ބުދަ ދުވަހުގެ ހެނދުނުގެ ނިޔަލަށް އައިޖީއެމްއެޗުގެ ފްލޫ ކްލިނިކްގައި އެޑްމިޓްކޮށްފައި ވަނީ ހަތަރު މީހުން ކަމަށާއި އޭގެ ތެރޭގައި ތިން ކުޑަކުދިން ހިމެނޭ ކަމަށް އައިޖީއެމްއެޗުން ހާމަކޮށްފި އެވެ.
އައިޖީއެމްއެޗުން ބުނީ މިއަދުގެ ހެނދުނު ފަހެއް ޖެހުގައި ހަމައަށް ކިޔުގައި ގިނަ އަދަދެއްގެ ބަޔަކު ތިބި ކަމަށާއި ރޭ ދަންވަރުގައި ވެސް ގިނަ އަދަދެއްގެ ކުޑަކުދިން ޑޮކްޓަރަށް ދެއްކުމަށް އެތަނަށް ދިޔަ ކަމަށެވެ. ތާޖުއްދީން ސްކޫލުގައި ގާއިމްކޮށްފައިވާ ފްލޫ ކްލިނިކްގައި ޑޮކްޓަރަށް ދެއްކުމުގެ އިންތިޒާމް ހަަމަޖެހިފައިވާ އިރު ދުވާލުގެ ވަގުތުތަކުގައި ފަސް ޑޮކްޓަރުން ނުވަތަ ހަ ޑޮކްޓަރުން ބަލި މީހުން ބެލުމުގައި ތިބޭނެ ކަމަށް އައިޖީއެމްއެޗުން ބުނެއެވެ.
އެ ކްލިނިކުން 24 ގަޑިއިރު ހިދުމަތް ލިބޭނެ ކަމަށާއި ޚިދުމަތް ހޯދަން އަންނަ ބަލިމީހުންގެ ތެރެއިން އެޑްމިޓް ކުރަން ޖެހިއްޖެ ހާލަތެއްގައި، އައިޖީއެމްއެޗުގައި އެޑްމިޓްކުރެވޭނެ ކަމަށް އެ ހޮސްޕިޓަލުުން ބުނެއެވެ.
ރާއްޖޭގައި ހަލުއިކަމާ އެކު ފެތުރެމުންދާ އެޗް1އެން1 އިންފްލުއެންޒާއާ ގުޅިގެން އެ ހޮސްޕިޓަލުގައި ޗުއްޓީގައި ތިބި ފަރާތްތަކަށާއި މިދުވަސްވަރު ޗުއްޓީއަށް ދިއުމަށް ހަމަޖެހިފައިވާ ފަރާތްތަކަށް ވެސް ޗުއްޓީއަށް ނުގޮސް މަޑުކޮށްލުމަށް އަންގާފައި ވަނީ ބަލި މީހުންނަށް އައިޖީއެމްއެޗުން ވީ އެންމެ ރަގަޅަށް ޚިދުމަތް ދިނުމަށް ކަމަށް އައިޖީއެމްއެޗުން ބުނެ އެވެ.
ފްލޫ ކްލިނިކުގައި ޑޮކްޓަރުން ގިނަ ވާނީ ދުވާލުގެ ވަގުތުގައި ކަމަށް ވާތީ ހުރިހާ ފަރާތްތަކުން ވެސް ރޭގަނޑު ޑޮކްޓަރަށް ދެއްކުމުގެ ބަދަލުގައި ދުވާލުގެ ވަގުތުތަކުގައި ޑޮކްޓަރަށް ދެއްކުމަށް އައިޖީއެމްއެޗުން ވަނީ އިލްތިމާސްކޮށްފަ އެވެ.
އިއްޔެގެ ނިއަލަށް އެ ހޮސްޕިޓަލުގެ ފްލޫ ކްލިނިކަށް 800 އަށް ވުރެ ގިނަ ފަރާތްތަކުން ޑޮކްޓަރަށް ދައްކާފައިވާ ކަމަށް އައިޖީއެމްއެޗުން ހާމަކުރެއެވެ.
