އާންމު ސިއްހަތާ ބެހޭ މަހާސިންތާއެއް ބާއްވަނީ
28 އޮކްޓޯބަރު 2019 | ހޯމަ 12:56މިމަހާސިންތާ ބާއްވަނީ އަންނަމަހު 04 އަކުން 06 އަކަށް
ހެލްތު މިނިސްޓަރު އަބްދުﷲ އަމީން
އާންމު ސިއްހަތުގެ އަހަރުގެ ގޮތުގައި އަންނަ އަހަރު، ސިއްހީ ދާއިރާގައި ކުރާނެ ކަންކަން ކަނޑައެޅުމަށް މަހާސިންތާއެއް ބާއްވަން ނިންމައިފިއެވެ.
"ނެޝަނަލް ކޮންފަރެންސް އޮން ރީވަޓަލައިޒިންގ ޕަބްލިކް ހެލްތު: ވޯކިންގ ޓުގެދަރ ފޯރ އަ ހެލްދިއަރ ނޭޝަން"ގެ ނަމުގައި ބާއްވާ މިމަހާސިންތާއާ ބެހޭގޮތުން މައުލޫމާތުދިނުމަށް ބޭއްވި ނޫސްވެރިންގެ ބައްދަލުވުމުގައި ހެލްތު މިނިސްޓަރު އަބްދުﷲ އަމީން ވިދާޅުވީ ނޮވެންބަރު މަހު 04 ވަނަ ދުވަހުން 06 ވަނަ ދުވަހަށް ބާއްވާ މަހާސިންތާގައި، އަންނަ އަހަރަށް ރާވާ ކަންތައްތަކާ ގުޅޭގޮތުން މުހިއްމު މަޝްވަރާތަކެއް ކުރާނެ ކަމަށެވެ.
މިނިސްޓަރު އަމީން ވިދާޅުވީ މިމާހަސިންތާގައި ރާއްޖެ އާއި ރާއްޖޭން ބޭރުގެ ސިއްހީ ތަޖުރިބާކާރުން ވެސް ކަރުދާސް ހުށަހަޅާނެ ކަމަށެވެ. އެގޮތުން އާއްމު ސިއްހަތުގައި ކާމިޔާބުކުރެވިފައިވާ ކަންކަމާއި، ސިއްހަތު ރައްކާތެރިކުރުމަށް އަލަށް ކުރެވޭނެ ކަންކަމަކީ ކޮބައިތޯ މަޝްވަރާކުރާނެ ކަމަށެވެ. އަދި މިމަހާސިންތާ ވެގެންދާނީ ސަރުކާރުގެ މަޝްރޫއުތަކާއި މަސައްކަތްތަކާއި ސިޔާސަތުތައް ކުރިއަށް ގެންދިއުމަށް ރާވާފައިވާ މަގުޗާޓަކަށް ކަމަށެވެ.
މީގެ އިތުރުން އާބާދީއަށް އަންނަ ބަދަލުތަކާއި އެކު އާބާދީގެ ސިއްޙީ މައްސަލަތައް ހައްލު ކުރުމަށް ގައުމީ ސިޔާސަތު ރާވާ ފަރާތްތަކާއި ދާއިރާގެ ނިންމުންތައް ނިންމާ ފަރާތްތަކަށް މައުލޫމާތުދީ އަހުލުވެރިކުރުވުމާއި ސިއްޙީ ގޮތުން ދުޅަހެޔޮ ދިރިއުޅުމަކަށް މަގުފަހިކުރުމަށް އެންމެން އެއްކޮށް މަސައްކަތް ކުރުމުގެ މުހިއްމުކަމާއި އަދި މިގޮތަށް މަސައްކަތް ކުރުމުން އަންނާނެ ރަގަޅު ބަދަލާއި ބެހޭގޮތުން މައުލޫމާތު ހިއްސާކުރުން ހިމެނޭ ކަމަށެވެ. އަދި ދާއިރާގެ މުހިއްމު ކަންތައްތައް ސްޓްރެޓެޖިކް ޕާތުވޭއެއްގެ ތެރެއިން ހާސިލް ކުރާނެ ގޮތާއި ބެހޭގޮތުން މަޝްވަރާ ކުރާނެ ކަމަށް މިނިސްޓަރު ވިދާޅުވިއެވެ.
ދިރިއުޅުމުގެ އާދަތަކާއި ކެއުންބުއިމުގައި ހުންނަ ކަންތައްތަކެއްގެ ސަބަބުން ގައިންގަޔަށް ނާރާ ބަލިތަކުގައި މަރުވާ މީހުންގެ އަދަދު އިތުރުވެފައިވާކަން ފާހަގަކުރައްވައި މިނިސްޓަރު އަމީން ވިދާޅުވީ އެއް ގައުމުން އަނެއް ގައުމަށް މީހުން ދަތުރުކުރުން އިތުރުވެފައިވާތީ ސިއްހީ ދާއިރާގައި ހޯދާފައިވާ ކާމިޔާބީތަކަށް ގޮންޖެހުމެއް ކުރިމަތިވާ ކަމަށެވެ.
މިނިސްޓަރު އަމީން ވިދާޅުވީ މިމަހާސިންތާއަކީ ސިއްހީ ނިޒާމު އާ ހަރުފަތަކަށް ގެންދިއުމުގެ ފެށުމެއް ކަމަށެވެ.
