މިއަހަރުގެ ބަޖެޓްގައި ބޮޑުވި 5.5 ބިލިއަން ރުފިޔާގެ އައު ކަންތައްތައް ހިމެނޭ: ސަރުވަޝް
5 ނޮވެމްބަރު 2019 | އަންގާރަ 12:31މިއަހަރު ގިނަ ކެޕިޓަލް މަޝްރޫއުތަކެއް ނިމި އޮޕަރޭޝަން ފެށޭނެ
ފިނޭންސް މިނިސްޓްރީގެ ޗީފް ފައިނޭންސަލް ބަޖެޓް އެގްޒެކްޓިވް އަހުމަދު ސަރުވަޝް އާދަމް
އަންނަ އަހަރަށް ލަފާކުރާ ދައުލަތުގެ ބަޖެޓުގައި އިތުރު 5.5 ބިލިއަން ރުފިޔާ ހިމަނާފައިވަނީ، ސަރުކާރުންދޭ ޚިދްމަތްތަށް ފުޅާކުރުމަށާއި، އަދި ބައެއް ކެޕިޓަލް މަޝްރޫޢުތައް ނިމި، އޭގެ ޚަރަދުތައް ބަޖެޓުގައި ހިމަނަންޖެހުމުން ކަމަށް ފިނޭންސް މިނިސްޓްރީގެ ޗީފް ފައިނޭންޝަލް ބަޖެޓް އެގްޒެކްޓިވް އަޙްމަދު ސަރުވަޝް އާދަމް ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި، ސަރުވަޝް ވިދާޅުވީ 2019 ވަނަ އަހަރު 32 ބިލިއަން ރުފިޔާގެ ބަޖެޓެއް ފާސްކުރި ނަމަވެސް އިތުރު 5.5 ބިލިއަން ރުފިޔާއާއެކު އަންނަ އަހަރުގެ ބަޖެޓުގެ ގޮތުގައި 37.5 ބިލިއަން ރުފިޔާ ހުށަހަޅާފައިވަނީ އައު ކަންތައްތައްތަކެއް ހިމަނައިގެންކަމަށެވެ.
ސަރުވަޝް ވިދާޅުވީ ބަޖެޓް ބޮޑުކުރަން ޖެހުނު ސަބަބު ތަކުގެ ތެރޭގައި މިއަހަރު ގިނަ ކެޕިޓަލް މަޝްރޫއުތަކެއް ނިމި އޮޕަރޭޝަން ފަށަން ތައްޔާރުވަމުންދާ ދިއުން ހިމެނޭކަމަށެވެ. އެގޮތުން އަންނަ އަަހރު ވަރަށް ގިނަ އެއަރޕޯޓުތަކުގެ އޮޕަރޭޝަންތައް ފަށަން ތައްޔާރުވަމުންދާއިރު، ކުޅުދުއްފުށްޓާއި މާވަރުލާއި ފުނަދޫ އެއަރޕޯޓުގެ އޮޕަރޭޝަން ފުލް ސްކޭލްގަ ކުރިއަށްދާނެ ކަމަށެވެ. އަދި މިއަހަރު ފެށި ބައެއް މަޝްރޫތަކަށް އަންނަ އަހަރުގެ ބަޖެޓުން ޚަރަދުކުރަން ޖެހުން އެއީވެސް ބަޖެޓު ބޮޑުވުމުގެ އެއް ސަބަބުގެ ގޮތުގައި ސަރުވަޝް ފާހަގަކުރެއްވިއެވެ.
ސަރުވަޝް ވިދާޅުވީ 2019 ވަނަ އަހަރު 32 ބިލިއަން ރުފިޔާ ޚަރަދުކުރެވޭއިރު، ހަމަ އަންނަ އަހަރުވެސް 32 ބިލިއަން ރުފިޔާ ޚަރަދުވާނެކަމަށް ލަފާކުރެވޭކަމަށެވެ. އެހެންކަމުން ރިކަރެންޓް ޚަރަދު ވަކި ކުޑަ ނުކުރެވޭނެ ކަމަށް ސަރުވަޝް ވިދާޅުވިއެވެ.
ސަރުވަޝް ވިދާޅުވީ އަލަށް ފަށާ މަޝްރޫއުތަކުގެ ޚަރަދުވެސް 5 ބިލިއަނަށް އަރާނެ ކަމަށާއި، އަލަށް ފަށާ ޙަރަކާތްތަކުގެ ޢަދަދު މިބަޖެޓުން 411 މިލިއަން ރުފިޔާއަށް އަރާ ކަމަށެވެ. އެހެންކަމުން ޖުމްލަ ގޮތެއްގައި 5.5 ބިލިއަން ރުފިޔާގެ އައު ކަންތައްތައް ބެޖެޓްގައި ހިމެނޭއިރު ޖުމްލަ ބަޖެޓް 37.5 ބިލިއަންއަށް އަރާނެ ކަމަށް އޭނާ ވިދާޅުވިއެވެ.
