ބިލް ނުދައްކައިގެން ފީއަލީ ކައުންސިލް އިދާރާގެ ކަރަންޓް ކަނޑާލައިފި

ފ. ފީއަލީ ކައުންސިލް އިދާރާގެ ކަރަންޓް ބިލް ނުދެއްކައިގެން ކަރަންޓް ހިދުމަތް ކަނޑާލާއިފި އެވެ.

ފ. ފީއަލީގެ ކައުންސިލްގެ ރައީސް މުހައްމަދު ޖަލީލު ވިދާޅުވީ، ކައުންސިލްގެ ބިލް ނުދެއްކޭތާ ހަ މަސް ދުވަސް ވެދާނެ ކަމަށާއި މިއަހަރުގެ ފެބްރުއަރީ މަހުން ފެށިގެން އެކި ދުވަސްވަރު މަތިން ބިލްތައް ދައްކާ ހަލާސްކުރުމަށް ފިނޭންސް މިނިސްޓްރީއަށް ހުށަހަޅާފައިވާނެ ކަމަށެވެ. އެހެންނަމަވެސް މިނިސްޓްރީގެ މާބޮޑު އެއްބާރުލުމެއް ނުލިބޭ ކަމަށް ޖަލީލު ވިދާލުވި އެވެ.

ޖަލީލު ވިދާޅުވީ، އެ ކައުންސިލް އިދާރާއިން ކަރަންޓް ކަނޑާލާފައިވަނީ، މެންދުރު 12:10 ހާއިރު ކަމަށާއި ކަރަންޓް ހިދުމަތް ދޭނީ ހުރިހާ ބިލްތަކަށް ފައިސާ ދެއްކުމުން، ކަމަށް ފެނަކައިން ބުނެފައިވާ ކަމަށެވެ.

ކަރަންޓް ނެތިގެން ކައުންސިލް ގެ ހިދުމަތް އާދީއްތަ ދުވަހުގެ މެންދުރު 1:30 ހާއިރު މެދުކަނޑާލުމުން، ފެނަކައިން، ކައުންސިލް އިދާރާގެ އެއް ބަޔަކަށް ކަރަންޓް ދިން ކަމަށް ޖަލީލު ވިދާޅުވި އެވެ. އެހެން ނަމަވެސް ކައުންސިލްގެ މަސައްކަތްތައް އެންމެ ފުރިހަމައަށް ކުރިއަށް ނުގެންދެވޭ ކަމަށް އޭނާ ވިދާޅުވި އެވެ.

" މިދިޔަ އަހަރުގެ ޑިސެންބަރު މަހުގެ ބިލް ވެސް އިނީ ނުދައްކާ. މިއަހަރުވެސް އެއްވެސް ބިލެއް ދައްކާފަ އެއް ނުވޭ. އަޅުގަނޑުމެން އެކި ފަހަރު މަތިން ފިނޭންސް މިނިސްޓްރީއަށް ކޮންޓެކްޓް ކުރިން.އެ މިނިސްޓްރީން އެއްބާރުލުމެއް ނުލިބޭ." ޖަލީލު ވިދާޅުވި އެވެ.

ޖަލީލު ވިދާޅުވީ، ކައުންސިލުން ކަރަންޓް ބިލްގެ އިތުރުން، ކައުންސިލުން ހަވާލުކޮށްގެން ކޮށްފައިވާ މަސައްކަތްތަކަށް ވެސް ފައިސާ ދެއްކުމުގައި ބޮޑެތި ގޮންޖެހުންތަކެއް އެބަ ހުރި ކަމަށެވެ. އެގޮތުން މިދިޔަ ދެ އަހަރު ދުވަހުގެ ތެރޭގައި ތިން ލައްކަށް ވުރެ ގިނަ ރުފިޔާގެ ބިލް ނުދެއްކި އެބަ ހުރި ކަމަށް އޭނާ ވިދާޅުވި އެވެ.