް ނިންމާ އެންމެ އިސް ގުނަވަނީ ކޮންމެ އަހަރަކު އެއްފަހަރު ބާއްވާ ޚާރިޖީ ވަޒީރުންގެ ބައްދަލުވުމެވެ.