އޮޑިޓް އޮފީހަށް 64 މިލިއަށް ރުފިޔާގެ ބަޖެޓެއް ދިނުމަށް މަޖިލީހުން ފާސްކޮށްފި
28 އޮކްޓޯބަރު 2019 | ހޯމަ 10:41މިހާރު ހިނގަމުންދާ 2019 ބަޖެޓަކީ 60 މިލިއަން ރުފިޔާ
އޮޑިޓަރ ޖެނެރަލް ހަސަން ޒިޔާތު--
އޮޑިޓަރ ޖެނަރަލްގެ އޮފީހަށް 64.91 މިލިއަން ރުފިޔާގެ ބަޖެޓެއް ދިނުމަށް ރައްޔިތުންގެ މަޖިލީހުން ފާސްކޮށްފިއެވެ.
ހޯމަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި އޮޑިޓު އޮފީހަށް 64 މިލިއަން ރުފިޔާގެ ބަޖެޓެއް ދިނުމަށް ފާސްކުރީ 82 މެންބަރުންގެ ވޯޓުންނެވެ.
އޮޑިޓަރ ޖެނެރަލް އޮފީހުގެ ބަޖެޓުގެ ގޮތުގައި އަންނަ 2020 ވަނަ އަހަރަށް 64 މިލިއަން ރުފިޔާ ކަނޑައެޅުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީން ނިންމައި މަޖިލީހުގެ ޖަލްސާއަށް އެރިޕޯޓް ހުށަހެޅީ ވެސް ހޯމަ ދުވަހުގެ ޖަލްސާގަ އެވެ.
އޮޑިޓް އޮފީހުން މަޖިލީހުގެ މާލިއްޔަތު ކޮމެޓީއަށް ފޮނުވާފައިވާ 2020 ވަނަ އަހަރަށް ލަފާކުރާ ބަޖެޓް ރިޕޯޓުގައި އެދިފައިވަނީ ވެސް 64.91 މިލިއަން ރުފިޔާ އެވެ. ކޮމެޓީން އެ ޢަދަދު ފާސްކޮށްފައިވަނީ ފިނޭންސް މިނިސްޓްރީއާ މަޝްވަރާ ކުރުމަށްފަހު، އެ މިނިސްޓްރީން އިޢުތިރާޒު ނުކުރާތީ ކަމަށް މާލިއްޔަތު ކޮމެޓީގެ ރިޕޯޓުގައި ބުނެފައި ވެއެވެ.
މިހާރު ހިނގަމުންދާ 2019 ވަނަ އަހަރުގެ އޮޑިޓް އޮފީހުގެ ބަޖެޓަކީ 60.04 މިލިއަން ރުފިޔާގެ ބަޖެޓެކެވެ.
އޮޑިޓް އޮފީހުގެ 2020 ވަނަ އަހަރުގެ ޚަރަދުތައް ހިނގާނެ ކަމަށް ލަފާކުރާ ގޮތް:
އޮޑިޓަރ ޖެނެރަލްގެ މުސާރައާއި އެހެނިހެން އިނާޔަތްތަކަށް - 795،000
މުވައްޒަފުންގެ މުސާރައާއި އެހެނިހެން އިނާޔަތްތަކަށް - 43.98 މިލިއަން ރުފިޔާ
ޕެންޝަން ފައިސާއަށް - 1.25 މިލިއަން ރުފިޔާ
މުވައްޒަފުން ތަމްރީނު ކުރުމާއި ފެންވަރު މަތިކުރުން - 1.74 މިލިއަން ރުފިޔާ
ދަތުރުފަތުރާއި އެހެނިހެން ކަންތައްތަކުގެ ހަރަދު - 4.89 މިލިއަން ރުފިޔާ
އޮޑިޓް އޮފީހުގެ ބަޖެޓް ރިޕޯޓުގައިވާ ގޮތުން މުވައްޒަފުންގެ މުސާރައަށްދާ ޚަރަދު ބޮޑުވެފައިވަނީ މިއަހަރުގެ ފަހު ކުއާޓަރއިން ފެށިގެން މުވައްޒަފުންނަށް އިތުރު ގަޑި ދޭން ނިންމާފައިވާތީ އެވެ.
