ކަށިގަނޑު ނުފުމޭނެކަމަށް 100 ފަހަރު ލިޔުމަށް މެމްބަރު ތޯރިޤަށް އަންގަވައިފި
4 ނޮވެމްބަރު 2019 | ހޯމަ 10:03މަހިބަދޫ ދާއިރާގެ މެމްބަރ އަހުމަދު ތޯރިގަށް އެގޮތަށް އެންގެވީ ތަކުރާރުކޮށް ކަށިގަނޑު ފުމެމުން ގެންދަވާތީ
ަމަހިބަދޫ ދާއިރާގެ މެމްބަރ އަހުމަދު ތޯރިޤް
ރައްޔިތުންގެ މަޖިލީހުގެ މިއަދުގެ ޖަލްސާގައި މަހިބަދޫ ދާއިރާގެ މެމްބަރ އަހުމަދު ތޯރިޤް ތަކުރާރުކޮށް ކަށިގަނޑު ފުމެމުން ގެންދަވާތީ މަޖިލީހުގެ ރައީސް، ރައީސް މުހައްމަދު ނަޝީދު އެމެމްބަރަށް އަދަބެއް ދެއްވައިފިއެވެ.
ރައީސް ނަޝީދު ވިދާޅުވީ އަދަބެއްގެ ގޮތުން މަޖިލީހުގެ ތަޅުމުގައި ކަށި ގަނޑު ނުފުމޭނެކަމަށް ސަތޭކަފަހަރު ލިޔުމަށް އަންގަވާފަ އެވެ.
ކުރިމަނަލް ކޯޓުގެ އިސްގާޒީ އަހުމަދު ހައިލަމް ވައިބަރ ގްރޫޕެއްގައި ނަސްރުގެ ދުވަހުގެ ތަހުނިޔާ ކިޔުއްވާފައިވާ ގޮތުގެ މެސެޖް އާންމުވުމާއި ގުޅިގެން މިއަދުގެ ޖަލްސާގައި އެމްޑީޕީ މެމްބަރުން ވަނީ ވަރަށް ބޮޑަށް ހައިލަމަށް ފާޑުވިދާޅުވެފަ އެވެ. އެއާއެކު ޕީއެންސީ އަދި ޕީޕީއެމްގެ މެމްބަރުން ވަނީ މަޖިލީހުގެ ތަޅުމުގައި އަޑުގަދަ ކުރައްވާފަ އެވެ.
ކްރިމިނަލް ކޯޓުގައި ނުނިމި ހުރި މައްސަލަތަކާއި ގުޅޭ ރިޕޯޓާއި ގުޅޭ މައްސަލަ ޖުޑީޝަރީ ކޮމެޓީން ނިންމި ގޮތުގެ ރިޕޯޓަށް ބަހުސްކުރައްވަމުން އެމްޑީޕީ މެމްބަރުން ވަނީ ރައީސް ޔާމީން އާއި އިދިކޮޅު ފަރާތްތަކަށް ފާޑު ވިދާޅުވެ ވާހަކަދައްކަވާފަ އެވެ.
ކުރީގެ ރައީސް ޔާމީންގެ މައްޗަށް ކުރާ ޚިޔާނާތުގެ މައްސަލައިގެ ޝަރީޢަތުގެ ހުކުމް އިއްވުން މާދަމާ އޮންނައިރު އެމައްސަލަ ބައްލަވާ ގާޒީ އަކީ އެކޯޓުގެ އިސްގާޒީ އަހުމަދު ހައިލަމް އެވެ. އެމްޑީޕީ މެމްބަރުން ވިދާޅުވަމުން ގެންދަވަނީ ގާޒީ ހައިލަމް އެމައްސަލާގައި ރައީސް ޔާމީނާ އެއްކޮޅަށް ހުކުމް އިއްވުމަށް ފައިސާ ނަގާފައިވާކަމަށެވެ.
