މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ ލިމިޓެޑް(އެމްޓީސީސީ) ގައި މަސައްކަތް ކުރާ މުވައްޒަފުންގެ 51 އިންސައްތަ އަކީ ބިދޭސީން ކަމަށް އެކުންފުނީގެ ޗީފް އެކްޒެކްޓިވް އޮފިސަރު ހަސަން ޝާހު ވިދާޅުވެއްޖެއެވެ.
އެމްޓީސީސީން ކުރަމުންދާ މަސައްކަތްތަކާއި ބެހޭ ގޮތުން ރާއްޖެޓީވީގެ ފަލަ ސުރުޚީ ޕްރޮގްރާމު ގައި ވާހަކަ ދައްކަމުން ޝާހު ވިދާޅުވީ، އެކުންފުންޏަށް ދިމާވާ އެންމެ ބޮޑު ގޮންޖެހުމަކީ ޤާބިލު އަދި ހުނަރުވެރި މީހުން ނުލިބުމުގެ މައްސަލަ ކަމަށެވެ.
ވަކިން ޚާއްސަކޮށް އޮޕަރޭޓިން އަދި ފަންނީ މަސައްކަތްތަކަށް ޤާބިލު މީހުން ނުލިބޭކަން ފާހަގަކުރައްވަމުން ޝާހު ވިދާޅުވީ، ވަޒީފާތަކަށް ބިދޭސީން ގެނައުމަށް ބޭނުންނުވާ ކަމަށާއި، އެހެން ނަމަވެސް ގިނަ ފަހަރު ބިދޭސީންނަށް ބަރޯސާވާން ޖެހެނީ ދިވެހިން ނުލިބޭތީ ކަމަށެވެ.
އެމްޓީސީސީގެ ސްޓެޓިސްޓިކް އިން ދައްކާ ގޮތުން މިހެން ޕައިޗާޓު ކުރަހާލީމަ މި އަންނަނީ އެމްޓީސީގެ މުވައްޒަފުންގެ ތެރެއިން 51 ޕަސެންޓަކީ ބިދޭސީން ކަމަށް.ހަސަން ޝާހު ~ އެމްޓީސީސީގެ ސީއީއޯ ~
ސަރުކާރުގެ ސިޔާސަތުގެ ތެރެއިން ދިވެހިންނަށް ވަޒީފާ ދިނުމަށް އެމްޓީސީސީން ދަނީ ބޮޑު އަހައްމިއްޔަތު ކަމެއް ދެމުންނުވެ. އެމްޓީސީސީގެ ސީއީއޯ ވިދާޅުވީ، ރައްޔިތުންގެ މަޖިލީސް މެމްބަރުންނާއި، ކައުންސިލްތައް މެދުވެރިކޮށް ހުނަރު ހުރި ޤާބިލު ފަރާތްތަކުގެ މަޢުލޫމާތުތައް ހިއްސާކުރަމުން އަންނަ ކަމަށާއި، އެ ފަރާތްތަކަށް ގުޅައިގެން މީހުން ވަޒީފާ އަށް ނެގުމުގެ މަސައްކަތް މިހާރުވެސް ކުރަމުންދާ ކަމަށެވެ.
އެމްޓީސީސީ ގައި މަސައްކަތްކުރާ ދިވެހިންގެ ޢަދަދު ބިދޭސީންނަށްވުރެ މަދު ކަމަށް ޝާހު ވިދާޅުވެފައިވާއިރު، ދިވެހިން ވަޒީފާތަކަށް ވެއްދުމަށް ޓްރެއިނިންތައް ދޭން ޖެހޭ ކަމަށް އިކޮނޮމިކް މިނިސްޓަރު ފައްޔާޒް އިސްމާއިލް ވަނީ ދާދި ފަހުން ވިދާޅުވެފައެެވެ. މި ސަރުކާރުން ދިވެހިންނަށް ވަޒީފާގެ ފުރުޞަތު ހޯދައިދީ ޤާބިލު ބަޔަކަށް ހެދުމުގެ މަސައްކަތް ކުރަމުން އަންނައިރު، ދިވެހިންނަކީ ހުނަރުވެރި ބައެއްކަމަށާއި، ބޭނުންވަނީ ފުރުޞަތުތަކެއް ކަމަށް ނައިބު ރައީސް ފައިސަލް ނަސީމް ވަނީ ވިދާޅުވެފައެވެ.