ފިނޭންސް މިނިސްޓްރީން ދައުލަތުގެ ބަޖެޓް މަޖިލީހަށް ހުށަހަޅަންޖެހޭއިރު، އޮޑިޓް އޮފީހުގެ ބަޖެޓަކީ ވަކިން، އޮޑިޓް އޮފީހުން މަޖިލީހަށް ހުށަހަޅަންޖެހޭ ބަޖެޓެކެވެ. ނަމަވެސް އޮޑިޓް އޮފީހުގެ ބަޖެޓް މަޖިލީހުން ފާސްކޮށް، އަދި ދައުލަތުގެ ބަޖެޓް، ބަޖެޓް ކޮމެޓީން ދިރާސާކޮށް ނިންމައި މަޖިލީހުގެ ތަޅުމުން ދައުލަތުގެ ބަޖެޓް ފާސްކޮށް ނިމޭއިރު، އޮޑިޓް އޮފީހުގެ ބަޖެޓް ވެސް ދައުލަތުގެ ބަޖެޓްގެ ތެރޭގައި ހިމެނިގެންދާނެ އެވެ.
މި ހަފުތާ ނިމުމުގެ ކުރިން 2020 ވަނަ އަހަރަށް ލަފާކުރާ ދައުލަތުގެ ބަޖެޓު ހުށަހަޅާނެ ކަމަށް ފިނޭންސް މިނިސްޓަރ އިބްރާހިމް އަމީރު ވަނީ ވިދާޅުވެފަ އެވެ.
އެނގިފައިވާ ގޮތުގައި އަންނަ އަހަރަށް ލަފާކޮށް މަޖިލީހަށް ހުށަހަޅާ ބަޖެޓުގެ އަދަދު ގާތްގަނޑަކަށް 40 ބިލިއަން ރުފިޔާއަށް އަރައެވެ.
މާލިއްޔަތު ގާނޫނުގެ 32 ވަނަ މާއްދާގެ (ހ) ގައި ބަޔާން ކުރާ ގޮތުން ރައްޔިތުންގެ މަޖިލީހަށް ހުށަހެޅުމަށްޓަކައި ކޮންމެ މާލީ އަހަރަކަށް އެކުލަވާލެވޭ އެ އަހަރުގެ ދައުލަތުގެ ބަޖެޓު، މިނިސްޓަރު ތައްޔާރުކޮށް، ބަޖެޓު އެކުލަވާލެވޭ މާލީ އަހަރު ފެށުމުގެ އެންމެ ލަސްވެގެން 1 މަސްދުވަސްކުރިން ރައްޔިތުންގެ މަޖިލީހަށް ހުށަހަޅަންވާނެކަމަށެވެ.
އަދި ބަޖެޓު ހުށަހަޅާއިރު، އެބަޖެޓުގައި މާލީ އަހަރަކަށް ދައުލަތުން ހިނގާނެކަމަށް ލަފާކުރި ޚަރަދާއި، ދައުލަތަށް ލިބޭނެ ކަމަށް ލަފާކުރާ އެއްޗެއްގެ ހިސާބާއި، އަދި ވޭތުވެދިޔަ މާލީ އަހަރު ދައުލަތުން ހިނގި ޚަރަދާއި، ދައުލަތަށް ލިބުނު އެއްޗެއްގެ ހިސާބުގެ އިތުރުން އެ ބަޖެޓުގައި ވަކި ސުރުޚީތަކެއްގެ ދަށުން ފާހަގަކޮށް ބަޔާން ކުރަންވާނެކަމަށް އެ މާއްދާގެ (ށ)ގައި ވެއެވެ.
އަމީރު ވިދާޅުވީ ޤާނޫނުގައި ކަނޑައަޅާފައިވާ ތާރީޚުގެ ކުރިން ރައްޔިތުންގެ މަޖިލީހަށް ބަޖެޓު ހުށަހަޅާނެ ކަމަށެވެ.
