ޤާޟީ ހައިލަމް، ކުރެވުނު މޮޔަހީވެ ދެދުވަސް ފަހުން މަޢާފަށް އެދިވަޑައިގެންފި
ފޮޓޯލާފައިވަނީ އެ ފޮޓޯގައި ތިބީ ކޮން ބައެއްކަން ބެލުމަކާއި ނުލާ ކަމަށް ވިދާޅުވި
ހައިލަމް ހިއްސާކުރަައްވަފއިވާ ފޮޓޯ
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙާއި ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުޙައްމަދު ނަޝީދުގެ ކަރުފުޅުގައި ޗޭނުޖަހާފައިވާ ފޮޓޮއެއް ކްރިމިނަލް ކޯޓުގެ މުވައްޒަފުންގެ ވައިބަރ ގުރޫޕަށް ލީ މައްސަލައާއި ގުޅިގެން ކްރިމިނަލް ކޯޓުގެ އިސް ޤާޟީ މުޙައްމަދު ހައިލަމް މަޢާފަށް އެދިއްޖެއެވެ.
ޤާޟީ ހައިލަމް މަޢާފަށް އެދިވަޑައިގަތީ މަޢާފަށް އެދި އެކޯޓުގެ ވެބްސައިޓުގައި ޢާންމު ކުރެއްވި ބަޔާނެއްގައެވެ. އެބަޔާނުގައި ހައިލަމް ވިދާޅުވެފައިވަނީ، ނަޞްރުގެ ދުވަހުގެ ތަހުނިޔާ ކިޔުމުގެ ގޮތުން ފޮޓޯ އެ ގްރޫޕަށް ލާފައިވަނީ އެ ފޮޓޯގައި ހ. ހާޖަރާގޭ ޢަބްދުﷲ ލުޠުފީ ހުރިކަން އެނގުމުން ދެން އެ ފޮޓޯގައި ތިބީ ކޮން ބައެއްކަން ބެލުމަކާއި ނުލާ ކަމަށެވެ. އަދި އެފޮޓޯގައި އެފަދަ ކުރެހުމެއް ހުރެދާނެ ކަމަށް ވިސްނާލެވިފައިނުވާކަމަށް ހައިލަމްގެ ބަޔާނުގައިވެއެވެ.
އެހެންކަމުން، އެކަމަށްޓަކައި ރައީސުލް ޖުމްހޫރިއްޔާ އިބްރާހިމް މުޙައްމަދު ސާލިޙާއި ރައީސް ނަޝީދުގެ އިތުރުން ދިވެހި ރާއްޖޭގެ އެންމެހާ ލޮބުވެތި ރައްޔިތުންގެ އަރިހުން މަޢާފަށް އެދޭކަމަށް ބަޔާނުގައި ވެއެވެ.
އަދި އެފޮޓޯ ޝެއަރ ކުރި ވައިބަރ ގްރޫޕަކީ ކްރިމިނަލް ކޯޓުގެ މުވައްޒަފުންގެ ޕްރައިވެޓް ގްރޫޕެއް ނަމަވެސް އެ ފޮޓޯ ޝެއަރ ކޮށްފައިވަނީ ސޯޝަލް މީޑިއާގައި ނަޞްރުގެ ދުވަހުގެ ތަހުނިޔާ ކިޔުމުގެ ގޮތުން ކަމަށްބުނެ ސިޔާސީ ބައެއް ފަރާތްތައް ވަކިން ޚާއްޞަކޮށް ރައްޔިތުންގެ މަޖިލީހުގެ ބައެއް މެންބަރުން އޭނާ ބަލަމުންދާ މައްސަލައަކަށް ނުފޫޒުފޯރުމުގެ ގޮތުން މައްސަލައިގައި ރިޝްވަތު ނަގާފައިވާ ކަމަށް ތުހުމަތުކޮށް ރައްޔިތުންގެ މަޖިލީހުގެ ތަޅުމުގައި ވާހަކަ ދައްކަވާފައިވާކަން ބަޔާންކޮށްފައިވެއެވެ.
އަދި އެފަރާތްތަކުގެ ޢަމަލަކީ ކޯޓުގައި ކުރިއަށްދާ މައްސަލައަށާއި ފަނޑިޔާރެއްގެ ޙައިޞިއްޔަތުން އޭނާ ކުރަމުންދާ މަސައްކަތަށް ނުފޫޒު ފޯރުވުމުގެ ގޮތުން ކޮށްފައިވާ ޢަމަލުތަކެއް ކަމުގައިވީނަމަވެސް، މަޤާމުގެ ހައިޞިއްޔަތު ބޭނުންކޮށްގެން އެއްވެސް ފަރާތަކަށް ނާޖާއިޒު މަންފާއެއް ހޯދައިދިނުމަށް އެއްވެސް އިރެއްގައި އެއްވެސް ސިފައެއްގައި މަސައްކަތް ކޮށްފައި ނުވާނެ ކަމަށް ބަޔާނުގައިވެއެވެ. ހަމަ އެހެންމެ އެފަދަ ކަމެއްގައި ބައިވެރިވެފައި ނުވާނެ ކަމުގެ ޔަޤީންކަން ދިވެހި އެންމެހާ ރައްޔިތުންނަށް އަރުވާ ކަމަށް ބަޔާނުގައި ވެއެވެ.
ހައިލަމް މަޢާފަށް އެދިވަޑައިގެންފައިވަނީ މިމައްސަލައިގައި އޭނާގެ މައްޗަށް ތަހުޤީޤެއް ހިންގުމަށް މޯލްޑިވިއަން ޑިމޮކްރެޓިކް ޕާރޓީ (އެމްޑީޕީން) ގޮވާލާފައިވަނިކޮށެވެ.
