ޤާނޫނާއި ޚިލާފަށް އެއްވެ އުޅުމުގެ ފުރުސަތު ނުދޭނަން : ފުލުހުން

ސުލްހަވެރިކަމާއެކު އެއްވެ އުޅުމުގެ ޤާނޫނާއި ޚިލާފަށް އެއްވުންތައް ކުރިޔަށް ގެންދިޔުމުގެ ފުރުސަތު މޯލްޑިވްސް ޕޮލިސް ސަރވިސް އިން ނުދޭނެކަމަށް އެ ސަރވިސްއިން ބުނެފި އެވެ.

ފުލުހުން ކޮށްފައިވާ ޓްވީޓެއްގައި ބުނެފައިވަނީ އެއްވުންތައް ކުރިޔަށް ގެންދިޔުމުގައި ޤާނޫނީ ތަރަހައިގެ ތެރެއިން ކުރިޔަށް ގެންދިޔުމަށް އިލްތިމާސްކުރާ ކަމުގަ އެވެ. ފުލުހުން މިފަދައިން ބުނެފައި މިވަނީ މިރޭ "ބަޑިބުރާސްފަތި" މިނަމުގައި އިދިކޮޅު ޕީޕީއެމް އަދި ޕީއެންސީން ޕީޕީއެމްގެ އޮފީސް ދޮރުމަތީގައި އެއްވުމެއް ބާއްވަން ނިންމާފައި ވަނިކޮށެވެ.

އެމްޑީއެންގެ ރިޕޯޓާއި ދެކޮޅަށް މިދިޔަ މަހު ތެރޭގައި ޕީޕީއެމްގެ އޮފީސް ދޮރުމަތީގައި ބޭއްވި އެއްވުމަށްފަހު ފުލުހުން ވަނީ އެޕާޓީގެ އޮފީސް ދޮރުމަތީގައި ޓޭޕް ދަމާފައެވެ. އަދި މިދިޔަ މަހުގެ 26ވަނަ ދުވަހު ފުލުހުން ނެރުނު ބަޔާނެއްގައިވެސް ވަނީ ގާނޫނާއި ހިލާފަށް އެއްވުންތައް ބާއްވަން ފުރުސަތު ނުދޭނެ ކަމަށް ބުނެފައެވެ. ފުލުހުން އޭރު ބުނެފައިވަނީ ހިޔާލުފާޅުކުރުމުގެ އިމުން ބޭރުން، އެއްވުން މަނާ ސަރަހައްދުތަކަށް އެއްވުމާއި، ނޫސްވެރިންގެ ބައްދަލުވުން ބޭއްވުމާއި އަދި އުޅަނދުފަހަރުގައި އަޑުގަދަކުރާ ބޭނުންކޮށްގެން ހިނގާލުމާއި އުޅަނދުބުރު ބޭއްވުންފަދަ ކަންކަން އިންތިޒާމުކޮށް ބާއްވަމުން ގެންދާކަމާއި، އެފަދަ ބައެއް އެއްވުންތަކުގައި ގާނޫނުން މަނާކޮށްފައިވާ ކަންކަން ކުރަމުންދާކަން ފާހަގަކުރެވިފައިވާ ކަމަށެވެ. އަދި ޤާނޫނާއި ޚިލާފަށް އެއްވުމުގެ ފުރުސަތު ނުދޭނެކަމަށާއި ޤާނޫނާއި ޚިލާފުވާ ފަރާތްތަކާއި މެދު ޤާނޫނީ އިމުގެ ތެރެއިން ފިޔަވަޅު އަޅާނެކަމަށް ވަނީ ބުނެފައެވެ.

އަނެއްކޮޅުން ބަލާއިރު ކުރިން ހުއްދަ ހޯދުމަކާ ނުލައި އެއްވެ އުޅުން މަނާކުރުމުގެ ގޮތުން ރައީސް އަބްދުﷲ ޔާމީންގެ ސަރުކާރުން ސުލްހަވެރިކަމާ އެކު އެއްވެ އުޅުމުގެ މިނިވަންކަމުގެ ގާނޫނަށް ގެނައި އިސްލާހު ބާތިލްކުރުން ލަސްވަމުންދާތީ ޑީއާރްޕީން ވަނީ ކަންބޮޑުވުން ފާޅުކޮށްފަ އެވެ. މިއިސްލާހުގެ ދަށުން މާލޭގައި މުޒާހަރާކުރެވޭ ސަރަހައްދުގެ ގޮތުގައި ކަނޑައެޅި ހަމައެކަނި ސަރަހައްދަކީ ކާނިވާ ސަރަހައްދެވެ.

މިއިސްލާހު ބާތިލްކުރުމަށް ޑީއާރުޕީގެ ލީޑަރ އަދި ކާށިދޫ ދާއިރާގެ މެމްބަރ އަބްދުﷲ ޖާބިރު ރައްޔިތުންގެ މަޖިލީހަށް ހުށަހެޅުއްވީ މިދިޔަ އޮގަސްޓުމަހުގެ ތެރޭގަ އެވެ. މި އިސްލާހު ދިރާސާކުރުމަށް ކޮމެޓީއަށް ވަނީ ފޮނުވާފަ އެވެ.