ކޮމިޝަނަރ ޖެނެރަލް އޮފް ޓެކްސޭޝަންގެ މަގާމަށް ފަތުހުﷲ އައްޔަންކުރުން މާދަމާގެ ޖަލްސާއަށް!
އެ މަގާމަށް ފަތުހުﷲގެ އިތުރުން ފޮނުއްވާފައިވާ ނަމަކީ އިސްމާއީލް ނާޝިދު
އިގްތިސާދީ ކޮމެޓީން ފަތުހުﷲ އާއި އިންޓަވިއު ކުރައްވަނީ
ކޮމިޝަނަރ ޖެނެރަލް އޮފް ޓެކްސޭޝަންގެ މަގާމަށް ފަތުހުﷲ ޖަމީލް އައްޔަންކުރުމުގެ މައްސަލަ ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާއަށް އެޖެންޑާކޮށްފި އެވެ.
ކޮމިޝަނަރ ޖެނެރަލް އޮފް ޓެކްސޭޝަންގެ މަގާމަށް އައްޔަންކުރުމަށް ރައީސް އިބްރާހީމް މުހައްމަދު ސޯލިހު މަޖިލީހަށް ދެ ނަމެއް ފޮނުއްވި އެވެ. އެއީ ފަތުހުﷲ ގެ އިތުރުން އިސްމާއީލް ނާޝިދުގެ ނަމެވެ.
މަޖިލީހުގެ އިގްތިސާދީ ކޮމެޓީން ނިންމާފައިވަނީ ފަތުހުﷲ އެމަގާމަށް އައްޔަން ކުރުމަށް ނިންމާ، މަޖިލީހުގެ ރައީސަށް އެ ރިޕޯޓް ހުށަހަޅާފަ އެވެ.
ފަތުހުﷲ އަކީ މިހާރު ދިރާގުގެ އިސްމަގާމެއް ފުރުއްވަމުން ގެންދަވާ، މީގެކުރިން މީރާގައި ވެސް އިސްމަގާމުތަކެއް ފުރުއްވި ބޭފުޅެކެވެ. ކުރީގެ ރައީސް މުހައްމަދު ނަޝީދުގެ ސަރުކާރުން ޓެކްސް ނިޒާމް ތައާރަފް ކުރިއިރު، ޓެކްސާ ގުޅޭ ކަންކަމުގައި މީހުން ހޭލުންތެރި ކުރުމާއި، މީޑިއާތަކަށް މައުލޫމާތު ދެއްވުމުގައިވެސް ފަތުހުﷲ ވަނީ އިސްދައުރެއް އަދާކުރައްވާފަ އެވެ.
ނާޝިދަކީ މިހާރުވެސް މޯލްޑިވްސް ކަސްޓަމްސް ސާރވިސްގެ އިސްމަގާމެއް ފުރުއްވަމުން ގެންދަވާ ބޭފުޅެކެވެ.
މަޖިލީހުގެ އިގްތިސާދީ ކޮމެޓީން ވަނީ މިދިޔަ ހަފްތާގައި، ކޮމިޝަނަރ ޖެނެރަލް އޮފް ޓެކްސޭޝަންގެ މަގާމަށް އައްޔަން ކުރަން ރައީސް ސޯލިހު ފޮނުއްވި ދެ ބޭފުޅުންނާ އިންޓަވިއު ކޮށްފަ އެވެ. އަދި ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަގާމަށް ކުރިމަތިލެއްވި ހަ ފަރާތްތެއްގެ ނަން ރައީސް ސޯލިހު ފޮނުއްވާފައިވާތީ، ކޮމެޓީން ވަނީ އެ ބޭފުޅުންނާ ވެސް އިންޓަރވިއު ކޮށްފަ އެވެ.
މި ހަ ބޭފުޅުންގެ ތެެރެއިން ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަގާމަށް އައްޔަން ކުރުމަށް ކޮމެޓީން ވަނީ ދެ ނަމެއް ފާސްކޮށްފަ އެވެ.
އެ ދެ ނަމުގެ ތެރެއިން މަޖިލީހުގައި ވޯޓަށް އަހައި، އެންމެ ގިނަ ވޯޓް ލިބޭ ނަމަކީ ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަގާމަށް އައްޔަން ކުރެވޭ ފަރާތްކަމުގައި ކަނޑައެޅިގެންދާނެ އެވެ.
