މާލޭގެ ސީޕޯޓްގައި ބޯޑަރ ކޮންޓްރޯލް ޑިވައިސް ގާއިމުކޮށްފި
2 ނޮވެމްބަރު 2019 | ހޮނިހިރު 11:44މިނިޒާމުގެ ތެރެއިން ބައެއް ކަންކަން އޮޓަމޭޓް ކުރެވޭނެ
މާލޭ ސީޕޯޓްގައި ގާއިމުކޮށްފައިވާ ބޯޑާ ކޮންޓްރޯލް ޑިވައިސް
މާލޭގެ ސީޕޯޓްގައި ބޯޑަރ ކޮންޓްރޯލް ޑިވައިސް ގާއިމުކޮށް ކަނޑުމަގުން އެތެރެވާ މީހުންގެ މައުލޫމާތާއި، އަންނަ އުޅަނދުތައް ބަލައި ޗެކްކުރުން ވަރުގަދަކޮށްފިއެވެ.
އިމިގްރޭޝަނުން ބުނީ މި ނިޒާމުގެ ތެރެއިން ކަނޑުމަގުން އެތެރެވާ މީހުންގެ މައުލޫމާތާއި، އަންނަ އުޅަނދުތައް ފަސޭހައިން ދެނެގަނެވޭނެ ކަމަށާއި، ގަވާއިދާ ޚިލާފަށް އެތެރެވާން މަސައްކަތްކުރާ މީހުންގެ އިތުރުން ކުށުގެ ރިކޯޑު އޮތުމާ ގުޅިގެން ރާއްޖެއަށް އެތެރެވުން މަނާ މީހުން ފަސޭހައިން ދެނެގަނެވޭނެ ކަމަށެވެ.
މިގާއިމް ކުރެވުނު ޑިވައިސްއާ ބެހޭ ގޮތުން އިމިގްރޭޝަން ކޮންޓްރޯލަރ މުހައްމަދު އަހުމަދު ހުސައިން (ހަނަފީ) ވިދާޅުވީ މާލޭގެ ސީޕޯޓްގައި ބޯޑަރ ކޮންޓްރޯލް ޑިވައިސް ގާއިމުކުރެވުމަކީ ލިބުނު ވަރަށް ބޮޑު ކާމިޔާބީއެއް ކަމަށެވެ. އަދި ބޯޑަރ ކޮންޓްރޯލް ޑިވައިސްގެ ސަބަބުން ކަނޑުމަގުން އެތެރެވާ މީހުންގެ މައުލޫމާތާއި، އަންނަ އުޅަނދުތައް ބެލުމުގެ ނިޒާމު ހަރުދަނާވެ، ރައްކާތެރިކަން ބޮޑަށް ކަށަވަރުކުރެވޭނެ ކަމަށެވެ.
ބޯޑަރ ކޮންޓްރޯލް ޑިވައިސް ގާއިމުކުރުމުގެ ކުރިން ކަނޑުމަގުން ރާއްޖެއަށް އަންނަ މީހުންގެ މައުލޫމާތު އެންޓަކުރަމުން ދިޔައީ މެނުއަލްކޮށް ނަމަވެސް މި ނިޒާމުގެ ތެރެއިން ބައެއް ކަންކަން އޮޓަމޭޓް ކުރެވި މަސައްކަތްތައް ހަލުވި ކުރެވޭނެ ކަމަށް އިމިގްރޭޝަނުން ބުންޏެވެ.
ރާއްޖޭގެ ބޯޑަރު ބެލެހެއްޓުން ވަރުގަދަކުރުމަށް މިސަރުކާރުން ދަނީ ގިނަ މަސައްކަތްތައް ކުރަމުންނެވެ. އެހެންކަމުން އަދި މާލޭގެ ޕޯޓްގައި ބޯޑަރ ކޮންޓްރޯލް ޑިވައިސް ގާއިމުކޮށްފައިވީ ނަމަވެސް ރާއްޖޭގެ ބައިނަލްއަގްވާމީ ހުރިހާ ސީޕޯޓުތަކުގައި މިޑިވައިސް ގާއިމުކުރާނެއެވެ.
މާލޭގެ ސީޕޯޓްގައި ބޯޑަރ ކޮންޓްރޯލް ޑިވައިސް ގާއިމުކޮށްފައިމިވަނީ ކަނޑުމަގުން އެތެރެވާ މީހުންގެ މައުލޫމާތު ސިސްޓަމެއްގައި ރައްކާކުރެވިފައި ނެތުމުން ކަންބޮޑުވުން ފާޅުކޮށްފައިވަނިކޮށެވެ. އިމިގްރޭޝަނުން ބުނެފައިވަނީ 2013 ގައި ސިސްޓަމެއް ގާއިމުކޮށް، 7 އަހަރުވިއިރު ވެސް އެ ސިސްޓަމުން ކަނޑުމަގުން މީހުން އެތެރެވުމުގައި މޮޑިއުލެއް ހެދިފައި ނުވާކަމަށެވެ. އިމިގްރޭޝަން އިން ބުނީ އެ ސަބަބަށްޓަކައި ކަނޑުމަގުން އެތެރެވާ އެއްވެސް ފަރާތެއްގެ މައުލޫމާތެއް ނުހުންނާނެ ކަމަށެވެ.
