ރޭލުގެ ހާދިސާއާ ގުޅިގެން ޕާކިސްތާނުގެ ބޮޑުވަޒީރަށް ރައީސް ތައުޒިޔާ ފޮނުއްވައިފި

ޕާކިސްތާނުގެ ކަރާޗީން ރާވަލްޕިންޑީއަށް ދަތުރުކުރި ރޭލެއްގައި ހިނގި ހިތާމަވެރި އަލިފާނުގެ ހާދިސާގައި 70 އަށްވުރެ ގިނަ މީހުން މަރުވުމާއި ގުޅިގެން، ޕާކިސްތާނުގެ ބޮޑުވަޒީރު އިމްރާން ޚާނަށް، ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ތަޢުޒިޔާ ފޮނުއްވައިފިއެވެ

ޕާކިސްތާނުގެ ބޮޑުވަޒީރަށް، ރައީސުލްޖުމްހޫރިއްޔާ ފޮނުއްވި ތަޢުޒިޔާގެ މެސެޖުގައި، ރޭލުގައި ރޯވެ ހިނގި ހިތާމަވެރި ހާދިސާއާއި ގުޅިގެން ޕާކިސްތާނަށް ކުރިމަތިވި ހިތާމައިގެ މި ދަނޑިވަޅުގައި، ދިވެހި ސަރުކާރާއި، ރައްޔިތުންނާއި އަދި އެމަނިކުފާނުގެ އަމިއްލަ ނަންފުޅުގައި، އެޤައުމުގެ ރައްޔިތުންނަށް ވަރަށް އިޚްލާޞްތެރިކަމާއެކު ހަމްދަރުދީ ފޮނުއްވާފައިވެއެވެ.

އެ ހާދިސާއާއި ގުޅިގެން ފޮރިން މިނިސްޓަރ އަބްދުﷲ ޝާހިދު ވެސް ވަނީ އެ ގައުމުގެ މިނިސްޓަރ އޮފް ފޮރިން އެފެއާޒަށް ތައުޒިޔާގެ މެސެޖް ފޮނުއްވާފައެވެ.

އެމަނިކުފާނުގެ ތައުޒިޔާގެ މެސެޖުގައި އެ ހާދިސާގައި އެތައް ބައެއް ޒަހަމްވެފައިވާތީ ވަރަށް ބޮޑަށް ހިތާމަކުރައްވާ ކަމަށް ވިދާޅުވެފައިވެއެވެ. އަދި މިފަދަ ހިތްދަތި ވަގުތެއްގައި މިކަމުން ސަލާމަތްކޮށްދެއްވުން އެދި ދުޢާކުރާ ކަމަށާއި އެ ހާދިސާގެ ސަބަބުން ހިތްދަތިކަން ލިބުނު އެންމެހާ އާއިލާތަކަށް ކެތްތެރިކަން ދެއްވާ އަވަސް ޝިފާއެއް މިންވަރުކުރެއްވުމަށް އެދި ދުއާ ކުރާ ކަމަށް ވެސް އެމަނިކުފާނުގެ މެސެޖުގައި ވިދާޅުވިއެވެ.