އިންފޮމޭޝަން ކޮމިޝަނަރާއި، ކޮމިޝަނަރ ޖެނެރަލް އަދި ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަން އައްޔަންކޮށްފި
31 އޮކްޓޯބަރު 2019 | ބުރާސްފަތި 13:24މަގާމުތަކަށް ބޭފުޅުން އައްޔަން ކުރެއްވީ ބުރާސްފަތި ދުވަހު ރައީސް އޮފީހުގައި
ތިން ބޭފުޅުން މަގާމަށް އައްޔަންކުރަން ބޭއްވި ރަސްމިއްޔާތުގެ ތެރެއިން
ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު، ކޮމިޝަނަރ ޖެނެރަލް އޮފް ޓެކްސޭޝަންގެ މަގާމަށް ފަތުޙުﷲ ޖަމީލް، ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަގާމަށް އަސްމާ ޝަފީއު އަދި އިންފޮރމޭޝަން ކޮމިޝަނަރުގެ މަޤާމަށް ހުސައިން ފިޔާޒު މޫސާ އައްޔަން ކުރައްވައިފިއެވެ.
ރައީސުލްޖުމްހޫރިއްޔާ މި މަގާމުތަކަށް ބޭފުޅުން އައްޔަން ކުރައްވާފައިވަނީ ބުރާސްފަތި ދުވަހުގެ މެންދުރު ރައީސުލްޖުމްހޫރިއްޔާގެ އޮފީހުގައި ބޭއްވެވި ރަސްމިއްޔާތެއްގައެވެ.
ކޮމިޝަނަރ ޖެނެރަލް އޮފް ޓެކްސޭޝަންގެ މަގާމަށް އައްޔަން ކުރެއްވި ފަތުޙުﷲ ޖަމީލަކީ ޓެކްސް އަދި އޮޑިޓާ ގުޅޭ އެކި މަޤާމުތަކުގައި 2003 ވަނަ އަހަރުން ފެށިގެން މަސައްކަތް ކުރައްވާފައިވާ ބޭފުޅެކެވެ. ފަތުޙުﷲ ޖަމީލް އެންމެ ފަހުން އަދާކުރައްވާފައިވަނީ ދިރާގުގެ މެނޭޖަރ ޓެކްސް، ރިސްކް އެންޑް ކޮމްޕްލަޔަންސްގެ މަގާމެވެ. އޭނާ ވަނީ އޮކްސްފޮޑް ބްރޫކްސް ޔުނިވަރސިޓީގައި އެޕްލައިޑް އެކައުންޓިންގެ ދާއިރާއިން ބެޗެލަރސް ޑިގްރީ ހާސިލްކުރައްވާފައެވެ. މީގެ އިތުރުން ފަތުޙުﷲ ޖަމީލަކީ ފެލޯ ޗާޓަރޑް ސަރޓިފައިޑް އެކައުންޓަންޓްސް (އެފް.ސީ.ސީ.އޭ)ގެ އިތުރުން އެސޯސިއޭޝަން އޮފް ޗާޓަރޑް އެކައުންޓަންޓްސް (އޭ.ސީ.ސީ.އޭ)ގެ މެމްބަރެކެވެ.
ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަގާމަށް އައްޔަން ކުރެއްވި އަސްމާ ޝަފީއު ވަނީ 1999 ވަނަ އަހަރުން ފެށިގެން މޯލްޑިވްސް އިންލަންޑް ރެވެނިއު އޮތޯރިޓީ (މީރާ) ގައި އޮޑިޓަރ އެކައުންޓިންއާއި ގުޅޭ އެކި މަގާމުތަކުގައި ޚިދުމަތް ކުރައްވާފައެވެ. އެގޮތުން އަސްމާ އެންމެ ފަހުން އަދާކުރައްވާފައިވަނީ މީރާގެ ޑިރެކްޓަރ ޖެނެރަލް، ޕްލޭނިންގް އެންޑް ޑިވެލޮޕްމަންޓުގެ މަޤާމެވެ. އޭނާ ވަނީ އޮކްސްފޯޑް ބްރޫކްސް ޔުނިވަރސިޓީގައި އެކައުންޓިންގ އެންޑް ފައިނޭންސްގެ ދާއިރާއިން ބެޗެލަރސް ޑިގްރީ ހާސިލްކުރައްވާފައެވެ.
ރައީސުލްޖުމްހޫރިއްޔާ އިންފޮރމޭޝަން ކޮމިޝަނަރުގެ މަގާމަށް އައްޔަން ކުރެއްވި ހުސައިން ފިޔާޒު މޫސާއަކީ، 2000 ވަނަ އަހަރުން ފެށިގެން ނޫސްވެރިކަމުގެ ދާއިރާގެ އެކިފަންތީގެ މަގާމުތައް އަދާކުރައްވާފައިވާ ބޭފުޅެކެވެ. އެގޮތުން ފިޔާޒު އެންމެފަހުން އަދާކުރައްވާފައިވާ ވަޒީފާއަކީ ރާއްޖެޓީވީގެ ޗީފް އޮޕަރޭޓިންގ އޮފިސަރގެ މަގާމެވެ. ފިޔާޒު ވަނީ މާސް ކޮމިއުނިކޭޝަންގެ ދާއިރާއިން ބެޗެލަރްސް ޑިގްރީ ހާސިލްކުރައްވާފައެވެ.
މި މަގާމުތަކަށް ބޭފުޅުން އައްޔަން ކުރައްވާފައިވަނީ މިހާރު ހިނގަމުންދާ 19 ވަނަ ރައްޔިތުންގެ މަޖިލީހަށް ނަން ހުށަހަޅުއްވައި މަޖިލީހުން ރުހުން ހޯއްދަވައިގެންނެވެ. ކޮމިޝަނަރ ޖެނެރަލް އޮފް ޓެކްސޭޝަންގެ އިތުރުން ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަގާމަށް ބޭފުޅުން އައްޔަން ކުރައްވާފައިވަނީ ޓެކްސް ނެގުމާބެހޭ އިދާރީ ގާނޫނަށް 2 ވަނަ އިސްލާހު ގެނައުމުގެ ގާނޫނު ތަސްދީޤު ކުރެއްވުމާ ގުޅިގެންނެވެ. އަދި އިންފޮމޭޝަން ކޮމިޝަނަރުގެ މަގާމަށް ބޭފުޅަކު އައްޔަން ކުރައްވާފައިމިވަނީ ކުރީގެ އިންފޮމޭޝަން ކޮމިޝަނަރުގެ ދައުރު ހަމަވުމާއި ގުޅިގެންނެވެ.
